எல்லாவற்றுக்குமே இட ஒதுக்கீடு தந்துவிடலாமா?

ஸ்பெக்ட்ரம் புகழ் ராசாவை டிஃபண்ட் செய்வதற்காக முதல்வர் டாக்டர் கலைஞர் அவர்கள் அவர்கள் தெரிவு செய்தது ராசா தலித் என்பதுதான். டெல்லிக்கு சென்று, கலைஞர் ஒட்டு மொத்த தலித்துக்கும் நல்ல பேர் வாங்கி தந்துவிட்டார். செம்மொழி மாநாட்டில் இதற்கு ஒரு விருது தந்துவிடலாம் (நன்றி இட்லிவடை).

உதாரணத்துக்கு இந்த இணைய பக்கத்தைப் பாருங்கள்.

ஆ. ராசா தலித் எனக் கூறி ஸ்பெக்ட்ரம் பிரச்னையை திசைதிருப்புகிறார் முதல்வர் கருணாநிதி: ஜெயலலிதா

மத்திய அமைச்சர் ஆ. ராசா தலித் சமுதாயத்தைச் சேர்ந்தவர் என்பதால் ஊழல் குற்றச்சாட்டுகளைச் சுமத்துகின்றனர் என்று கூறி, அவருக்கு எதிரான ஸ்பெக்ட்ரம் ஊழல் பிரச்னையை திசை திருப்புகிறார் முதல்வர் கருணாநிதி என்று அ.தி.மு.க. பொதுச் செயலாளர் ஜெயலலிதா கூறியுள்ளார்.

இது குறித்து அவர் வெளியிட்டுள்ள அறிக்கையில்,

தொலைத்தொடர்புத் துறை அமைச்சரான ராசா, தலித் சமுதாயத்தைச் சேர்ந்தவர் என்பதால், அவரைப் பதவி நீக்கம் செய்ய வேண்டும் என்ற குரல் நாடாளுமன்றத்தில் ஓங்கி ஒலிப்பதாக முதல்வர் கருணாநிதி கூறியுள்ளார். ஸ்பெக்ட்ரம் அலைக்கற்றை ஏல ஒதுக்கீடு ஊழல் விவகாரத்தில் தலித் என்ற ஆயுதத்தைப் பயன்படுத்தி, புத்திசாலித்தனமாக நடந்து கொண்டுவிட்டதாக முதல்வர் கருணாநிதி நினைத்துக் கொண்டிருக்கிறார்.

"2 ஜி' ஸ்பெக்ட்ரம் விற்பனை குறித்து முடிவெடுப்பதற்கு முன்பு, தனக்குத் தெரியப்படுத்த வேண்டும் என்ற பிரதமரின் அறிவுரையை ராசா அவமதித்தார். ஸ்பெக்ட்ரம் உரிமத்தை முதலில் வருபவருக்கு முதலில் அளிப்பதற்கு தொலைத்தொடர்பு முறைப்படுத்தும் ஆணையம் தெரிவித்த எதிர்ப்புகளையும் அவர் நிராகரித்தார்.

சினிமா டிக்கெட்டை விற்பது போல, ஸ்பெக்ட்ரம் உரிமத்தை விற்பனை செய்யும் முடிவை ராசா எடுத்திருக்கிறார் என்று தில்லி உயர் நீதிமன்றம் கருத்து தெரிவித்தது. ஸ்பெக்ட்ரம் உரிமம் பெறுவதற்கான விண்ணப்பத் தேதியை முன்தேதியிட்டு ராசா மாற்றியது தவறு என்ற தில்லி உயர் நீதிமன்றத் தீர்ப்பை உச்ச நீதிமன்றம் உறுதி செய்தது.

2 ஜி ஸ்பெக்ட்ரம் விற்பனையில் ராசா எடுத்த முடிவின் காரணமாக, குறைந்தபட்சம் ரூ.26 ஆயிரம் கோடி அளவுக்கு இழப்பு ஏற்பட்டிருக்கிறது என்று இந்திய கணக்குத் தணிக்கைத் தலைவர் கூறியுள்ளார்.

ஸ்பெக்ட்ரம் முறைகேடு தொடர்பாக சி.பி.ஐ. விசாரிக்க வேண்டும் என்று மத்திய கண்காணிப்பு ஆணையம் கோரியது.

ராசா மீதான இந்தக் குற்றச்சாட்டுகளுக்குப் பதிலளிக்காத கருணாநிதி, ராசா தலித் சமுதாயத்தைச் சேர்ந்தவர் எனக் கூறி பிரச்னையைத் திசை திருப்புகிறார்.

இது போன்ற பேச்சுகளின் மூலம், நாடாளுமன்றத்தில் ராசாவின் ராஜிநாமாவைக் கோரும் தலைவர்களின் வாயை அடைத்து விடலாம் என்று கருணாநிதி நினைக்கிறார் என்று ஜெயலலிதா கூறியுள்ளார்.

அதே ராசா மந்திரி பதவியை பெறுவதற்காக அரசியல் புரோக்கர் ஒருவரது துணையை நாடினார் என்பது மெதுவாக வெளியாகிறது.

பதிவர் இட்லி வடையின் இந்தப் பதிவில் மேலும் சில கேள்விகள் எழுப்பப்பட்டுள்ளன. அவை பின்வருமாறு:


1. ராசா பேசிய உரையாடகள் கலைஞருக்கு தெரியுமா? "கலைஞர் குடும்பத்துக்கு மூன்று மந்திரி பதவியா?" என்று ராடியா கேள்வி கேட்க அதற்கு ராஜா சிரித்துவிட்டு "அது தெரிந்தது தானே?" என்கிறார். இதை கலைஞர் நியூஸை பார்க்கும் போது அவரது மனநிலை எப்படி இருக்கும்.


