டோண்டு பதில்கள் - 02.07.2009

கேள்விகள் கேட்போருக்கு ஒரு வேண்டுகோள். சில சமயம் எங்காவது இணையத்தில் படித்ததை ஆதாரமாக வைத்து கொண்டு கேள்விகள் கேட்கப்படுகின்றன. அதில் தவறில்லை. ஆனால் அப்படியே தமது கேள்விகளின் பின்புலனையும் கூறினால் சௌகரியமாக இருக்கும். நானே கூகளிட்டு பார்ப்பதுண்டு என்பது நிஜமே. ஆயினும் அந்த சுட்டி ரெடியாக கிடைத்தால் அதை தேடும் நேரம் விரயமாகாமல் பதிலில் இன்னும் அதிக முனைப்பாக இருக்கலாம் அல்லவா?

அருண்குமார்:
1. சீனாவிற்க்கு செக் வைக்க இந்தியா அல்லது அமெரிக்கா வட கொரியாவை தூண்டி விடுகிறதா?
பதில்: அமெரிக்கா என்னவோ தூண்டிவிடும் வலிமையுடன் உள்ளது. அதன் உளவுத் துறைக்கு அதுதான் ரொடீன் வேலையே. ஆனால் இந்தியாவிடம் அதற்கெல்லாம் தேவையான ஆள்பலமோ பொருள்பலமோ இருப்பதாகத் தெரியவில்லையே.

2. பசங்க படம் பார்த்தீர்களா?
பதில்: பசங்க படமும் பார்க்கவில்லை, பாய்ஸ் படமும் பார்த்ததில்லை. என்னவோ பார்க்கத் தோன்றவில்லை. நல்லா இருக்காமா?

அனானி (அதே 32 கேள்விகள் வல்லுநர்)
1. இந்தியாவில் இனி கூட்டணி ஆட்சிகளின் தயவில்தானா இல்லை நிலமை மாறுமா?
பதில்: இப்போதைக்கு கூட்டணி கட்சிகள் ஆட்சிதான். நிலைமை மாறும் அறிகுறிகள் ஏதும் கண்ணுக்கு தெரியவில்லை.

2. இனி ராமதாஸ், வைகோ, சரத், லாலு, பாஸ்வான் நிலைமை?
பதில்: அவர்களாக விலகும்வரை அவர்களை குறைத்து மதிப்பிட இயலாது. அரசியல் என்பது ஒரு போதை மாதிரி. எனக்கு தெரிந்து மொரார்ஜி தேசாய் ஒருவர்தான் சமீபத்தில் 1979-ல் திடீரென அரசியல் சன்னியாசம் வாங்கிக் கொள்வதாகக் கூறி, பிறகு அரசியலையே திரும்பிப் பார்க்கவில்லை.

3. பள்ளிகளுக்கான தமிழக அரசின் ‘புத்தகம் பூங்கொத்து’ திட்டம் செயலாக்கம் தற்சமயம் எப்படி உள்ளது?
பதில்: திட்டம் நன்றாகத்தான் உள்ளது. அது எப்படி செயல்படுத்தப்படுகிறது என்பதுதான் முக்கியம். இது தொடர்ந்து அவதானிக்கப்படவேண்டிய திட்டம்.

