துக்ளக் 38-வது ஆண்டு விழா கூட்டம் - 1

இந்த ஆண்டு கூட்டத்துக்கு மோடி அவர்களும் வருவதாக இருந்ததால் சற்று தயக்கம் இருந்தது. ரொம்ப கெடுபிடி இருக்குமோ எனத் தோன்றியது. ஆனால் இதற்கெல்லாம் பயப்படுவது ஹிந்து நிருபரின் மகனுக்கு அழகா எனத் துணிந்து சென்றேன். ஒரே ஒரு வேலை செய்தேன். செல்பேசி எடுத்து செல்லவில்லை. மீட்டிங் தேனாம்பேட்டை காங்கிரஸ் மைதானத்தின் காமராஜர் அரங்கில் ஏற்பாடு செய்யப்பட்டிருந்தது.

அரங்கத்துக்கு சென்றபோது மாலை 04:40. பெரிய கியூ 4 அல்லது ஐந்து வளைவாக நின்றது. பத்து இடங்களில் பரிசோதனை செய்தனர். உள்ளே நுழையும்போது மணி மாலை 05:50. அரங்கம் நிரம்பியதால் வெளியே போன ஆண்டு போல லாபியில் இரண்டு ஸ்க்ரீன்கள் தயார் செய்திருந்தனர். ஒன்றின் முன்னால் உட்கார்ந்து கொண்டேன், தரையில். என் பக்கத்தில் இருப்பவர் என்னைப் பார்த்ததுமே கேட்டார் "நீங்கள் டோண்டு ராகவன்தானே" என்று. ஒரு நிமிடம் விழித்த நான் அடையாளம் கண்டு கொண்டேன். நம்ம வி.எஸ்.கே. சார்தான். அமெரிக்காவில் மருத்துவம் ப்ராக்டீஸ் செய்கிறார். ஒரு பிளாக்கர் மீட்டிங்கில் சந்தித்திருந்தேன் (இட்லிவடை ஸ்கூப் படங்கள் எடுத்த பதிவர் மீட்டிங்). நிரந்தரமாக சோவின் ஹேர்ஸ்டைலை மேற்கொண்டுவிட்டார்.

சற்றே தமிழ்மணம் விஷயங்கள் பேசினோம். பிறகு வேறு விஷயங்கள் பேசினோம். சரியாக மாலை 06:30 க்கு சோ ஸ்க்ரீனில் வந்து மோடி அவர்கள் வர சற்றே தாமதம் ஆவதால் ஐந்து நிமிடங்கள் கழித்து மீட்டிங் துவங்கும் என்றார். அதே போல ஐந்து நிமிடங்களில் மோடியும் வந்தார். அரங்கமெங்கும் கரகோஷம். வெளியிலும்தான். சோவுக்கு வணக்கம் தெரிவித்து விட்டு அரங்கில் முதல் வரிசையில் அமர்ந்தார். குருமூர்த்தி அவர்கள் அவர் பக்கத்தில் அமர்ந்து எனது வேலையை செய்ய தயாராக இருந்தார்.

மோடி அவர்களுடன் சில பா.ஜ.க. பிரமுகர்களும் வந்திருந்தனர். அவர்களில் முக்கியமானவர்கள் சி.பி. ராதாகிருஷ்ணன், லலிதா குமாரமங்கலம், திருநாவுக்கரசர் ஆகியோர்.

வழ்க்கம்போல ஒரு பீடிகையும் இன்றி சோ அவர்களின் கணீர் பேச்சு துவங்கியது. முதற்கண் மோடி அவர்களது வருகையை எதிர்த்து ஆர்ப்பாட்டம் செய்து மீட்டிங்கிற்கு நல்ல பொது மக்கள் தொடர்பு சேவை செய்த இயக்கங்களுக்கு தன் நன்றியை தெரிவித்து கொண்டார். அரங்கிலும் வெளியிலும் ஒரே சிரிப்பு. பிறகு போலீசுக்கும் நன்றி தெரிவித்தார். அவர்கள் இவரிடம் இன்விடேஷன் லிஸ்ட், பாஸ் கொடுக்கப்பட்டவர்கள் லிஸ்ட் எல்லாவற்றையும் கேட்டார்களாம். அப்படியெல்லாம் ஒன்றும் கிடையாது என்றதும் டென்ஷனாகி விட்டார்களாம். தாங்கள் எதைத்தான் செக் செய்வது என்று முதலில் குழப்பம் இருந்தாலும் சுதாரித்து கொண்டு தம் வேலையை திறம்படச் செய்ததற்காக அவர்களுக்கு சோ பாராட்டு தெரிவித்தார். பல அழுத்தங்கள் கொடுக்கப்பட்டாலும் தான் புக் செய்த ஹாலை வாபஸ் வாங்காது செயல்பட்ட காங்கிரஸ் நிர்வாகிகளுக்கும் நன்றி தெரிவித்தார். காமராஜ் அவர்கள் ஜனசங்குடன் 1971 தேர்தலில் கூட்டணி வைத்து கொண்டதையும் அவர் நினைவூட்டினார்.

