டோண்டு பதில்கள் 10.10.2008

மோகன்:
1. வலைப்பதிவு உலகின் பிரபல பதிவர்கள் (பிராமணர்களை, பிராமணீயத்தை இகழ்ந்து எழுதுபவர்கள்), பிராமணப் பெண்களைத் திருமணம் செய்து வருவது பற்றி உங்கள் கருத்து என்ன?
பதில்: அதனால் என்ன? சம்பந்தப்பட்ட பிராம்மண பெண்களும் விரும்பித்தான் மணம் புரிகின்றனர். “கில்லி” பிரகாஷ்ராஜ் மாதிரி வலுக்கட்டாயமாகவா பெண்ணின் விருப்பத்துக்கு மாறாக முயற்சி செய்கின்றனர்? எனக்கு தெரிந்த பதிவர் (கவுண்டர் வகுப்பை சேர்ந்தவர்) தலித் பெண்ணை மணக்க அவர் அன்னையால் புறக்கணிக்கப்பட்டவர். அதே அன்னை இப்பதிவர் பார்ப்பன பெண்ணை மணந்திருந்தால் ஆட்சேபம் தெரிவித்திருக்க மாட்டார் என்பதை அவரே என்னிடம் ஒத்து கொண்டார். பிராமணர்களை இகழ்பவர்களில் முக்கால்வாசி பேருக்கு ஒருவித தாழ்வுமனப்பான்மைதான் காரணம். மேலும் தாங்கள் செய்யும் வன்கொடுமைகளை மறைக்க அவர்கள் திட்டுவதற்கு ஒரு குழுவினர் தேவை.

நாமக்கல் சிபி:
1. ஆன்மீகம் Vs அரசியல் : எந்த அளவுக்கு பிணைந்து இருக்கிறது? அல்லது முரண்பட்டு செல்கிறது? (இந்தியாவில்)
பதில்: ஆன்மீகம் என்று நீங்கள் எதைக் கூறுகிறீர்கள்? மதமா? அப்படியானால் உலகில் அனேக நாடுகளில் அதுதானே நடக்கிறது? பல நாடுகளில் அது அதிகார பூர்வமாகவே நிகழ்கிறது. மதத்தையும் ஆட்சியையும் பிரிப்பது ஒப்பீட்டளவில் சமீபத்திய போக்குத்தான். 1900-ஆம் ஆண்டு ஃபிரான்ஸில் அவை இரண்டும் தனித்தனியே பிரிக்கப்பட்டபோது, உலகமே தலைகீழாகி விடும் என மத ஆதரவாளர்களால் அஞ்சப்பட்டது. இப்போதும் மதமும் ஆட்சியும் சேர்த்தே பார்க்கப்டும் நாடுகள் அனேகம். உதாரணங்கள் அரபு நாடுகள், இந்தோனீஷியா, மலேசியா, பாகிஸ்தான், ஸ்ரீலங்கா ஆகியவை. இப்போது இந்தியாவுக்கு வருவோம். இது மதசார்பற்ற நாடு என பிரகடனப்படுத்தப்பட்டது. இருப்பினும் பெரும்பான்மையர் இந்துக்களே. ஆகவே அம்மதம் கூறிய பல விஷயங்கள் இன்னமும் ஆட்சியாளர்களால் பின்பற்றப்படுகின்றன. அரசு விழாக்களையே எடுத்து கொள்ளுங்கள் இன்னமும் நல்ல நேரம் பார்த்துத்தானே ஆரம்பிக்கிறார்கள்?

ஆர். தேவராஜன்:
1. நற்றமிழ்' என்றால் என்ன?
பதில்: கட்டற்ற கலைக்களஞ்சியமான விக்கிபீடியாவில் இருந்து:
“இயன்றவரை நல்ல தமிழ்ச் சொற்களைப் பயன்படுத்தி, நடைமுறை வழக்கங்களையும் உள்வாங்கி, வெளிப்படுத்தி எளிமையாக எழுதப்படும் பேசப்படும் தமிழ்மொழியை நற்றமிழ் அல்லது நல்லதமிழ் எனலாம். நல்லதமிழும் தனித்தமிழ் போன்று இயன்றவரை தமிழ் வேர்ச்சொற்களில் இருந்து ஆக்கப்படும் சொற்களே தமிழ்மொழிக்கு வளம் சேர்க்கும் என்ற கருத்துடையது. ஆனால், சில குறிப்பிடத்தக்க விதிவிலக்குகளை கொண்டது. அனைத்துலக அறிவியல் சொற்கள் (எ.கா உயிரினங்களை வகைப்படுத்தலுக்கு பயன்படும் சொற்கள்), அனைத்துலக கணித இலக்கங்கள், ஆங்கில மாதங்கள் போன்ற பரவலான பயன்பாட்டில் இருக்கும் வழக்கங்களை ஏற்றுக்கொள்கின்றது. தனித்தமிழ் இலக்கை நோக்கியும், களங்கப்பட்ட தமிழைத் தவிர்த்தும் எடுக்கப்படும் ஒர் இடைப்பட்ட நிலையே நல்லதமிழ் எனலாம்”.
களங்கப்பட்ட தம்ழுக்கு உதாரணம் தொலைகாட்சிகளில் தங்கிலீஷ் பேசும் நிகழ்ச்சி தொகுப்பாளினிகள். நற்றமிழுக்கு உதாரணம் மானுடம் தழுவிய ஆழ்வார்கள், நாயன்மார்கள். காலம் சென்ற தமிழ்க்குடிமகன் ஆங்கிலத்தில் புலமை பெற்றிருந்தாலும் வேறு மொழி சொற்கள் கலக்காது தூய தமிழில் பேச வல்லவர்.


வஜ்ரா:
1. 5 ஆண்டுகள் முன் தமிழகம் கேரளத்திற்கு மின்சாரம் விற்றார்களாமே? தமிழகத்தில் அறிவிக்கப்பட்ட மற்றும் அறிவிக்கப்படாத மின் வெட்டுகள் மின்வாரியம் செய்ய என்ன தான் காரணம்? மின் வாரியம் தன் பணியைச் சரியாகச் செய்யாததால் மின்துறை ஊழியர்கள் அமைச்சர் முதல் பியூன் வரை அனைவருக்கும் ஒரு மாத சம்பளம் கட் செய்தால் என்ன?
அதென்ன 5 ஆண்டுகளுக்கு முன்னால் என்னும் கணக்கு? தமிழகம் எப்போதுமே தொட்டுக்கோ தொடச்சிக்கோ என்னும் நிலையில்தான் மின்சாரம் பொருத்தவரை இருந்து வந்துள்ளது. அதே நேரம் மின்சாரம் கட்சி மகாநாடுகளுக்காக தாறுமாறாக திருடப்பட்டு வருகிறது. அரசியல் பலம் வாய்ந்தவர்கள் தமது வீடுகளுக்காக திருடும் மின்சாரம் அளவற்றது. ஆனால் நீங்கள் சொல்வதுபோல ஒட்டுமொத்தமாக தண்டனை எல்லாம் தர இயலாது. குஜராத்திலும் இதே நிலைதான் மோதி ஆட்சிக்கு வரும்வரை இருந்தது. இப்போது பலவகை மிந்திருட்டுக்களை தயவு தாட்சண்யம் இன்றி ஒடுக்கியுள்ளார். அதற்கு மிகவும் தேவைப்பட்டது அரசியல் தைரியம்.


மீண்டும் அடுத்த வாரம் சந்திப்போமா?

அன்புடன்,
டோண்டு ராகவன்