4. ஆசிரியர் பட்டயப் பயிற்சி பெற்றவர்களில் மாவட்ட வேலை வாய்ப்பகங்களில் பதிவு செய்துள்ளவர்கள் அனைவருக்கும் வாய்ப்பிருக்கா?
பதில்: நன்றாகவே இருக்கிறது. ஆனால் அரசு எல்லா காலியிடங்களையும் நிரப்ப வேண்டும். அது பல முறை நடப்பதில்லை. ஆகவே இத்துறையில் வேலையில்லா திண்டாட்டம் என்று இருந்தால் அது செயற்கையானதே.
நான் சமீபத்தில் 1970-ல் வேலை வாய்ப்பு அலுவலகத்தில் எனது பெயரை பொறியாளர்களுக்கான பட்டியலில் பதிந்தபோது ஆசிரியர் பயிற்சி பெற்றவர்களுக்கு தமிழகத்தில் நல்ல டிமாண்ட் எனக் கூறினார். அதற்காக நான் இப்போது போய் B.T. எல்லாம் படிக்கவியலாது என விளையாட்டாக கூறினேன். ஆனால் அதன் பிறகு ஆசிரியர்களின் நிலையை அப்வ்வப்போது அவதானித்து வருகிறேன். தில்லியில் நான் இருந்தபோது பல ஆசிரியர்கள் டியூஷனிலேயே நிறைய பணம் அள்ளினர். கூடவே அரசு வேலை வேறு. ஆனால் அதே சமயம் முறையான பயிற்சி இன்றி வெறுமனே டீச்சர்களாக பணி புரிந்தவர்கள் கொத்தடிமை ரேஞ்சுக்கு நடத்தப்பட்டதும் நிஜம். இதனாலேயே பி.எட். படிப்புக்கு போட்டி அதிகம். அதை பயன்படுத்தி போலி பயிற்சி பள்ளிகளும் உருவாகியுள்ளன.

5. இன்றைய அதிரடி (காலை முதல் மாலை வரை) உண்ணாவிரதங்களைப் பார்க்கும்போது?
பதில்: ஒன்று செய்யலாம். உண்ணாவிரதத்துக்கு அனுமதி வேண்டுமென்றால் குறைந்தபட்சம் ஐந்து நாட்களாவது இருக்க வேண்டும் என்ற ஒழுங்கு ஏற்படுத்த வேண்டும். உண்ணாவிரதம் இருப்பவர்களை 24 மணி நேரமும் டி.வி. கேமராவின் பார்வையிலேயே இருக்க செய்ய வேண்டும். அப்போதுதான் திருட்டுதனமாக ஏதும் உண்ண இயலாது. பிறகு பார்க்கலாம் எவ்வளவு பேர் உண்ணாவிரதம் செய்ய முன்வருகின்றனர் என்று.

6. ஆறாவது ஊதியக்குழுவின் பரிந்துரைப்படி மாவட்ட கலெக்டரின் சம்பளம் ஒரு லட்சத்திற்கு ச்ற்று குறைவாமே?
பதில்: ஓ இதைத்தான் லட்சப் பற்றாக்குறை என்கிறார்களோ?

7. அமிதாப் சிவசேனை கட்சியினர் ராசியாகிவிட்டனரா?
பதில்: நான் கூகளிட்டு தேடியவரைக்கும் எல்லா செய்திகளுமே ஓராண்டு பழையன. இப்போது நிலைமை என்னவென்று புரியவில்லை. இந்த இடுகையின் முதலில் நான் விடுத்த வேண்டுகோளை பாருங்கள்.

8. புதுக் கதாநாயகர்களுள் உங்களைக் கவர்ந்தவர் யார்? ஏன்?
பதில்: விஷால். ஆனால் அவரை புது கதாநாயகன் என ஒப்பு கொள்வார்களா? கூடவே ஜீவாவையும் பிடிக்கும். அதுவும் அவர் ரொம்பவுமே க்யூட்டாக இருப்பதால். பை தி வே இருவருக்கும் ஏதேனும் உறவுமுறை இருக்கிறதா? முகஜாடை ஒத்து போகிறதே.

9. புதுக் கதாநாயகிகளுக்குள் உங்களைக் கவர்ந்தவர் யார்? ஏன்?
பதில்: இப்போதிருக்கும் கதாநாயகிகள் வருகிறார்கள், போகிறார்கள். மனதில் நிற்பதில்லை. அவர்களிடம் கவனிக்க வேண்டிய விஷயங்கள் எல்லாம் பல இருப்பதால் பெயரையெல்லாம் நினைவில் வைத்து கொள்வதில்லை. முன்னணி விஷயங்கள் ரெண்டும் நல்லபடியாக இருந்தால் பெயரையெல்லாம் யார் பார்க்க போகிறார்கள்?