இந்த ஹால் கொடுக்க மாட்டேன் என்று காங்கிரஸ் கூறினால் என்ன செய்வது என்று யோசிக்க இடம் வைக்காது எஸ்.வி.சேகர் அவர்கள் இன்று தான் நாரதகான சபாவில் நடத்த இருந்த தனது நாடகத்தை நிறுத்தி இவருக்கு அதை விட்டுத் தருவதாகக் கூறியிருக்கிறார். அதற்காக அவருக்கும் நன்றி தெரிவித்தார் சோ அவர்கள். பிறகு பத்திரிகையில் தன்னுடன் பணிபுரிபவர்கள் மற்றும் வாசகர்களுக்கும் நன்றி கூறிவிட்டு வழக்கம்போல தேர்ந்தெடுக்கப்பட்ட சிலவாசகர்களை சுருக்கமாகப் பேச அழைக்கும் முன்னால் தனது சகபாடிகளை அறிமுகம் செய்வித்தார். அவர்கள் உதயசங்கர், சிங்காரம், சத்யா, மதலை, பர்கத் அலி, சுவாமிநாதன், ரமேஷ், இதயா, ஷண்முகம், வசந்தன் பெருமாள், விஜயகோபால், ராமு, ஸ்ரீகாந்த், குமார், ராஜு, சுமதி, குருமூர்த்தி ஆகியோர்.

பிறகு வாசகர்கள் பேச்சு ஆரம்பித்தது.

அனந்தராமன் என்பவர் பேசினார். பாஜக, அஇஅதிமுக ஆகியவற்றின் கூட்டணி வாய்ப்புகள், கலைஞர் அவர்கள் மதுவிலக்கை நிறைவேற்றாததன் காரணங்கள், மோடி அவர்களின் வெற்றி ரகசியம், இடைதேர்தலும் கம்யூனிஸ்டுகளும் பற்றியும் சோ அவர்கள் கருத்து கூறுமாறு கேட்டு கொண்டார். சோ அவர்கள் தன் பதிலில் பாஜக அதிமுக கூட்டணி பற்றி தான் என்ன சொல்ல இருக்கிறது. மதியம்தான் மோடி அவர்கள் ஜயலலிதா வீட்டில் பகல் உணவு அருந்தினார், ஏதாவது நடக்கும் என நம்புவோம் எனக் கூறினார். கூட்டணி வாய்ப்புகள் உண்டு என தனது கருத்தையும் கூறினார். ஏனெனில் மூன்றாவது அணி காலணாவுக்கு பிரயோசனம் இல்லை என்றும் கூறினார். மதுவிலக்கு பற்றி பேசும்போது அது பிராக்டிகல் இல்லை என தான் கருதுவதையும் வெளிப்படுத்தினார். இடைதேர்தல் என்றால் கம்யூனிஸ்டுகளுக்கும் உதறல் ஆனால் காங்கிரசுக்கு அதிக உதறல் என்பதை புரிந்த்து கொண்டு அதற்கேற்ப அவர்கள் மிரட்டுவதாக சோ அவர்கள் கூறினார்.

