நங்கநல்லூர் பஞ்சாமிர்தம் 10.07.2009

டோண்டு பதில்கள்
டோண்டு பதில்களை நான் விளையாட்டாக ஆரம்பித்தேன். விளையாட்டாகவே ஜஸ்ட் லைக் தட் ஒரு அனானி (நிச்சயம் எனது நலத்தை விரும்பும் இனிய நண்பரே என்பதில் ஐயமில்லை) கேள்வி பதில்கள் பதிவு வரிசை ஒன்றை ஆரம்பிக்கலாமே எனக்கூறி, போணி செய்ய சில கேள்விகளை கேட்டு வைக்க, நானும் தமாஷாக ஆரம்பித்து வைக்க விளையாட்டு போல 16 மாதங்கள் சென்று விட்டன.

தானே கேள்வி தானே பதில் நிபுணர்கள் கெக்கலி காட்ட, இந்த பதிவு வரிசை நடந்து கொண்டிருக்கிறது. ஆரம்பத்திலேயே நான் சில முடிவுகள் எடுத்தேன். அதாவது ஒவ்வொரு முறையும் கையில் கேள்விகள் ஏதும் மிச்சம் வைக்கக் கூடாது. அடுத்த வாரத்துக்கு என சேமித்து வைக்கக் கூடாது. Zero budgetting என ஆங்கிலத்தில் கூறுவார்கள். ஒவ்வொரு நிதியாண்டுக்கும் ஒரு குறிப்பிட்ட ப்ராஜக்ட் தனது அவசியத்தை நிரூபிக்க வேண்டும். ஆரம்பித்தாயிற்றே நடத்த வேண்டுமே என நினைப்பது சூதாட்ட விடுதியில் போட்ட காசை எடுக்கும் முயற்சியில் தொடர்ந்து சூதாடுவதைப் போன்றது. அதை தவிர்க்க வேண்டும் என்ற முடிவால்தான் நான் இந்த வழியைத் தேர்ந்தெடுத்தேன். அவ்வாறு செய்ததில் இந்த 16 மாதங்களில் ஒரே ஒரு முறை பதிலளிக்க கேள்விகளே இல்லாமல் போயிற்று. அப்போதைய பதிவும் இல்லை. சில முறைகள் விரல் விட்டு என்ணக் கூடிய அளவிலேயே கேள்விகள் வந்தன. அதற்காகவும் கவலைப்படவில்லை.

நமது உற்சாகத்துக்காக எழுதுகிறோம். இதில் என்ன கொலைவெறி வேண்டிக் கிடக்கிறது. கேள்விகள் வந்தால் பதிவு, இல்லாவிட்டால் இல்லை. ரொம்ப சிம்பிள். எழுத்தாளர் நண்பர் பாரா அவர்கள் ஒரு சேட்டில் கேள்விகளை தெரிவு செய்து கேடகரைஸ் எல்லாம் செய்ய ஆலோசனை கூறினார். மிகவும் நல்ல யோசனை, ஆனால் எனது அமைவுகளுக்கு அதை செய்ய இயலவில்லை. மேலே சொன்னதைத்தான் அவருக்கும் கூறினேன். நேற்றைய பதிவு சற்றே அதிக நீளமாக போய் விட்டது. காப்பி செய்து வேர்ட் பக்கத்தில் ஒட்டினால் 20 பக்கங்களுக்கு மேல் வந்தது. 4000 வார்த்தைகளுக்கும் மேல். எனது தமிழ் படிக்கும் வேகத்துக்கு வெறும் வாசிப்பே 10 நிமிடங்கள் எடுக்கும். ஆகவே கேள்விகளை லிமிட் செய்யுமாறு பல நண்பர்களின் ஆலோசனைகள் வருகின்றன. பார்ப்போம்.