10. புது நகைச்சுவை நடிகர்களுள் உங்களைக் கவர்ந்தவர் யார்? ஏன்?
பதில்: சந்தானம். ஒரு படத்தில் அவர் கதாநாயகியின் வீட்டுக்கு வருபவரை அவளை பெண்பார்க்க வந்தவர் என அவளிடம் குறிப்பிட்டு விட்டு, கதாநாயகியும் வந்தவர் காலை தொட்டு வணங்கி காப்பி எல்லாம் கொடுத்து உபசரிக்க, அப்போது வரும் நாசர் அவர் வீட்டுக்கார பையன் என உண்மையை போட்டு உடைக்க, அவள் கோபத்துடன் சந்தானத்தை பார்க்க, அவர் குதித்து கும்மாளம் போடும் காட்சி நன்றாக இருந்தது. படத்தின் பெயரை யாராவது சொல்லுங்கப்பு. கஞ்சா கருப்புவையும் பிடிக்கும். அதுவும் போலீஸ்காரர்களை எலெக்ட்ரிக் கம்பம் ஏறுபவர்கள் (“அதுவும் இந்த அக்கா எப்படி கம்பமெல்லாம் ஏறுவாக”?), ஓட்டுநர்கள், போஸ்ட்மேன் என்று எல்லா தொழில்முறைகளையும் குறிப்பிட்டு, கடைசிவரை போலீஸ் என சரியாக ஊகிக்காமல் இருந்து உதை வாங்கும் சீன் அபாரம். இப்படத்தின் பெயரும் ப்ளீஸ்.

11. ஒகேனக்கல் பிரச்னையாக ஆளுக்கு ஆள் வேலை நிறுத்தம், கதவடைப்பு என்று செய்தார்களே இப்போது?
பதில்: இப்போது என்ன ஏதேனும் தேர்தலா வருகிறது, அது பற்றி எல்லாம் கவலைப்பட?

12. சினிமாவில் ‘சென்சார்’ இருக்கா?
பதில்: இருக்கிறது போலத்தான் தோன்றுகிறது. ஆனால் சென்னையில் சென்சார் தடுத்தால் பம்பாய்க்கு கொண்டு சென்று சான்றிதழ் வாங்குகிறார்கள் எனவும் கேள்விப்பட்டேன். அது உண்மையானால் என்ன நடக்கிறது இங்கே என்றுதான் கேட்கத் தோன்றுகிறது.

13. வேலூர் தங்கக் கோவிலுக்கு போயிருக்கிறீர்களா? என்ன் விசேஷம்?
பதில்: போயிருக்கிறேன், ஒரு முறை. படாடோபமாக இருக்கிறது. வட இந்திய கோவிலுக்கு செல்லும் உணர்வைத் தருகிறது.

14. டெல்லி அக்சர்தாம் கோவில் மாதிரியா?
பதில்: இந்தக் கோவிலைத்தானே சொல்கிறீர்கள்? அது 2005-ல் கட்டப்பட்டது. நான் தில்லியை விட்டு 2001-லேயே வந்தாகி விட்டது. திரும்ப அங்கு போகும் ப்ரொக்ராம் எதுவும் தற்சமயம் இல்லை. ஆகவே இந்தக் கோவிலை பார்க்கும் வாய்ப்பும் இப்போதைக்கு இல்லை.

15. இவர்களுக்கு இந்த அளவுக்கு பணம் கொடுப்பது யார்?
பதில்: கருப்பு பணம் இப்படி தாண்டவமாடும் நாட்டில் இது என்ன கேள்வி? அதுவும் கோவிலுக்கு கொடுத்தால் போகிற வழிக்கு புண்ணியம் என நினைப்பவர்கள் அனேகம் பேர் உள்ளனர். அப்படி ஒரு கோவிலை உருவாக்கிய பிறகு அதை நிர்வகிப்பவர்களுக்கு பணத் தட்டுப்பாடே இருக்காது அல்லவா?

16. இந்த ஆடம்பரச் செலவினங்களுக்கு வருமான வரித்துறையின் அனுமதி வாங்கிக் கொடுக்கும் பெரிய நபர்கள் யார் யார்?
பதில்: இந்தியாவின் முக்கிய பணக்காரர்களில் பெரும்பான்மையினர் இவர்களுள் அடங்குவர்.