பிறகு பேசியது பூபால் என்பவர். அவரது கேள்விகள், கலைஞர் கனிமொழி மத்திய காபினெட்டில் பதவி பெறுவாரா? மோடிக்கு அமெரிக்க விசா மறுக்கப்பட்டது பற்றி கருத்து?
முக அவர்களுக்கு பிறகு திமுக பிளவுபட்டால் பாஜக நல்ல நிலைக்கு தன்னை கொண்டுவர இயலுமா? துக்ளக் ஆண்டுவிழா மீட்டிங்குகளுக்கு ஏன் ஹிந்து, எக்ஸ்பிரஸ் ஆகியவற்றிமன் ஆசிரியர்களை அழைப்பதில்லை? இவற்றுக்கு சோ அவர்கள் அளித்த பதில்கள்: கனிமொழி கலைஞரா? ஒத்து கொள்வதிற்கில்லை. முதலமைச்சரின் மகள் என்றால் என்ன வேண்டுமானாலும் கூறிவிடுவதா, தான்கூட கவிதை எழுதியிருப்பதாகவும் தன்னை அதற்காக கலைஞர் என்று கூறிவிட முடியுமா என்று கேட்டபோது, அரங்கத்திலும் வெளியிலும் சிரிப்பு. அவர் காபினெட் மந்திரி ஆவாரா என்பதற்கு மன்மோஹன் சிங்காலேயே கூட பதிலளிக்க இயலாது. பாவம் அவர். யாராவது கனிமொழி மந்திரியாவார் என்றால் சரி என்று சொல்லிவிட்டு போகிறார். ரொம்ப நல்லவர் அவர் என்று கூறும்போது சிரிப்பலைகள். மோடிக்கு அமெரிக்க விசா தராததால் இழப்பு அமெரிக்காவுக்குத்தானே தவிர மோடிக்கு அல்ல என்று கூறியபோது ஒரே கரகோஷம். இந்த விசா மறுப்பு நம்மவராலேயே பொய் பிரசாரத்தால் வந்தது என்றும் தெளிவுபடுத்தினார். பாஜக தன்னை முன்னுறுத்தி கொள்ள இயலும், ஆனால் அதற்காக நிறைய உழைக்க வேண்டியிருக்கும். அதை இப்போதிலிருந்தே செய்தல் நலம். மற்ற பத்திரிகையாளர்களை அழைப்பது பற்றிய கேள்விக்கு தான் ஏற்கனவே அக்பர், அருண் ஷூரி ஆகியவர்களை அழைத்திருப்பதை நினைவுபடுத்தினார். உள்ளூர் பத்திரிகை ஆசிரியர்களுக்கு தர்மசங்கடமான நிலைதர வேண்டாம் என்பதாலேயே அவர்களை அழைப்பதிலை என்றும் கூறினார்.

பிறகு தசரதன் என்னும் வாசகர் பேசினார். அவரது கேள்விகள்: கூட்டணிக்குள் பாமகவின் செயல்பாடு, மோடி அரசை போல பல நல்ல திட்டங்களை கொண்டு வந்தாலும் சந்திரபாபு நாயுசடு அரசு ஏன் வெற்றி பெறவில்லை, நந்திக்ராமால் ஏதேனும் விளைவுகள் உண்டா, ஸ்ரீலங்காவின் தற்போதைய நிலை ஆகியவற்றை பற்றி கேட்டார். சோ அவர்களது பதில் சுருக்கமாக. ஜெயலலிதா அவர்கள் எடுத்து கொள்ளும் விஷயங்கள் வெறுமனே வார்டுகள் பிரச்சினைகளாக உள்ளன. மயிலை சித்திரக்குளம் பகுதி போன்ற இடங்களை பற்றி மட்டும் பேசுகிறார். அதனால் சித்திரகுளம் ஓட்டுகள் கிடைக்கலாம் அவ்வளவே. ஆனால் ராமதாசோ எல்லாவற்றையும் பற்றி பேசுகிறார். ஆட்சியாளர்கள் முன்னே செல்லவும் முடியாது பின்னே செல்லும் வழியின்றியும் செயல்படுகிறார். இதுவும் ஓவரே. ஜெயலலிதா இதை நகல் செய்யும்படி ஒன்றும் இல்லை. ராமதாஸ் அவர்களது செயல்பாடு கூட இருந்து கழுத்தை அறுத்தலுக்கு ஒப்பானது. இதில் போற்றும்படி ஒன்றும் இல்லை. நாயுடு வெற்றியடையாததற்கு காரணம் அவரது அபிவிருத்தி திட்டங்கள் எல்லோரையும் போய் சேரவில்லை, ஆனால் மோடி அவர்களோ எல்லோருக்கும் முன்னேற்ற திட்டங்கள் தந்தார். இலங்கைக்கான தீர்வு சமஷ்டி முறை அரசே. தான் 1971-லேயே அங்கு ஒரு மீட்டிங்கில் இதைக்கூறி தனி ஈழம் வேண்டாம் என்று கூறியதாகவும் அப்போது கோபப்பட்ட ஒருவர் (அந்த மீட்டிங்கை ஏற்பாடு செய்தவர்) சில ஆண்டுகள் கழித்து அவரிடம் வந்து தானும் இப்போது அதை உணருவதாகவும் கூறியதை சோ அவர்கள் எடுத்துரைத்தார். யாழ் நகரை சுடுகாட்டாக ஆக்கிவிட்டனர். ச்ர்லங்கா அரசு சரியாகச் செயல்படவில்லை. ராஜீவ் ஜெயவர்தனே ஒப்பந்தம் செயல்பட்டிருந்தால் நல்லது நடந்திருக்கும், ஆனால் அப்படி நடந்தால் தங்களது முக்கியத்துவம் போய் விடும் என்று எண்ணி புலிகள் எல்லாவற்றையும் கெடுத்தனர் என்றும் சோ கூறினார்.

