ஜொள்ளு விடறவன் முட்டாள்னு சொல்ல ஒரு தனி ஆராய்ச்சி தேவையா டோமரு?

இதைத் தெரியாதவங்க யாராவது இருக்காங்க? ஆனாக்க அதுக்கு போய் மெனக்கெட்டு ஆராய்ச்சி பண்ணியிருக்காங்களே.

நண்பர் சந்திரசேகர் எனக்கு அனுப்பித்த இந்த மின்னஞ்சலில் Pat Hagan என்பவர் Telegraph, UK-ல் எழுதிய கட்டுரையை என் கவனத்துக்கு கொண்டு வந்தார். அது சம்பந்தமாக எனது ஆங்கில வலைப்பூவில் இந்த இடுகை இட்டுள்ளேன்.

எவ்ளோ புத்திசாலியா இருந்தா என்ன, அம்சமா ஒரு ஃபிகர் வந்து புன்னகை செஞ்சாலே ஃப்ளாட் ஆயிடறாங்களே. இது லோகத்துக்கே தெரிஞ்ச விஷயம்தானே. இருந்தாலும் இதையும் நிரூபிக்க ஒரு ஆய்வு நடத்தியிருக்காங்கப்பு. அது பத்தித்தான் இப்பதிவில் பார்க்கப் போறோம்.

இந்த ஆய்வில் என்ன செஞ்சாங்க? மூளையை உபயோகித்து ஸ்கோர் செய்ய வேண்டிய சோதனை ஒண்ணை தேர்ந்தெடுத்தாங்க. முதலில் ஆண்கள் எல்லாம் டெஸ்ட் கேள்விகளுக்கு மடமடன்னு பதில் கொடுத்தாங்க. அதே ஆண்கள் ஒவ்வொருவரையும் ஒவ்வொரு அழகான பெண்ணுடன் பேச விட்டாங்க. பிறகு மறுபடியும் டெஸ்ட் பண்ணாக்க அவனவன் சிங்கியடிக்கிறான். முந்தைய ஸ்கோர் வரவேயில்லையாம். ஆக ஜொள்ளு விட்டாக்க வேலையில் காலியாங்கற கேள்விக்கு ஆமாம் அப்படித்தான்னு விடை கிடைத்த் விட்டது.

இந்த ஆய்வை நடத்திய ஆய்வாளர்கள் அதன் ரிசல்டுகளை Journal of Experimental and Social Psychology-யில் பதித்துள்ளனர். அவர்களது துணிபு என்னவென்றால், அழகான ஃபிகர்களை மடக்கும் நோக்கத்துடன் புத்தியை அதிகம் செலவழித்ததாலேயே ஆய்வில் பங்கு கொண்ட ஆண்கள் பின்னால் டெஸ்டில் பிளாங்கி அடித்தனர் என்பதேயாகும்.

கோஎஜுகேஷன் ஸ்கூல்களில் பரீட்சையில் கோட்டைவிட்டப் பசங்கள் முக்கால்வாசி நேரம் இந்த ஜொள்ளு விஷயத்தால்தான் கெட்டார்கள். வேலை செய்யும் இடங்களில் கூட சூதனமாக பெண்டுகள் பின்னால் போகாமல் இருங்கடா டோமருங்களா என சொல்லாமல் சொல்கிறார்கள் இந்த ஆய்வை நடத்தியவர்கள். அதே சமயம் அழகான ஆண்களுடன் பழகும் பெண்களுக்கெல்லாம் அம்மாதிரி நிகழ்வதில்லையாம்.

ஏன் இப்படி என்கிற கேள்விக்கு அளிக்கப்பட்ட விஞ்ஞானபூர்வமான விளக்கங்களை சுருக்கமாகச் சொல்ல வேண்டுமானால் ஃபிகர்களை மடக்குவது ஆண்களுக்கு கடினமாக இருக்கிறதாம். அதே சமயம் பெண்கள் தங்களுடன் உறவு கொள்ள ஆண்களை சுலபமாக அழைக்கவியலுமாம். இதுக்காக விசேஷமாக முயற்சிகள் எதுவும் தேவையில்லையாம். வெறுமனே செக்ஸியாக ஒரு லுக் விட்டு, லேசாக உடலுடன் உராசினாலே வெற்றிதானாம். ஆனால் ஒன்று. பின்னால் வரும் விளைவுகளையும் கவனிக்க வேண்டியிருக்கும். ஒரு முறை உசுப்பப்பட்ட ஆண் சட்டென பின்வாங்க மாட்டான். ஆகவே தமாஷுக்காகவெல்லாம் இதைச் செய்யலாகாது என்பதை ஒரு புத்திசாலிப் பெண் உணர்ந்தே இருப்பாள். எது எப்படியானாலும் பிள்ளை பெறப்போவது அவள்தானே. அவதியும் அவளுக்குத்தானே.

இந்த ஆய்வில் ஒரு குறிப்பிட்ட ஆண் டெஸ்டுக்கு பிறகு தன் விலாசத்தைக்கூட சிறிது நேரத்துக்கு மறந்தானாம். எல்லாம் நேரந்தேன். அப்படியா ஒருவன் தன் சக்தியை இம்மாதிரி வீணாக்குவான்?

British Psychological Society-யை சேர்ந்த மனோதத்துவ நிபுணர் Dr. George Fieldman கூறுவது என்னவென்றால் ஆண் எப்போதுமே தனது ஜீன்களை பரப்புவதிலேயே குறியாக இருப்பான் என்பதே. அதனால்தான் அழகிய ஃபிகர்களிடம் அசடு வழிவது எல்லாம் நடக்கிறது.

ஆனால் பெண்ணோ மேலதிக விஷயங்களையும் பார்க்கிறாள். ஆணின் செல்வம், இளமை, நல்ல குணம் எல்லாமே அவளது தெரிவில் காரணிகளே.

அதாகப்பட்டது பெண் புத்தியுடன் செயல்படுகிறாள். ஆணுக்கு அவ்வளவு போதாது. அதாவது பெண்புத்தி முன்புத்தி இந்த விஷயத்தில்.

அன்புடன்,
டோண்டு ராகவன்