17. அவ்ர்களுக்கு இதில் லாபம் என்ன?
பதில்: தேன் எடுப்பவன் என்ன செய்வான் என்பதை அறிவீர்கள்தானே.

18. 10ம் வகுப்பு அரசுத் தேர்வுக்கு இனி டாட்டா இது சரியாய் வருமா?
பதில்: நான் படிப்பதற்கு முந்தைய காலத்தில் எட்டாம் வகுப்புக்கே தேர்வு இருந்து வந்திருக்கிறது. அதற்கு ESLC (Elementary School Leaving Certificate) எனப் பெயர். அதை எடுத்ததால் ஏதும் கெடுதல் நடந்ததாக எனக்கு தெரியவில்லை. என்ன சிலர் 10-வது முடிந்ததும் தொழிற்கல்விக்கு சென்றனர். அவர்கள் இன்னும் இரண்டு ஆண்டுகள் பொதுவான பள்ளிக் கல்வி முறையில் தங்கியிருக்க வேண்டும். அது கெடுதலா என்பதை அவர்கள்தான் அனுபவ பூர்வமாக சொல்ல வேண்டும்.

19. பேருந்துக் கட்டண உயர்வு பிரச்னை மீண்டும் தலைதூக்குமா?
பதில்: இன்னும் ஆட்டோ டாக்சி கட்டணங்களுடன் ஒப்பிடுகையில் பேருந்து கட்டணங்கள் மிகக் குறைவே. ஆகவே எவ்வளவு பேருந்துகள் விட்டாலும் கும்பல் குறையாது. ஆனால் அதிக பேருந்து விடுவார்களா என்பதுதான் சஸ்பென்சான கேள்வி.

20. சிறு மற்றும் குறு விவசாயிகளுக்கு அடுத்ததாகப் பெரிய விவசாயிகளுக்கும் கடனை தள்ளுபடி செய்துவிடுவார்கள் போலுள்ளது?
பதில்: அக்கூத்தை 2011-ல் அதிகம் பார்க்கலாம் என நினைக்கிறேன்.

21. பேசாமல் கடன் கொடுப்பதை இலவசம் என்று சொல்லிவிட்டால்?
பதில்: கடனை ஒழுங்காக திருப்பித் தருவதுதான் பொருளாதார சுழற்சிக்கு ஏதுவாக இருக்கும். எல்லாவற்றையும் இலவசமாக தந்தால் சோம்பேறித்தனம்தான் வளரும். பிறகு கடன் தரவும் பணம் இருக்காதுதானே.

22. தமிழக அரசியல் கெட்டுப் போனதற்கு முக்கிய காரணம் யார்?
பதில்: தவறு செய்யும் ஆட்சியாளர்களை தூக்கியெறியும் வாய்ப்பைத் தரும் தேர்தல் நேரத்தின்போது சில நூறுகளுக்கு ஆசைப்பட்டு தவறானவர்களை தேர்ந்தெடுக்கிற பொது மக்களே முக்கிய குற்றவாளிகள்.

23. இந்திய அரசியல் கெட்டுப் போனது யாரால்?
பதில்: சுயநல அரசியல்வாதிகளை இனம் காணாது மறதி திலகங்களாய் இருக்கும் பொது மக்களே முக்கிய காரணம். அதாவது தமிழ் நாடு நிலவரம் பெரிய ஸ்கேலில்

24. உலக அரசியல் கெட்டுப் போனது யார் காலத்தில்?
பதில்: உலக அரசியல் என்று தனியாக ஏதும் இல்லை. பல நாடுகளின் அரசியல் செயல்பாடுகளின் கூட்டு அவியல்தான் அது. இதில் யாரை எதற்கு பொறுப்பாக்குவது?

25. புத்தகப் பதிப்புத் துறைக்கு இப்போது நல்ல காலமா?
பதில்: எல்லா பதிப்பாளர்களும் கிழக்கு பதிப்பகம் போல சின்சியராக இருந்தால் நல்ல காலமே.

