சுஜாதாவின் பத்துக் கட்டளைகள்… (கண்டிப்பாக படிக்கவும் !!!) என மின்னஞ்சல் அனுப்பியுள்ளான் என கணினி குரு முகுந்தன். பலருக்கு (முக்கியமாக இளைய சமுதாயத்துக்கு இவற்றில் பல புத்தாண்டுக்கான புது தீர்மானங்களாகக் கூட இருக்கலாம்.
1. ஒன்றின் மேல் நம்பிக்கை வேண்டும், ஏதாவது ஒன்று. உதாரணம் கடவுள்,
இயற்கை, உழைப்பு, வெற்றி இப்படி எதாவது… நம்பிக்கை நங்கூரம் போல. கேள்வி
கேட்காத நம்பிக்கை. கேள்வி கேட்பது சிலவேளை இம்சை. நவீன விஞ்ஞானம்
அதிகப்படியாகக் கேள்வி கேட்டு இப்போது தவித்துக் கொண்டிருக்கிறது.
2. அப்பா, அம்மா இரண்டு பேரும் வேலை சொல்வது பல சமயங்களில் கடுப்பாக
இருக்கும். ஒருமாறுதலுக்கு அவர்கள் சொல்வதைச் செய்து பாருங்கள். அவர்கள்
கேட்பது உங்களால் செய்யக் கூடியதாகவே இருக்கும். பொடிநடையாகப் போய் நூறு
கிராம் காப்பி பவுடர் (அ) ரேஷன் கார்டு புதுப்பித்தல் இப்படிதான்
இருக்கும்.
3. மூன்று மணிக்குத் துவங்கும் மாட்டனி போகாதீர்கள். க்ளாஸ் கட்பண்ண
வேண்டி வரும். தலைவலி வரும். காசு விரயம். வீட்டுக்குப் போனதும் பொய்
சொல்வதற்கு ரொம்ப ஞாபக சக்தி வேண்டும். இந்த உபத்திரத்துக்கு உண்மையைச்
சொல்லிவிடுவது சுலபம். இளமைக்காலம், ஒளிக் கீற்றைப் போல் மிகவும் குறைந்த
காலம், அதை க்யூ வரிசைகளிலும் குறைபட்ட தலைவர்களுக்காகவும் விரயம்
செய்யாதீர்கள்.
4. நான்கு பக்கமாவது ஒரு நாளைக்குப் பொது விஷயங்களைப் படியுங்கள். பொது
விஷயங்கள் என்றால் கதை, சினிமா, காதல் இல்லாதவை. உதாரணம் – யோக்கியமான
செய்தித்தாள், மற்ற பேரைப் பற்றிக் கவலைப்படும் பத்திரிகைகள் அல்லது
லைப்ரரியிருந்து ஒரு புத்தகம்.
5. ஐந்து ரூபாய் சம்பாதித்துப் பாருங்கள். சொந்தமாக உங்கள் உழைப்பில்,
முயற்சியில், யோக்கியமாக, மனச்சாட்சி உறுத்தாமல். அடுத்த முறை அப்பாவிடம்
ஆயிரம் ரூபாய்க்கு ஷர்ட், சுடிதார் கேட்கும் முன்.
6. இந்தச் தகவல்களை
படிக்கும் நிலைமை பெற்ற நீங்கள் இந்திய சனத்தொகையின் மேல்தட்டு ஆறு சதவிகித
மக்களில் ஒருவர். அன்றாடம் சோற்றுக்காக அலையும், வசதியில்லாத
கோடிக்கணக்கான மக்களைத் தினம் ஒரு முறை எண்ணிப் பாருங்கள்.
7. வாரத்தின் ஏழாவது தினமான ஞாயிறன்று என்ன செய்தாலும் காதல் பிஸினஸ்
வேண்டாம். காதலுக்கு ரொம்பச் செலவாகும். மனம், வாக்கு, காயம்(உடல்),
எல்லாவற்றையும் ஆக்கிரமிக்கும் தீ அது. பொய் நிறையச் சொல்ல வேண்டும்.
வினோதமான இடங்களில் காத்திருக்க வேண்டும். இந்த வயதில் நாசமாய்ப்போன
படிப்புத்தான் உங்களுக்கு முக்கியம்.குறிப்பு: பெண்களை சைட் அடிப்பதும்,
கலாட்டா பண்ணுவதும், அவர்களுக்கு கர்சீப் முதலியன ரோடிலிருந்து பொறுக்கிக்
கொடுப்பதும், உபத்திரமில்லாத கவிதைகள் எழுதுவதும், காதலோடு சேர்த்தியில்லை.