இப்போது பேச வந்த வாசகர் சுரேஷ்மபாபு. அவர் தொட்ட விஷயங்கள் நெல்லையில் நடந்த இளைஞரணி திருப்பு முனையா, தேவகௌடா விஷயம், மன்மோஹன் சிங் லாலு பிரசாத் யாதவ் ஒப்பிடுதல் ஆகியவை. சோ அவர்கள் லாலு அவர்களுடன் ஒப்பிடும் அளவுக்கு மன்மோஹன் சிங்கை தாழ்த்தக்கூடாது என்றார் (அரங்கத்தில் சிரிப்பு). திறமை வாய்ந்த மன்மோஹன் சிங் இப்போது வெத்துவேட்டாக ஆக்கப்பட்டு விட்டார். அது அவர் தவறல்ல. தேவகௌடா பயங்கர கேலிக்கூத்து. ஆனால் அதே சமயம் பாஜகவும் சரியாக செயல்படவில்லை. மாயாவதியிடம் ஏமாந்ததுமே சுதாரித்திருக்க வேண்டும். அல்லது முதலில் கௌடா அழுகுனி ஆட்டம் ஆடியபோதாவது சுதாரித்திருக்க வேண்டும். அவர்களது நல்ல நேரம் ஆட்சி அமைக்க இயலவில்லை, இல்லாவிடில் கௌடாவும் குமாரசாமியும் இன்னும் நாற அடித்திருப்பார்கள். பாஜகவுக்கு ஆதரவு கர்நாடகாவில் அதிகரித்துள்ளது. அதனாலேயே தேர்தல் கமிஷன் இப்போது தேர்தலை கொண்டு வராது என அவர் அபிப்பிராயப்பட்டார். தேர்தல் கமிஷன் தன்னிச்சையான அமைப்பு என்று கூறும்போது அரங்கத்தில் சிரிப்பு, கைதட்டல். நெல்லையில் என்ன திருப்புமுனை வேண்டியிருக்கிறது. எல்லாமே வட்டமாகத்தான் செயல்படுகிறது. இதில் ஏது திருப்புமுனை என்று தன் கையால் காற்றில் ஒரு சுழி செய்தார்.

வாசகர் எழிலரசு அடுத்து வந்தார். அவர் தொட்ட விஷயங்கள்: விஜயகாந்த் வாய்ப்பு, ஜெயலலிதாவுடன் கூட்டணி வாய்ப்பு, இளைஞர்களுக்காக சோ அவர்கள் ஒரு ஊக்கத்தொடர் எழுத வேண்டும். சோ அவர்களது பதில்கள்: விஜயகாந்த் தனியாக வெற்றி பெற இயலாது. பல இடங்களில் மூன்றாவதாக வரலாம், பல இடங்களில் டிபாசிட் போகலாம். திமுக மற்றும் அதிமுகவின் வெற்றி வாய்ப்பை தட்டி பறிக்கலாம். அதிமுக, பாஜக மற்றும் விஜயகாந்த் ஒரே கூட்டணியில் வந்தால் நல்ல வெற்றி வாய்ப்பு. ஆனால் அது உண்டாவதற்கான சாத்தியக்கூறுகள் கம்மி. விஜயகாந்த தனக்கு இருக்கும் ஆதரவை அதிகமாக மதிப்பிடுகிறார். தனக்கு வரும் கூட்டங்களைப் பார்த்து விஜயகாந்த் மலைக்கக் கூடாது என்றார். தனக்கும் 1971-ல் இதற்கு மேல் கூட்டம் வந்தது என்றும் ஆனால் பலன் ஏதும் இல்லை என்றும் கூறினார். நெல்லை ஜபமணிக்காக தான் பேசிய மீட்டிங்குகளில் கூட்டம் அதிகம், ஆனால் ஜபமணி தோற்றார் என்றும் கூறினார். ஊக்கத் தொடர் பற்றி அவர் சொன்னது என் காதில் விழவில்லை.