26. ப.சிதம்பரம் அவ்ர்களின் வெற்றி ஒருவேளை நீதிமன்றத்தால் நிராகரிக்கப்பட்டால்,தடை செய்யப்பட்டால் அவர் என்ன் செய்ய் வேண்டும்?
பதில்: அவர் ஒன்றுமே செய்ய வேண்டாம். அவரை மற்றவர்களாகவே வீட்டுக்கு அனுப்பி விடுவார்கள்.

27. கருணாநிதியை நவீன பகீரதன் என்று புகழ்கிறாரே ஸ்டாலின் இது கொஞ்சம் ஓவராய் இல்லை?
பதில்: ஓவராக எல்லாம் இல்லை. எவ்வளவு முயற்சி செய்து தனது குடும்பத்தினர் அனைவருக்கும் ஆதாயம் செய்து வருகிறார்! இதில் அவர் பகீரதனுக்கு ஒப்பானவர்தான். ஏனெனில் பகீரதனும் தனது சித்தப்பன்மார்களது அஸ்திகளை கரைக்கவே கங்கையை கொண்டுவர அகோர தபஸ் செய்தான்.

28. அழகிரியின் செயல்பாடுகள் கொஞ்சம் வித்தியாசமாய்?
பதில்: ஆயிரம் கார்கள் உலா எல்லாம் செய்யாது எளிமையாக இருப்பதைத்தானே கூறுகிறீர்கள்? நல்ல விஷயம்தான். ஆனால் அவரது அல்லக்கைகளிடம் அவர் இன்னும் ஜாக்கிரதையாக இருத்தல் நலம். அவரது பெயரை உபயோகித்து சில்லறை பார்க்கும் வேலைகளை முளையிலேயே கிள்ளி எறிதல் நலம்.

29. பிரபாகரன் விசயத்தில் நக்கீரன் ஏன் இப்படி செய்திகளை தருகிறது?
பதில்: அதனுடைய வியாபார யுக்தி அது என வைத்து கொள்ள வேண்டியதுதான்.

30. அடுக்கு மாடிக் குடியிருப்புகளில் குடி நீர் கட் அரசாணை சரியா?
பதில்: நிச்சயமாக சரியில்லைதான். பணம் கட்ட மறுக்கும் ஓரிரு அபார்ட்மெண்ட்காரர்களுக்காக ஒட்டு மொத்த கட்டிடத்தையும் வெட்டுக்கு உட்படுத்துவது சரியில்லைதான். அதே சமயம் அபார்ட்மெண்ட் அசோசியேஷனே மொத்தமாக கட்டினாலும் அந்த ஓரிரு அபர்ர்ட்மெண்ட்காரர்களுக்கு சப்ளையை நிறுத்தக் கூடாது என அசோசியேஷனை மட்டும் கட்டிப் போடுவது என்ன நியாயமோ தெரியவில்லையே. அரசிடம் பவர் இருக்கிறது. வழிக்கு வராத அபார்ட்மெண்ட்காரர்களுக்கு தனியே சப்ளையை துண்டிக்கும் தொழில்நுட்ப ஏற்பாட்டை செய்யவியலும். இல்லாவிடில் பல வகைகளில் தலைவலியை உண்டு பண்ண முடியும்.

31. டாட்டாவின் ஒருவிநாடி ஒரு பைசா திட்டம் செல்பேசி துறையில் ஒரு புரட்சியை ஏற்படுத்துமா?
பதில்: இந்த சேவை பற்றி கூறுகிறீர்களா? பார்க்க நன்றாகத்தான் உள்ளது. ஆனால் ஸ்மால் பிரிண்டையெல்லாம் படித்தால்தான் ஏதேனும் முடிவாக கூற இயலும். பொறுத்திருந்து பார்ப்போம்.

