டோண்டு பதில்கள் - 02.04.2009

சேதுராமன்:
1. இளைஞர்கள் அரசியலுக்கு வரவேண்டும் என்ற ஆசை நல்லது தான் - வருண் மாதிரி வரும்போதே சூறாவளியாக வந்து தான் கெட்டதுமல்லாமல், கட்சிக்கும் கெட்ட பெயர் சேர்க்க வேண்டுமா?
பதில்: போன வாரமே நான் ஏற்கனவேயே கூறியபடி நாவடக்கமும் மிகவும் தேவை அரசியல்வாதிக்கு. யாகாவாராயினும் நாகாக்க என்பதை முக்கியமாக அவர்கள் மறக்கக் கூடாது. வருண் காந்தி இதை அறிவது முக்கியம். அதுவும் காங்கிரஸ் சார்பு செயல்பாட்டை உடைய தேர்தல் கமிஷன் இம்மாதிரி தருணத்துக்காகவே காத்திருக்கிறது என்பதையும் அவர் மறக்கக்கூடாது. இதற்கென்றே பேச்சை எழுதித் தருபவர்களது துணையை நாடியிருக்க வேண்டும்.

2. கிழங்களுக்கெல்லாம் இன்னம் அரசியல் ஆசை போகவில்லை போலிருக்கிறதே? ஜார்ஜ் ஃபெர்னாண்டஸ், ஷெகாவத், இன்னமும் போட்டியிட ஆசைப் படுகிறார்களே - இது தேவைதானா? இன்னொன்று நேரு குடும்பத்தினருக்கு தாசானுதாசனாய் என் வாழ் நாள் பூராவும் உழைத்தேனே என்று புலம்புகிறாரே?
பதில்: அரசியலில் யாரும் யாருக்காகவும் விட்டுத் தரவெல்லாம் மாட்டார்கள். ஏன் அதை எதிர்ப்பார்க்க வேண்டும்?

3. ஐக்கிய முன்னணிக்குள்ளேயே புரசல் வந்திருக்கிறதே - ஷரத்பவார் பிரதமர் பதவிக்குப் போட்டி போடுவாரா? இவர் பிரதமராக வருவது நல்லதா?
பதில்: எல்லா அணிகளிலும் குழப்பம்தான். சான்ஸ் கிடைத்தால் ஷரத் பவார் என்ன, வேறு எந்த அரசியல் வாதியுமே போட்டியிடுவார். அதனால் நாட்டுக்கு நல்லது வருமா என்பது அவரது செயல்பாட்டை பொறுத்ததே.

4. தமிழ் நாட்டிலும், கூட்டணிகள் இன்னமும் பேரம் பேசுவதிலேயே இருக்கின்றனரே - விட்டுக்கொடுக்கும் மனப்பான்மையே இல்லை போலிருக்கிறதே?
பதில்: விட்டுக்கொடுப்பதா? சரியாப் போச்சு போங்க. யாரேனும் விட்டுக் கொடுப்பதுபோல வெறுமனே மயிரிழை சந்தேகம் வந்தாலும் போச்சு. சம்பந்தப்பட்ட கட்சிக்கு பட்டை நாமம் சாத்தி விடுவார்கள். சீட் தராமல் வெறுமனே இதயத்தில் இடம் தந்து விடுவார்கள்.

5. சஞ்சய்தத் போட்டியிடக்கூடாதென்று, உச்ச நீதிமன்றம் தீர்ப்பளித்தது உங்கள் கருத்து?
பதில்: சரியான தீர்ப்புதான். அது சரி ஒரு சிறு சந்தேகம். பை சான்ஸ் தண்டனையை கோர்ட் நிறுத்திவைத்தால் அவர் போட்டியிட வந்தால் அவரை வேட்பாளராக நிறுத்தும் கட்சிக்கு தேர்தல் கமிஷன் ஏதேனும் அறிவுரை தருமா? அல்லது அதெல்லாம் வருண் காந்திக்கு மட்டுமே செல்லுமா?


மீண்டும் அடுத்த வாரம் சந்திப்போமா?


அன்புடன்,
டோண்டு ராகவன்