ரீடிஃப்-ல் சோவின் செவ்வி

ரீடிஃப்-ல் சோ அவர்கள் அளித்த பேட்டியின் தமிழாக்கம் இது. நன்றி ரீடிஃப். ஓவர் டு ரீடிஃப். (மொழி பெயர்ப்பு: டோண்டு ராகவன்)

துக்ளக் ஆசிரியர் சோ அவர்கள் இந்தியாவின் மிகவும் மரியாதைக்குரிய அரசியல் ஆய்வாளர்களில் ஒருவர்

அவர் தனக்கே உரித்தான முறையில் ஷோபா வாரியருடன் ஸ்ரீலங்கா பிரச்சினை பற்றியும் புலிகள் பற்றியும் பேசுகிறார்.

கேள்வி: திடீரென தமிழகத்தின் எல்லா அரசியல் கட்சிகளும் ஒட்டுமொத்தமாக இலங்கைத் தமிழர் பிரச்சினையில் ஏன் இத்தனை ஆர்வம் காண்பிக்கிறார்கள்?

பதில்: முதலில் கம்யூனிஸ்டுகளிடம் இது ஆரம்பித்தது. அவர்களுக்கு தமிழகத்தில் பேச வேறு விஷயங்கள் இல்லை. அணுசக்தி ஒப்பந்தத்தில் மக்களின் கவனத்தைத் திருப்ப இயலாது. இத்தனை நாட்களாக மத்தியில் காங்கிரசையும் மாநிலத்தில் திமுகவையும் ஆதரித்து வந்துள்ளனர். இப்போது இப்பிரச்சினை அவர்களிடம் சிக்கியது அவர்களுக்கு ஒரு வரப்பிரசாதமே.

ஜெயலலிதா உடனேயே மத்திய மாநில அரசுகளைக் கண்டித்து அறிக்கை வெளியிட்டார். வைக்கோ அதை எப்போதுமே செய்து வந்துள்ளார். அவரை மிஞ்சுவதற்காக ராமதாசும் பேச வேண்டியதாயிற்று. இவ்வளவு நடந்த பிறகு கருணாநிதியால் எவ்வாறு சும்மா இருக்க இயலும்? தமிழர்கள் எங்கிருந்தாலும் அவர்களுக்கெல்லாம் தான் தலைவர் என சொல்லிக் கொள்கிறவர் அல்லவா அவர்? அதனால்தான் அவர் இவ்வாறெல்லாம் செயல்பட வேண்டியுள்ளது.

அவருக்கு அத்தனை அக்கறை இருந்தால் தனது அரசின் ராஜினாமாவை சமர்ப்பித்து சட்டசபையைக் கலைக்கச் பரிந்துரை செய்து தான் மக்களிடம் போகப் போவதாகச் சொல்ல வேண்டியதுதானே. அவர் அவ்வாறு செய்யவில்லை.

மாநில அனைத்து கட்சிகள் தீர்மானத்தில் காங்கிரசுக்கும் பங்கு உண்டு என்பது தெரிந்ததே. காங்கிரஸ் சட்டசபை உறுப்பினர்கள் மத்திய அரசை கவிழ்ப்பதாகக் கூறி பயமுறுத்துவார்கள் என யாரும் நினைத்து பார்த்திருக்க முடியாது!

கேள்வி: தமிழக மக்களுக்கு புலிகள்பால் அனுதாபம் இருக்கிறது என நினைக்கிறீர்களா?

பதில்: புலிகள்பால் அனுதாபம் இல்லை. இலங்கைத் தமிழர்கள்பால் இருக்கலாம். ஆனால் அதை ஒரு தேர்தல் பிரச்சினையாக பார்க்கும் அளவுக்கு அது இல்லை. அதன் மேல் மக்கள் ஓட்டளிக்குக் நிலையில் இல்லை.

பதில்: எந்த அளவுக்கு அவர்களுக்கு இலங்கைத் தமிழர்கள் மேல் அனுதாபம் உண்டு?

இலங்கைத் தமிழர்கள் அமைதியான சூழ்நிலையில் சம உரிமை அடிப்படையில் சிங்களவர்களுடன் வாழ வேண்டும் எனத் தமிழ் நாட்டினர் விரும்புவார்கள். புலிகளை கடுமையாக விமரிசனம் செய்யும், புலிகளுக்கு எதிரான இலங்கை அரசின் ராணுவ நடவடிக்கைகளில் தலையிடுவதை தீவிரமாக எதிர்க்கும் நானே இந்திய-ஸ்ரீலங்கா ஒப்பந்தம் செயலாக்கப்பட வேண்டும் என கூறி வருகிறேன்.