32. ராமதாஸின் வன்னியர் தனி இட ஒதுக்கீடு கோரிக்கை மீண்டும் ஒரு பதட்டத்தை ஏற்படுத்தவா?
பதில்: புதிதாக என்ன கேட்டு விட்டார்? வன்னியர்களுக்கு மொத்தமாக கொடுக்கவில்லையென்றாலும் தனது மகனுக்கு மந்திரி பதவி கிடைத்தாலும் போதுமென்ற மனமே பொன் செய்யும் மருந்து என இருந்து விடுவாரே.


ராம்குமார்:
1. எமர்ஜென்சி காலத்தில் அரசு அலுவகங்களில் பணிகள் வேகமாக நடந்தது என்று சொல்கிறார்களே, உண்மையில் அப்படித்தான் நடந்ததா?
பதில்: ஆரம்ப காலத்தில் வெகு சில நாட்களுக்கு அவ்வாறு நடந்தது நிஜம். ஆனால் அது பயத்தால் நிகழ்ந்தது. இந்தியா அதுவரை அனுபவித்தறியாத சர்வாதிகார ஆட்சி. எதிர்ப்பு பற்றிய செய்திகள் சென்சாரால் அமுக்கப்பட்டன. இது பற்றி நான் இப்பதிவில் இவ்வாறு எழுதியிருந்தேன். “சிலர் கூறலாம், அவசர நிலை காரணமாக ரயில்கள் எல்லாம் நேரத்துக்கு ஓடின, விலைவாசிகள் கட்டுப்பாட்டில் இருந்தன என்று. இருக்கலாம், ஆனால் இந்திரா காந்தியின் கெட்ட எண்ணத்திற்கு அவையெல்லாம் ஈடாகாது”.


ரமணா
1. கவிஅரசு கண்ணதாசன் பாடல்களில் தங்களை கவர்ந்தது எது?
பதில்: வீடுவரை உறவு, வீதிவரை மனைவி காடு வரை பிள்ளை கடைசிவரை யாரோ என்னும் பாடல், சமீபத்தில் 1962-ல் வெளி வந்த பாதகாணிக்கை என்னும் படத்தில் வந்து. இப்பாடலை நான் விவரிப்பதைவிட நண்பர் சுப்பையா இன்னும் நன்றாக கூறுவார்.

2. எங்கே பிராமணன் தொடர் போல பல உண்மைகள் பொதிந்த அவரது அர்த்தமுள்ள இந்து மதம் பற்றி தொடர் பதிவு எழுதும் எண்ணம் உண்டா?
பதில்: இதுவரை அவ்வாறான எண்ணம் இல்லை. என் உள்ளங்கவர் கள்வன் என் அப்பன் தென்திருப்பேரை மகரநெடுங்குழைகாதனின் அருள் இருந்தால் முடியலாம்.

3. அவர் இலக்கியத்திருட்டு செய்து பாடல்கள் செய்தார் என்ற குற்றச்சாட்டிற்கு உங்கள் பதில் என்ன?
பதில்: ”எனது தந்தையின் பாக்கெட்டிலிருந்து பணம் எடுக்க மகனான எனக்கு உரிமை இல்லையா” என அவர் இது சம்பந்தமாக அவரிடம் கேட்கப்பட்ட போது கூறினார்.

4. கடைசிவரை கடனாளியாய் வாழந்ததற்கு முக்கிய காரணம் எது?
பதில்: காரணம் மிகவும் எளிமையானது. வரவை மீறிய செலவு, தெரியாத வேலைகளில் எல்லாம் ஈடுபட்டு கையை சுட்டுக் கொண்டது.

5. அவரது நண்பர் செல்வந்தச் சீமான் கலைஞர் கூட உதவி செய்யவில்லையா?
பதில்: கலைஞர் எல்லாவற்றையும் ஓசியில் பெறுபவர் என்பதை விளக்க அவர் ஒரு மோசமான உதாரணம் தந்தாரே படித்ததில்லையா?

6. அவரது வனவாசம் படித்துள்ளீர்களா?
பதில்: இல்லை.