இப்போது பேசியது சுவாமிநாதன் என்னும் வாசகர். அவர் கேட்ட கேள்விகள் வாஜ்பேயிக்கு பாரதரத்னா அளிப்பது, வரும் மாநில சட்டசபை தேர்தல்களில் பாஜகவின் வாய்ப்பு ஆகியவை பற்றியது. பாரதரத்னா கோரிக்கை நியாயமானது, ஆனால் கேட்ட முறை சரியில்லை. இப்போது எல்லோருக்குமே கேட்க ஆரம்பித்து விட்டனர். விட்டால் தேவகௌடாவுக்கும் கேட்பார்கள் என்றபோது ஒரே சிரிப்பு, கைதட்டல். ஆனால் இம்மாதிரி விருதுகளுக்கு பொருள் ஒன்றும் இல்லை. தானும் விருது அளிக்கும் கமிட்டியில் உறுப்பினராக இருந்ததாகவும், விசாரித்தபோது இதனால் பிரயோசனம் ஏதும் இல்லையென்றும், ரயில் ரிசர்வேஷனில் கூட முன்னுரிமை கிடைக்காதென்றும் கூறினார். குடியரசுத் தலைவர் கையால் வாங்கிய பெருமை வேண்டுமானால் கிடைக்கும். போயும் போயும் வாஜ்பேயி அவர்கள் பிரதீபா பாட்டில் கையில் வாங்க வேண்டுமா என்று கேட்டு நிறுத்தியதும் மீண்டும் அவுட் சிரிப்பு எழுந்தது. ஒரு நிமிடம் நிறுத்திவிட்டு, எங்கேயிருந்துதான் இந்த அம்மையாரை தேடி பிடித்தார்களோ என்று அங்கலாய்த்தார் சோ. பேசாமல் கான்ஷிராமுக்கு பாரத்ரத்னா கொடுக்கலாம், அவர் உயிருடன் இல்லாததால் அவருக்கு தனிப்பட்ட முறையில் கேவலம் வந்துவிடப்போவதில்லை. பிறகு பாஜகாவுக்கு ஆதரவு மாநிலங்களை பட்டியலிட்டார் அவர். முக்கியமாக பல மாநிலங்களில் பாஜக நல்ல கூட்டணிகளை தேட வேண்டும் என்றும் கூறினார். நரேந்திர மோடி அவர்களுக்கு இசுலாமியரும் வோட்டளித்தனர். சிறுபான்மையினர் சாதாரணமாக வெற்றி பெறும் கட்சிக்கே ஓட்டளிப்பார்கள். அவர்களுக்கு பாதுகாப்பு முக்கியம். இதை மனதில் பாஜக வைக்க வேண்டும். பார்ப்பனர்களை பற்றிப் பேசும்போது கலைஞர் அவர்கள் சிறுபான்மையினர் அடக்கத்துடன் நடந்து கொள்ள வேண்டும் என்கிறார் அதுவே இசுலாமியர்கள் விஷயத்தில் பிளேட்டையே மாற்றுகிறார் என்றதும் அரங்கத்தில் சிரிப்பு. அது அவரது வழமையான இரட்டை நிலை என்று முத்தாய்ப்பாஜகக் கூறியதும் கைதட்டல்.

அடுத்து பேசியது ஜி. நடராஜன் என்னும் வாசகர். அவர் கேட்ட கேள்விகள் இந்தியா சீனா உறவு, நேப்பாள் நிகழ்ச்சிகள் ஆகியவற்றைத் தொட்டன. சோ அதற்கு கூறியது: சீனா எப்போதுமே நம்பத்தகுந்ததல்ல. நேப்பாளிலோ மாவோயிஸ்டுகள் என்ன செய்தாலும் அதற்கு எதிராகப் போவதே நலம். இங்கு பூனை, எலி, வேடன் கதையைக் கூறினார். சோ அவர்கள் எழுதிய மகாபாரதத்தில் அது வருகிறது.

கடைசியாகப் பேசிய வாசகர் கோவிந்தராஜுலு. அவர் கேட்டது இலவச டிவி பற்றியது. அதில் தவறே இல்லை என்றும் டிவி நல்ல விலைக்கு விற்று பணம் பண்ணலாம் என்று சோ சிரிக்காமல் கூற அரங்கில் ஒரே சிரிப்பு. இரண்டு ஏக்கர் நிலம் என்பது கையளவு நிலம் ஆகிவிட்ட நிலையில் அரசு டிவியைத்தான் நம்ப வேண்டியுள்ளது.

பிறகு சோ அவர்கள் பேசினார்.

அது அடுத்த பதிவில்.

அன்புடன்,
டோண்டு ராகவன்