8.எட்டு முறை மைதானத்தை சுற்றி ஓடினால் எந்தச் சீதோஷ்ணமாக இருந்தாலும்
நெற்றி வியர்வை அரும்பும். எதாவது தேகப் பயிற்சி செய்யவும்.
கடிகாரத்துக்குச் சாவி கொடுப்பதோ சீட்டாடுவதோ தேகப் பயிற்சி ஆகாது.
எதையாவது தூக்குங்கள், எதையாவது வீசி எறியுங்கள். உங்கள் உடலில் ஊறும்
உற்சாகத்துக்கு ஓர் ஆரோக்கியமான வடிகால் தேவை. ராத்திரி சரியாக தூக்கம்
வரும். கன்னா பின்னா எண்ணங்கள் தவிர்க்கப்படும். ஒழுங்காக
சாப்பிடத்தோன்றும். பொதுவாகவே சந்தோஷமாக இருக்கும்.
9. ஒன்பது மணிக்குள் வீட்டுக்கு வரவும். மிஞ்சிப் போனால் ஒன்பது மணி
இரண்டு நிமிடம். ஒரு மணி நேரம் பாடம் அல்லது புத்தகம் படிக்கலாம்.
10.
படுக்கப் போகும் முன் பத்து நிமிஷமாவது அம்மா, அப்பா, அண்ணன், தங்கை
யாருடனாவது பேசவும் (பேசுவது என்று சொன்னவுடன் காதலியுடன் என்று நினைக்க
வேண்டாம், நான் சொன்னது குடும்பத்தினருடன் மட்டும்). எதாவது ஒரு அறுவை ஜோக்
அல்லது காலேஜில் நடந்த நிகழ்வுகள். சப்ஜெக்ட் முக்கியமில்லை. பேசுவது
தான்.
இந்த பத்தில் தினம் ஒன்று என்று முயற்சி செய்து தான் பாருங்களேன்.
அன்புடன்,
டோண்டு ராகவன்
வரலாறு,கனவு, கொற்றவை, கீழடி
-
கொற்றவை மின்னூல் வாங்க கொற்றவை வாங்க அன்புள்ள ஜெ கொற்றவை நாவலை நான்
இன்றுதான் வாசித்து முடித்தேன். 2017 ல் மதுரை புத்தகக் கண்காட்சியில் வாங்கிய
நூல்.எட்டு ...
6 hours ago
4 comments:
சரியான செலவில்லாத அருமையான ஆலோசனை
கடை]பிடித்தால் நிம்மதி நிச்சயம் எனத் தெரிகிறது
பதிவாக்கித் தந்தமைக்கு மனமார்ந்த நன்றி
இனிய புத்தாண்டு நல் வாழ்த்துக்கள்
// நவீன விஞ்ஞானம் அதிகப்படியாகக் கேள்வி கேட்டு இப்போது தவித்துக் கொண்டிருக்கிறது.//
விஞ்ஞானம் சொல்வதெல்லாம் முடிவல்ல. இப்பொழுதைக்கு சரி என்று தான் ஒவ்வொரு கண்டு பிடிப்பும்பொழுதும்
விஞ்ஞானமும் சொல்கிறது.
கண்டு பிடித்தோம் invented என்று எதைச் சொல்கிறார்களோ அதையே உண்மையான விஞ்ஞானி தான்
அதை டிஸ்கவர்டு என்று தான் அதாவது ஒரு உண்மை இதுவரை தெரியாதது இப்பொழுது தெரிந்திருக்கிறது
' எனச்சொல்கிறார்.
ஃஃபைனாலிடி என்று எதுவுமே இல்லை.
அதே போல துவக்கம் எங்கிருந்து யாரிடமிருந்து, ஏன் என்பதிலும் இன்னமும் விஞ்ஞானம் ஒப்புக்கொண்ட ஒரு முடிவான எல்லோரும் ஒப்புக்கொள்ளக்கூடிய நிருபணம் இல்லை. பல்வேறு சாத்தியக்கூறுகளைத் தான் விவாதிக்கிறார்கள்.
இன்னொரு கோணத்தில், சிலவற்றை நாம் கேள்வி கேட்காமல் ஒப்புக்கொள்வது தான் வாழ்க்கையில் நிம்மதியாக இருக்கவும் உதவும். அந்த சில என்னென்ன என்பது ஆளுக்காள் மாறுபடும் என்பதும் உண்மை.இனிய புத்தாண்டு நல் வாழ்த்துக்கள்
i hope u r fine.
சுப்பு தாத்தா.
இது ஏற்கனவே படித்தது என்றாலும் எத்தனை முறை படித்தாலும் சுவை தரும் ..அருமையான நடைமுறைக்கு எளிதான அறிவுரை இது
புத்தாண்டு வாழ்த்துகள். நலம். நலமே விளைக!!
Post a Comment