அனுகூல சத்ருக்கள்
ஸ்ரீலங்கா தமிழர்கள் நிலை மிகவும் டெலிகேட்டாக இருக்கிறது. ஸ்ரீலங்கா அரசை ராஜரீக முறையில் இந்தியா நிர்ப்பந்திக்கும் நேரம் இது. இப்போது போய் புலிகள் இன்னும் யுத்தம் செய்யப்போவதாக கிளப்பப்படும் செய்திகளை பரப்புபவர்கள் பொறுப்பற்ற முறையிலேயே செயல்படுகின்றனர். கரும்புலிகள் இலங்கையில் பல பகுதிகளில் ஊடுருவியுள்ளனர் என்ற வதந்திகள் ஸ்ரீலங்கா அரசுக்குத்தான் சாதகமாகப் போகும் என்பதை மறக்கலாகாது. இதுதான் சாக்கு என தமிழர்களை கேம்புகளில் வைக்கும் நிலை நீடிப்பதுதான் நடக்கும் என அஞ்ச வேண்டியுள்ளது. சமாதான முயற்சிகளை தொடர்வது மிகக் கடினமான காரியம்தான். இருந்தாலும் வேறு வழியில்லை. வீராப்பு பேச்சுகளை குறைத்தல் நலம்.

ஃபிரெஞ்சு எழுத்தாளர் Marek Halter
மாரெக் ஹால்டெர் 1936-ல் ஒரு யூத குடும்பத்தில் பிறந்தார். ஹிட்லரின் படைகளிடமிருந்து தப்பிக்க அவரது குடும்பம் பல ஊர்களுக்கு குடிபெயர்ந்து கடைசியில் ஃபிரான்சில் வசிக்கலாயிற்று. அவரது La Mémoire d'Abraham என்னும் புத்தகத்தை நான் யதேச்சையாக தில்லியில் உள்ள அல்லியான்ஸ் ஃபிரான்சேஸ் நூலகத்தில் பார்த்தேன். படித்து பிரமித்தேன். அது ஒரு குடும்பத்தின் கதை. கி.பி. 70-ல் இஸ்ரேலில் ஆரம்பித்து 1936-ல் போலந்தில் முடிகிறது. அக்குடும்பத்தில் ஒரு பழக்கம். முக்கிய நிகழ்ச்சிகளை டயரி ரூபத்தில் எழுதி வருவார்கள். அந்த டயரி 1800 ஆண்டுகளுக்கு மேல் தலைமுறை தலைமுறையாய் கைமாறி வந்துள்ளது. கி.பி. 70-ல் யூதர்கள் இஸ்ரேலிலிருந்து துரத்தப்பட்டு பல நாடுகளில் நாடற்றவர்களாக அலைந்து வந்துள்ளனர். சில நாடுகளில் சில காலம் இருக்க வேண்டியது, பிறகு அங்கிருந்து துரத்தப்பட வேண்டியது என்றே அவர்கள் காலம் கழிந்தது. நடுநடுவே அவ்வப்போது நடக்கும் படுகொலைகள் வேறு. அவற்றுக்கு pogroms என தனிப்பெயரே சூட்டியிருந்தார்கள்.

போராட்டங்கள், சிறு சந்தோஷங்கள் என்றெல்லாம் காலம் கழிந்துள்ளது. கடைசியில் மாரெக் ஹால்டெரின் தாத்தா போலந்தில் வார்சா கெட்டோ போரில் இறக்கும் வரை கதை தொடர்ந்தது. கிட்டத்தட்ட 2000 ஆண்டுகளுக்கு ஒரு குடும்பத்தின் போராட்டங்களை பார்த்து நிகழ்காலத்துக்கு வந்து சேரும் அனுபவத்தை அப்புத்தகத்தை படித்தால்தான் தெரிந்து கொள்ள இயலும். அடுத்த ஆண்டு பிழைத்து கிடந்தால் யெருசலத்தில் சந்திப்போம் என்றுதான் ஒருவருக்கொருவரிடமிருந்து விடை பெறும்போது அவர்கள் கூறிக் கொள்வார்கள். கடைசியில் 1948-ல் இஸ்ரேல் உருவானது சரித்திரத்தின் ஒரு மகத்தான தருணமே.

விடாமுயற்சிக்கு எடுத்துக் காட்டு இஸ்ரவேலர்கள்.

அன்புடன்,
டோண்டு ராகவன்