நங்கநல்லூர் பஞ்சாமிர்தம் - 10.10.2009

திருக்குறள் காவ்யா
திருக்குறளின் வாரிசாக திருக்குறள் காவ்யா என்னும் சுட்டிப் பெண்ணின் சாதனை பற்றி படித்ததில் மிக்க மகிழ்ச்சி. அப்பதிவில் கூறியபடி,
“திருவள்ளுவர் தவமாய் தவமிருந்து எழுதிய அனைத்தையும் அக்குவேறு ஆணிவேறாக அலசி ந‌ம்மை மூக்கில் விர‌ல்வைக்க‌ வைக்கிறார், இவர். பார்வையாள‌ர்க‌ள் ப‌குதியிலிருந்து இந்த‌க் குற‌ள் வ‌ருவ‌து எந்த அதிகார‌த்தில்? குற‌ள் எண் 412 எப்ப‌டி துவ‌ங்குகிற‌து? "இக‌லின் மிக‌லினி" என்று துவ‌ங்கும் குற‌ள் எந்த‌ அதிகார‌த்தில் வ‌ருகிற‌து? அத‌ன் குற‌ள் எண் என்ன? "முய‌ங்க‌ப்பெறின்" என்று முடியும் குற‌ள் எத்த‌னையாவ‌து குற‌ள்?.....இப்ப‌டிப் ப‌ட‌ப‌ட‌வென‌ பார்வையாள‌ர்க‌ள் வினாக்க‌ளை விசிறிய‌டித்து வாய் மூடும் முன் வாய் திற‌க்கிறார் மிகச்ச‌ரியான‌ விடையுட‌ன்!

திருவள்ளுவர் இன்றைக்கு இருந்தால் இவரையே தன் வாரிசாக அறிவித்திருப்பார்.
யாரிந்த‌ப் பெரும்புல‌வ‌ர் என்று உங்க‌ள் புருவ‌ம் ச‌ற்றே விரிகிற‌தா? ஒரு சிறுமி என்றால் வியந்து விரியாம‌ல் என்ன‌ செய்யும்? இன்னும் இதில் விய‌ப்பு என்ன‌வென்றால், தாய்த் த‌மிழ‌க‌த்தில் அன்றாடம் தமிழ் பேசி வளர்ந்த சிறுமியல்ல;தும்மினால் ஆங்கிலம்; இருமினால் ஆங்கிலம் என்ற அமெரிக்க மண்ணில் வளர்ந்த சிறுமி என்பது தெரிந்தால் பெருவியப்பே ஏற்படும் அல்லவா?
சிகாகோ தமிழ் பள்ளிகள் இணைந்து நடத்திய‌ விழாவில் அசைந்தாடி மேடையேறிய அந்தச் சின்னஞ்சிறு சிறுமி,"தன் நினைவிலூறிய‌ திருக்குறள்களைப் பாடலாகப் பாடி, தனக்கு பிடித்த குறள்களைக் கூறி, அதன் அதிகாரங்கள் கூறி, கூடி இருந்தவர்களைக் கவர்ந்தார்”.

சாதனை செய்ய என ஒருவர் வந்தால் அவரை சோதனை செய்ய ஆட்களுக்கு பஞ்சமில்லைதானே. அந்த சோதனைகளையும் வெற்றி கொண்டு அனைவரின் மனத்தையும் கவர்ந்துள்ளாள் இந்த சுட்டிப்பெண். மேல் விவரங்களுக்கு ரிச்மண்ட் தமிழ் சங்கம் வலைப்பூவின் அப்பதிவைப் பார்க்கவும். தமிழுக்கு அணி சேர்க்கும் இந்த சாதனைப் பெண் மேல்மேலும் முன்னேற்றம் பெற என் உள்ளங்கவர் கள்வன் என் அப்பன் தென்திருப்பேரை மகரநெடுங்குழைகாதனை வேண்டுகிறேன்.

ஜ்யோவ்ராம் சுந்தர் தாக்கப்பட்ட விவகாரம்
இந்த நிகழ்வை பற்றி படித்ததிலிருந்து கலக்கமாக உள்ளது. சம்பந்தப்பட்ட இருவருமே எனக்கு தெரிந்தவர்கள். சில நாட்களுக்கு முன்னால் ரோசா வசந்த் நங்கநல்லூருக்கு வருகையில் என் வீட்டுக்கும் வந்திருந்தார். அடிப்படையில் நல்ல மனிதர் சில பெக்குகள் போட்டால் இவ்வாறு மாறிவிடுவது கவலைக்குரியது. ஜ்யோவ்ராம் சுந்தரோ குழந்தை மாதிரி. சிறுகதை பட்டறையில் நான் மதிய உணவுக்குப் பிறகு சென்று விட்டதை நோட் செய்து, ஏதேனும் மனவருத்தத்தில் அவ்வாறு செய்தேனா என அக்கறையாக எனக்கு மின்னஞ்சல் செய்து கேட்டவர்.