7. அதில் உங்கள் நெஞ்சை தொட்ட சம்பவம் எது?
பதில்: அப்புத்தகத்தை படிக்காததால் அதை எவ்வாறு கூறிட இயலும்? இருப்பினும் தனது “அர்த்தமுள்ள இந்து மதத்தில்” வனவாச கால கட்டம் பற்றி பல இடங்களில் கழிவிரக்கத்துடன் எழுதியதை படித்துள்ளேன்.

8. கடைசியில் எம்ஜிஆரின் உதவி அரசுக் கவிஞராய் கெளரவித்தது -எப்படி யார் தலையீட்டில் நடந்தது?
பதில்: 1979 அல்லது 80-ல் இந்த நியமனம் நடந்தது என நினைக்கிறேன். இசையமைப்பாளர் விஸ்வநாதன் சிபாரிசு செய்திருப்பார் என்பது எனது யூகம். பதிவர் சுப்பையா இன்னும் சரியாக கூறுவார்.

9. கண்ணதாசன் ஒருவேளை திமுகவில் தொடர்ந்திருந்தால்?
பதில்: நடக்காத காரியம், ஏனெனில் அவரது பின்னால் ஏற்று கொண்ட ஆத்திக கொள்கைகள் அவரை அங்கு தொடர்ந்து இருக்க விட்டிராது.

10. வைரமுத்துவிற்கு கவிப்பேரரசு பட்டம் -அவர் கவிஅரசு கண்ணதாசனை எதில் விஞ்சியதால் கொடுக்கபட்டது?
பதில்: ஆட்சியில் இருப்பவரை புகழ்வதில் மிஞ்சியதால்.


அனானி (29.06.09 இரவு 10.39-க்கு கேட்டவர்)
இந்த பழமொழிகளுக்கு டோண்டு பாணியில் நக்கலாய் கலாய்க்கவும்.
1. உப்பை தின்னவன் தண்ணி குடிப்பான்
பதில்: சர்க்கரை தின்பவன் இனுசுலின் போட்டு கொள்வான்.

2. தடி எடுத்தவன் எல்லாம் தண்டல்காரன்
பதில்: ஆனால் தடி எடுக்காதவனோ வரி கட்டுபவன் மட்டுமே.

3. கெடுவான் கேடு நினைப்பான்
பதில்: நீ திருடன் என இறுமாந்தால் உனக்கு மேல் ஒரு பக்கா திருடன் வருவான்.

4. பேராசை பெரு நஷ்டம்
பதில்: அப்புறம் உள்ளதும் போச்சுடா நொள்ளைக் கண்ணான்னு இருக்க வேண்டியதுதான்.

5. எறும்பூர கல்லும் தேயும்
பதில்: எறும்பு என்ன, மரவட்டைகள் ஊறினாலும் கல் தேயும்தானே.

6. ஆடிக்காற்றில் அம்மியே பறக்கும் போது
பதில்: புயலில் கோபுரங்களே பறக்கும் போது எச்சில் இலை தன் கதி என்ன கவலைப் பட்டதாம் என்னும் சொலவடையையும் கேள்விப் பட்டுள்ளேன்.

7. இலவு காத்த கிளிபோல
பதில்: பிளேடு கம்பெனிகளில் டிபாசிட் போட்டு பனகல் பார்க் பக்கம் கூட்டம் போடுபவர்கள் நினைவுக்கு வருகின்றனர்.

8. ஊர் பிள்ளையை ஊட்டி வளர்த்தால் தன் பிள்ளை தானே வளரும்
பதில்: ஏன், கொடைக்கானல் வளர்க்காதாமா?

9. ஊர்த்தேங்காயை எடுத்து வழிப்புள்ளையாருக்கு உடைத்தது போல்
பதில்: ஒத்துக்கறேன், ஒத்துக்கறேன், இலவச டி.வி. கொடுப்பது கேவலமான செயல்னு.

10. கழுத்துவலி போய் திருகுவலி வந்தது போல்
பதில்: குடும்பத்துலே ஒத்தருக்கு மந்திரி பதவி வாங்கி கொடுத்தா இன்னும் நாலு பேருக்கு என்னென்ன வாங்கி தர வேண்டியிருக்கோ.