2. இந்தத் தொலைபேசி உரையாடல் பதிவு செய்யப்பட்ட விஷயம் முன்கூட்டியே உள்துறைச் செயலாளரிடம் அனுமதி பெற்றே செய்யப்பட்டிருப்பதாக இப்போது தெரியவந்துள்ளது. ஏன் இவ்வளவு வருஷம் கழித்து இது லீக் செய்யப்படிருக்கிறது? ராஜாவை எப்படியாவது வெளியே அனுப்ப காங்கிரஸ் செய்யும் சதியா?

3. ராடியாவிடம் மந்திரி பதவி பற்றிக் கேட்க நான் என்ன முட்டாளா என்று ராஜா பார்லிமெண்ட் முன்னாடி ஆவேசமாகக் கேட்கிறார். அப்படி என்றால் ஏன் ராடியாவின் இந்த தொலைப்பேசி உரையாடல்கள் மீடியாவில் ஒலிபரப்ப கூடாது என்று தடை கேட்டு கோர்ட்டுக்கு போனார். (கோர்ட் நிராகரித்துள்ளது என்பது வேறு விஷயம் )

4. இந்த விவகாரத்தில் - தயாநிதி மாறன் ஊடகங்களுக்கு செய்தியை சப்ளை செய்கிறார் என்றும், பாவம் பாலு என்றும் உரையாடல்கள் வருகிறது. இதை தயா, பாலு கேட்டால் என்ன நினைப்பார்கள் ?

5. இவ்விவகாரத்தில் அதிகம் அடிபடும் ராடியா என்ற பெண்மணி, சில டெலிகாம் நிறுவனங்களுக்கு லைசன்ஸ் பெறுவதற்கு பெருமளவில் உதவியுள்ளார் என்பது வருமானவரித் துறையினரால் கண்டறியப்பட்டுள்ளது. சிபிஐ, வருமானவரி துறை ஆகியவை இவ்வளவு கண்டுபிடித்த பின்பும் அரசு ஏன் சும்மா இருக்கிறது? இத்தனைக்கும் சிபிஐ, மற்றும் வருமானவரி துறை எல்லாம் தற்போது இயங்கும் அரசுகளின் கீழ் இருக்கிறது. ராஜாவைப் பாதுகாப்பதன் மூலம் வேறு ஏதாவது பெரிய தலைகளைப் பாதுகாக்க முனைகிறதோ?

6. எதிர்க்கட்சிகளில் பாஜகவும், மீடியாக்களில் ஹெட்லைன்ஸ் டுடேவும் மட்டுமே இதனை பிரதானமாகப் பேசி வருகின்றனர். மற்ற மீடியாக்கள் அவையடக்கம் கருதி அடக்கியே வாசிக்கின்றன. ஜூவி முன்பு ராஜா பற்றி படம் போட்டதற்கே கோர்ட்டுக்கு போன பயமா?

இப்பொழுது திமுக எதற்காக ராஜாவை அவசரமாக அழைத்துள்ளது என்பது போகப் போகத்தான் தெரியும். தெரியாமலும் போகலாம்.

மேலே எழுப்பப்பட்ட கேள்விகளுக்கு ஆதாரமான வீடியோவின் ஐந்து பாகங்கள் இங்கே.

அதே மாதிரி டிஃபன்ஸ் நீதியரசர் தினகரனுக்கும் தரப்படுகிறது. அவரை டிஃபண்ட் செய்து தமாஷ் பதிவு போட்ட தமிழ் ஓவியாவோ தினகரன் மேல் வந்த குற்றச்சாட்டுக்களை பற்றி ரொம்ப கண்டு கொள்ளாது உலகில் மற்ற எல்லா விஷயங்களையுமே பேசுகிறார்.

இப்போது இப்பதிவின் தலைப்பில் வைக்கப்பட்ட கேள்விக்கு வருவோம். ஊழல் செய்யும் அரசியல்வாதிகள் மதம், இனம், ஜாதி எல்லாவற்றையும் கடந்தவர்கள். ஊழல் செய்கிறார்கள். மாட்டிக் கொண்டாலும் தங்களுக்கிருக்கும் பிற திறமைகளை உபயோகித்து பிழைத்துக் கொள்கிறார்கள். ஆனால் அவர்களில் தாழ்த்தப்பட்டவர்களுக்கும், சிறுபான்மையினருக்கும் சற்றே சலுகை தர முடிவு செய்தாலும் ஆச்சரியப்படுவதற்கில்லை. அதாகப்பட்டது தாழ்த்தப்பட்ட சாதியைச் சார்ந்த அரசியல்வாதி என்றால், ஒரு குறிப்பிட்டத் தொகை அளவுக்கு ஊழல் செய்யலாம் என நிர்ணயித்து விடலாம். அந்தக் குறிப்பிட்ட தொகையும் ராசா போன்றவர்களுக்கு சாதகமாக இருக்க வேண்டுமானால் 2000 கோடி ரூபாய்க்கு குறையாமல் இருக்க வேண்டும். அப்படி வைத்தால் தினகரனும் automatically covered. ஆகவே ஒரே கல்லில் இரண்டு மாங்காய்.

மேலே ஏதேனும் ஆலோசனைகள் இருந்தால் யாராவது சொல்லுங்கப்பு!!!!

அன்புடன்,
டோண்டு ராகவன்