என்னதான் மனவேறுபாடு இருந்தாலும் அதை கைகலப்பாக மாற்றக் கூடாது என்ற கருத்தில் ஒரு சமாதானமும் செய்து கொள்ள முடியாது. அந்த வகையில் ரோசா வசந்தின் காரியம் கண்டனத்துக்குரியதே. இது பற்றி பதிவர் ப்ரூனோவுடன் செல்பேசினேன். சும்மா சொல்லப்படாது மனிதர் சரியான நேரத்தில் மருத்துவரீதியிலும், மருத்துவமனை நிர்வாக ரீதியாகவும் செயல்பட்டு நிலைமையை கட்டுக்குள் கொண்டு வந்ததில் அவரது செயல்பாடு பாராட்டுக்குரியது. அவருடன் பேசும்போது கூட இது பற்றி எழுத வேண்டாம் என்றுதான் நினைத்தேன். இருப்பினும் இந்த சண்டை மனப்பான்மையை முளையிலேயே கிள்ளி எறிய வேண்டும் என்பதற்காக இங்கு பதிவு செய்கிறேன்.

போலீஸ் கமிஷனர் அலுவலகத்தில் டோண்டு ராகவன்
ஸ்விட்சர்லாந்திலிருந்து வந்திருந்த அப்பெண்மணி மனித முடிகளை இறக்குமதி செய்து டோப்பாக்கள் தயாரிப்பவர். அவரை உள்ளூர்க்காரர் ஏமாற்றியிருக்கிறார். மனித முடிகளை ஏற்றுமதி செய்வதாக ஆர்டர் பெற்று அப்பெண்மணி வங்கி மூலம் பணத்தை அவரது கணக்குக்கு மாற்றியதும் காணாமல் போய் விட்டார். அவருக்கு ஆங்கிலமோ தமிழோ தெரியாது. ஆகவே நான் பிரெஞ்சு மொழிபெயர்ப்பாளராக செயல்பட்டேன்.

அவரது வங்கி கணக்கு இருக்கும் கிளையில் விஷயத்தைச் சொல்லி அவரது முகவரியைக் கேட்டால் தர மறுத்து விட்டார்கள். பிறகுதான் கமிஷனர் ஆஃபீசுக்கு அவரை அழைத்து வந்தேன். முதல் தடவை சென்றபோது மணி பிற்பகல் 3 ஆகிவிட்டது. கமிஷனரை சந்தித்து நேரில் புகார் தரும் நேரம் திங்கள் முதல் வெள்ளி வரை காலை 10 முதல் 11 மணி வரைக்கும்தானாம். நடுவில் எனக்குத் தெரிந்த வக்கீலிடம் அவர் கேட்டுக் கொண்டதற்கேற்ப அழைத்து சென்றேன்.

அடுத்த நாள் காலை முதல் ஆளாக கமிஷனர் அலுவலகத்தில் நின்றோம். புகாரை எழுத்து வடிவம் மூலம் கொடுத்தபின் சிறிது நேரம் காத்திருக்க வேண்டும். இரண்டு ஆய்வாளர்கள் தனித்தனியே விசாரிக்கிறார்கள். அவர்களது கேள்விகளும் புகார் விவரத்தை இன்னும் அதிக அளவில் எடுக்கும் அளவிலேயே இருந்தன. இருவரும் கேஸ் சுருக்கத்தை தத்தம் வழியில் எழுத்தில் பதிவு செய்கின்றனர். 12 மணி வாக்கில் கமிஷனர் ராஜேந்திரன் வந்தார். எங்கள் கேசைத்தான் முதலில் கூப்பிட்டார்கள். அவரிடம் இரு ஆய்வாளர்களும் வாய்மொழியாக புகாரின் சுருக்கத்தைக் கூறினர். பிறகு அப்பெண்மணியிடம் கேள்விகள் கேட்கப்பட்டன.

அவர்றை நான் பிரெஞ்சில் மொழிபெயர்க்க, அப்பெண்மணி பதிலளித்ததை தமிழில் மொழிபெயர்த்தேன். கமிஷனரும் சரி, மற்ற ஆய்வாளர்களும் சரி முதலில் நான் யார், அங்கு ஏன் வந்தேன் என்றுதான் முதலில் கேள்வி கேட்டனர். அவர்களிடம் எனது துபாஷி வேலையை பற்றிச் சொன்னதும் சமாதானமடைந்தனர்.

இங்கு இவற்றையெல்லாம் எழுதக் காரணமே கமிஷனர் அலுவலகத்தில் மெதாடிக்கலாக செயல்படும் முறையை சிலாகிக்கவே. இப்போதைய கமிஷனரும் சரி அவரது உதவியாளர்களும் சரி பொறுமையாகவே மக்களைக் கையாளுகின்றனர்.

அன்புடன்,
டோண்டு ராகவன்