இந்த ஒப்பந்தத்தின் மூலம் தமிழர்களுக்கு சுயாட்சி கிடைக்கும், சிங்களவர்களுடன் சம உரிமையோடு அமைதியாக வாழ இயலும். இது மிகவும் நல்ல விஷயமாக இருக்கும். இந்த ஒப்பந்தம் நிறைவேறாமல் போனதற்கு புலிகள்தான் பொறுப்பேற்க வேண்டும்.

கேள்வி: புலிகள் அதிகாரம் செலுத்தும் பகுதிகளை இலங்கை ராணுவம் கைப்பற்றும் என நினைக்கிறீர்களா? இலங்கை அரசு அதை மிக விரைவில் செய்யப்போவதாகக் கூறுகிறது. ஆனால் நான் பழநெடுமாறனுடன் இது பற்றிப் பேசும்போது இலங்கை அரசு புருடா விடுவதாகக் கூறினார்...

பதில்: அங்கிருப்பது யுத்தச் சூழ்நிலை. அதில் இரு தரப்பினருமே பிரசாரத்தில் ஈடுபடுவர். அங்கு கிடைப்பது செய்தி அல்ல, பிரசாரம்தான். ஆகவே, இலங்கை அரசானாலும் சரி புலிகளானாலும் சரி அவர்கள் சொல்வதை அப்படியே ஏற்க இயலாது. உண்மை எங்கேயோ நடுவில் உள்ளது. அல்லது அவர்கள் இருவரில் ஒருவர் கூறியது முழு உண்மையாகவும் இருக்கலாம். ஆனால் நமக்கு அது நிச்சயமாக்த் தெரியாது.

ராணுவம் முன்னேறுகிறது என்பதில் ஐயமில்லை. புலிகளுக்கு இழப்புகள் உண்டு. ஆனால் முன்னமும் இம்மாதிரி நடந்துள்ளது. இலங்கை ராணுவம் யாழ்ப்பாணத்தைக் கைப்பற்றியது. ஆனால் அதனால் விவகாரம் முடிந்து விடவில்லை. எனக்கு உண்மை நிலவரம் தெரியாது. ஆகவே ராணுவத்தின் கை ஓங்கியுள்ளது, புலிகள் தோற்கின்றனர் என ஒட்டுமொத்தமாகக் கூற நான் தயாராக இல்லை. ஆனால் அது நடக்க வேண்டும் என விரும்புகிறேன்

கேள்வி: சர்வதேசத் தடைகளால் புலிகளுக்கு எந்தளவு பாதிப்பு ஏற்பட்டுள்ளது?

பதில்: புலிகளுக்கு பாதிப்பு நிச்சயம் ஏற்பட்டுள்ளது. பணம் மற்றும் ஆயுதங்கள் பெறுவதில் அவர்களுக்கு சிக்கல் ஏற்பட்டுள்ளது.

கேள்வி: வடக்கு பகுதியைக் கைப்பற்றியவுடன் அரசியல் தீர்வு காணப்படும் என மஹிந்த ராஜபக்‌சே கூறுகிறாரே. அவரை நீங்கள் நம்புகிறீர்களா?

பதில்: அங்குள்ள தமிழர்களின் நலனுக்காக புலிகள் செயல்படுவதாகக் கருதப்படுகிறது. ஆனால் அது உண்மையில்லை. எது எப்படியானாலும் அங்கு அவர்கள் பிரதிநிதிகளாக உருவகப்படுத்தப்பட்டுள்ளார்கள். ஏனெனில் மற்ற எல்லா பிரதிநிதிகளையும் அவர்கள் கொன்று விட்டார்கள். மற்ற எல்லா மிதவாத, தீவிரவாதத் தலைவர்களை கொன்றது அவர்களே, இலங்கை அரசு அல்ல. ஆயிரக்கணக்கான தமிழர்களை அவர்கள் கொன்று குவித்துள்ளனர். தாங்கள்தான் ஒரே பிரதிநிதிகளாக இருக்க வேண்டும் என்பதற்காகவே இதை செய்தனர். பெருமளவுக்கு இதை அவர்கள் நிறைவேற்றவும் செய்தனர் .