11. புலியை பார்த்து பூனை சூடு போட்டது போல்
பதில்: புலியை பார்த்து தைரியமா பூனை அதுக்கு சூடு வச்சிட்டு உயிர் தப்பிட இயலுமா?

12. சூரியனை பார்த்து நாய் குரைத்தது போல்
பதில்: எருமைப்பட்டி என்னும் ஊரிலிருந்து உள்ளூர் அரசியல்வாதி பேசியதாக விகடனில் சமீபத்தில் 1959-ல் ஒரு துணுக்கு படித்தேன். எருமைபட்டிக்காரர் கூறுகிறார், “சவால் விடுகிறேன் ஐசன்ஹோவருக்கு, என்னுடன் அமெரிக்க வெளியுறவு கொள்கை பற்றி ஒரே மேடையில் விவாதிக்கத் தயாரா”?

13. நாயை குளிப்பாட்டி நடு வீட்டில் வைத்தாலும்
பதில்: நாய்க்கு வாய் இருந்தால் “ஏண்டா மொட்டக்கம்னாட்டி, நானாடா உன்கிட்ட வந்து என்னை குளிப்பாட்ட சொன்னேன், எனக்கு ஜல்பு பிடிச்சா நீயாடா சோம்பேறி சாம்பிராணி புகையெல்லாம் போடப் போறேன்னு கேட்டுட்டு கடிக்குமே. அது மட்டும் பரவாயில்லையாமா?

14. ஆடத் தெரியாதவனுக்கு தெருக் கோணல் எனபது போல்
பதில்: ஆடப் போற ரோடு எப்படி இருக்குன்னு பார்க்கத்தானே கவுண்டமணி ராமராஜன் கோஷ்டி ஒரு நாள் முன்னதாகவே கனகாவின் கிராமத்துக்கு வந்ததா சொல்லிக்கிட்டாங்க.

15. உப்பில்லா பண்டம் குப்பையிலே
பதில்: அதிக உப்புள்ள பண்டமும் அதே குப்பையிலேதான். ரொம்ப கஷ்டம்டா சாமி இந்த வாழ்க்கை.

16. உப்பிட்டவரை உயிர் உள்ளவும் நினை
பதில்: அப்போ ஐஸ் கட்டிக்கு ரொம்ப நன்றியுணர்வு இருக்கணும்னு சொல்லறீங்களா?

17. கூட இருந்து குழிபறிப்பது போல்
பதில்: யாராவது இந்த வேலையையும் செய்யணும்தானே. வேலையில்லா திண்டாட்டம் அப்படி.

18. பார்த்தால் பசு பாய்ந்தால் புலி
பதில்: ஓடினால் அது என்ன? மானா?

19. பசுத்தோல் போர்த்திய புலி போல்
பதில்: அதனிடம் பால் கறக்க முயற்சிக்காமல் இருந்தால் பிழைக்கலாம்.

20. நாடறிந்த அந்தணரருக்கு பூணுல் எதுக்கு
பதில்: பூணல் இல்லையானா ஏன் இல்லை என்று எல்லோரோட கேள்விகளுக்கும் பதில் சொல்லியே அலுத்து விடுவாரே அந்த அந்தணர்.


எவனோ ஒருவன்:
1. ’மனதளவில் நான் யூத்துதான்’ என சொல்லிக்கொள்பவர்களிடம், என்னைப் போன்ற குழந்தைகள், ‘என்னடா மச்சான், சௌக்கியமா?’,’ஏ மாப்பு! என்ன ஆளையே காணோம்’, என்றமாதிரி பேசினால் ஏற்றுக்கொள்வார்களா? நீங்கள் எப்படி?
பதில்: தெரியாது. என்னிடம் யாரும் இதுவரை அம்மாதிரி கூறியதில்லை. அவ்வாறு கூறும் குழந்தைகள் பெண் குழந்தைகளாக இருந்தால் கண்டிப்பாக பிரச்சினை இராது என நினைக்கிறேன். :))))


மீண்டும் அடுத்த வாரம் சந்திப்போமா?

அன்புடன்,
டோண்டு ராகவன்