ஆகவே, புலிகள் கிட்டத்தட்ட ஒடுக்கப்பட்டு ராணுவ ரீதியாகச் செயலிழக்கச் செய்யப்பட்டவுடன் -- கொல்லப்பட்டு என்ற அளவுக்கு நான் சொல்ல மாட்டேன் ஏனெனில் அங்கு அவர்கள் பல காலமாக இருக்கின்றனர் -- இந்தியா தலையிட வேண்டும். அந்த நிலையில் இலங்கைத் தமிழர்களுக்கு ஆதரவாகப் பேச வேறு யாரும் இருக்க மாட்டார்கள்

இந்தியா தலையிட்டு ராஜீவ்-ஜெயவர்த்தனா ஒப்பந்தத்தை அமுலுக்கு கொண்டுவர இலங்கை அரசைக் கட்டாயப்படுத்த வேண்டும். அங்கு ஒரு சமஷ்டி அரசு நிறுவப்பட்டு தமிழர்கள் சிங்களவர்கள் சம உரிமையுடன் வாழ வேண்டும்.

கேள்வி: அவ்வாறு இந்தியா தலையிட்டால் இலங்கை அரசு அது தனது உள்விவகாரம் எனக் கூறினால்?

பதில்: இந்தியாவுக்கு தான் சொல்வதை நிறைவேற்ற தேவையான செல்வாக்கு உண்டு. முன்னமும் இதைத்தான் கூறினார்கள், ஆனால் ஒரு இலங்கை ஜனாதிபதி இந்திய அமைதிப் படையை அனுப்புமாறு கோர வேண்டியிருந்தது.

கேள்வி: கருணா வெளியேறியதால் புலிகள் எந்த அளவு பலவீனம் அடைந்துள்ளனர்?

கிழக்கில் பலவீனம் அடைந்ததில் சந்தேகம் இல்லை. வடக்குப் பகுதிகளில் அவ்வளவாக இல்லை. இந்தக் கடினமான சூழ்நிலையிலும் கிழக்கு பகுதியில் தமிழர் ஒருவர் தலைமையில் தற்காலிக அரசு அமைப்பதில் இலங்கை அரசு வெற்றியடைந்துள்ளது. இதில் ராஜபக்சேவின் பங்கை ஒத்து கொள்ள வேண்டும்.

இலங்கைத் தமிழர்கள் பிரச்சினையில் தமிழக அரசியல் கட்சிகளுக்கு நிஜமாகவே அக்கறை இருந்தால் அவர்கள் சண்டை நடக்கும் பகுதிகளில் இருந்து பொதுமக்கள் வேறு இடங்களுக்கு செல்ல அனுமதிக்குமாறு பிரபாகரனை வற்புறுத்த வேண்டும். இப்போது என்ன நடக்கிறதென்றால் பொது மக்களை புலிகள் தங்களுக்கு கவசமாக பயன்படுத்தி வருகின்றனர். இலங்கை அரசின் ராணுவ நடவடிக்கைகளை மக்கள் கொலையாக (genocide) சர்வதேச அரங்கில் காட்டுவதே புலிகளின் இச்செயல்பாட்டின் நோக்கம். இது மக்கள் கொலை அல்ல.

இதை மக்கள் கொலையாக வர்ணிப்பது பிதற்றல் என அறிக்கை கொடுத்துள்ளார் தமிழர் ஐக்கிய விடுதலை முன்னணித் தலைவர் ஆனந்த சங்கரி. புலிகள்தான் பொதுமக்களை பத்திரமான இடங்களுக்கு செல்லவிடாமல் தடுக்கின்றனர் என்றும் அவர் கூறியுள்ளார்.

ஆகவே தமிழக கட்சிகள் பிரபாகரனிடம்தான் தங்கள் கோரிக்கையை வைக்க வேண்டும். மத்திய அரசிடமோ இலங்கை அரசிடமோ அல்ல.

கேள்வி: பிரபாகரனிடம் அவர்களுக்கு இம்மாதிரி கோரிக்கை வைக்கும் அளவுக்கு செல்வாக்கு உண்டா?

பதில்: இல்லை என நினைக்கிறீர்களா? அதிமுக மற்றும் காங்கிரசைத் தவிர்த்து மீதி எல்லோரிடமும் அம்மாதிரி செல்வாக்கு உண்டு. வைக்கோ, திருமாவளவன், ராமதாஸ் மற்றும் திமுகாவுக்கு அதிகமாகவும் மற்றவர்க்கு சற்றே குறைவாகவும் செல்வாக்கு உண்டு.

இலங்கைத் தமிழர்கள் மேல் உண்மையான அக்கறை இருந்தால் அவர்கள் அம்மாதிரி கூற வேண்டும். அதன்றி பிரபாகரன் மேல்தான் அக்கறை என்றால் இப்போது செயல்படுவது போலத்தான் செய்ய வேண்டும், செய்கிறார்கள்.

அன்புடன்,
டோண்டு ராகவன்