நீண்ட இழுபறிக்கு பின் பதவியை துறந்தார் ராஜா: மத்திய அரசுடன் உறவு நீடிக்க கருணாநிதி முடிவு

முதலில் தினமலரில் வந்துள்ள செய்தியை தடித்த சாய்வெழுத்துக்களில் பார்த்து விடுவோம். பிறகு வருவான் டோண்டு ராகவன், வழக்கம்போல.

ஸ்பெக்ட்ரம் ஒதுக்கீடு விவகாரத்தால், எதிர்க்கட்சிகளின் கடும் விமர்சனத்திற்கு உள்ளான மத்திய அமைச்சர் ராஜா, நீண்ட இழுபறிக்குப் பின், தன் பதவியை நேற்றிரவு ராஜினாமா செய்தார். பார்லிமென்ட் இன்று கூடவுள்ள நிலையில், மத்திய அரசுக்கு தர்மசங்கடமான நிலை ஏற்படுவதை தடுக்கவும், மத்திய அரசுடன் சுமுகமான உறவு நீடிக்கவும் கருணாநிதி இந்த முடிவை எடுத்தார்.கருணாநிதியின் உத்தரவையடுத்து, நேற்றிரவு டில்லி சென்ற அமைச்சர் ராஜா, பிரதமரை சந்தித்து ராஜினாமா கடிதத்தை கொடுத்தார்.

"2ஜி ஸ்பெக்ட்ரம்' அலைவரிசை ஒதுக்கீட்டில் மத்திய அரசுக்கு 1.76 லட்சம் கோடி ரூபாய் வருவாய் இழப்பு ஏற்படுத்தியதாக, மத்திய தகவல் தொடர்பு அமைச்சர் ராஜா மீது, மத்திய ஆடிட்டர் ஜெனரல் அலுவலகம் குற்றம் சாட்டியது. கடந்த வாரம் பார்லிமென்டில் இப்பிரச்னை கிளப்பிய பா.ஜ., உள்ளிட்ட எதிர்க்கட்சிகள், கடும் அமளியில் ஈடுபட்டன. இதனால், பார்லி., கூட்டத் தொடர் ஒத்தி வைக்கப்பட்டது.அதேநேரத்தில், "இந்த விவகாரத்தில் ஐக்கிய முற்போக்கு கூட்டணி அரசுக்கு ஆபத்து ஏற்பட்டால், ஆதரவு அளிக்க தயார்' என, அ.தி.முக., பொதுச் செயலர் ஜெயலலிதா அறிவித்ததும், பெரும் பரபரப்பை ஏற்படுத்தியது. ஆனால், மத்திய அமைச்சர் ராஜா, தன் மீதான குற்றச்சாட்டுகளை நிராகரித்தார். "எனக்கு முன் அமைச்சராக இருந்தவர்கள் பின்பற்றிய நடைமுறையத்தான், நானும் பின்பற்றினேன். எந்த முறைகேட்டிலும் ஈடுபடவில்லை. பதவியை ராஜினாமா செய்ய வேண்டிய அவசியமும் இல்லை' என, திட்டவட்டமாக கூறினார். தி.மு.க., மேலிடமும் அவருக்கு ஆதரவாக கருத்து தெரிவித்தது. இந்நிலையில், பார்லிமென்ட் கூட்டத் தொடர் இன்று மீண்டும் கூடவுள்ள நிலையில், "அமைச்சர் ராஜாவை பதவி நீக்கம் செய்யாதவரை, கூட்டத் தொடரை சுமுகமாக நடத்த அனுமதிக்க மாட்டோம்' என, பெரும்பாலான எதிர்க்கட்சிகள் ஒரே குரலில் தெரிவித்தன. பா.ஜ., -மார்க்சிஸ்ட் உள்ளிட்ட கட்சிகள் இதில் தீவிரமாக இருந்தன.

மேலும், "2ஜி ஸ்பெக்ட்ரம்' ஒதுக்கீடு தொடர்பான வழக்கு, சுப்ரீம் கோர்ட்டில் இன்று மீண்டும் விசாரணைக்கு வருகிறது. இந்த வழக்கில் ஏற்கனவே நடந்த விசாரணையின்போது சி.பி.ஐ.,யின் நடவடிக்கைகளை சுப்ரீம் கோர்ட் கண்டித்தது. இதனால், இன்றைய விசாரணையிலும், மத்திய அரசுக்கு எதிராக சுப்ரீம் கோர்ட் கடுமையான கருத்துக்களை தெரிவிக்கலாம் என, எதிர்பார்க்கப்படுகிறது. இதற்கிடையில், ஸ்பெக்ட்ரம் ஒதுக்கீடு தொடர்பாக மத்திய தொலைத்தொடர்புத் துறை முன்னாள் செயலர் டி.எஸ்.மாத்தூரும், அமைச்சர் ராஜாவுக்கு எதிராக நேற்று புகார்களை தெரிவித்தார். அது மத்திய அரசுக்கு மேலும் தர்மசங்கடத்தை ஏற்படுத்தியது. இதனால், பிரச்னைகளை சமாளிப்பதற்கான முயற்சியில் காங்கிரஸ் மேலிடம் நேற்று தீவிரம் காட்டியது. ராஜா விவகாரம் குறித்து, காங்கிரஸ் தலைவர் சோனியா, பிரதமர் மன்மோகன் சிங், நிதி அமைச்சர் பிரணாப் முகர்ஜி, சோனியாவின் அரசியல் ஆலோசகர் அகமது படேல் ஆகியோர் டில்லியில் அவசர ஆலோசனை நடத்தினர். பின்னர் தி.மு.க.,விடமும் அவசர ஆலோசனை நடத்தினர்.

சென்னையில் முதல்வர் கருணாநிதியை நேற்று இருமுறை சந்தித்த அமைச்சர் ராஜா, மாலையில் டில்லி சென்றார். சென்னை விமான நிலையத்தில் பேட்டி அளித்த அவர், "வழக்கமாக தலைவரை சந்திப்பது போலத்தான் இன்றைய சந்திப்பு நடந்தது. நான் ராஜினாமா செய்யத் தேவையில்லை' என்று கூறிவிட்டு புறப்பட்டார். உடனிருந்த முன்னாள் அமைச்சர் டி. ஆர்.பாலு, "பொறுத்திருந்து பாருங்கள்' என்றார்.அதே சமயம், டில்லிக்கு தமிழக அரசின் பிரதிநிதியாக அனுப்பப்பட்ட அமைச்சர் துரைமுருகன், திடீரென சென்னை திரும்ப மேலிடம் உத்தரவிட்டது. தி.மு.க.,வில் முக்கிய முடிவை எடுக்கும் உயர்மட்டக்குழு நேற்று மாலை வரை கூடவில்லை என்றாலும், அரசியல் பரபரப்பு நீடித்தது. டில்லி சென்ற ராஜா, பிரதமர் மன்மோகன் சிங்கை சந்திக்க அவரது இல்லம் சென்றார். அவர் பிரதமர் வீட்டிற்கு செல்கிறார் என்றதுமே டில்லியில் பரபரப்பு கூடியது. அவர் ராஜினாமா செய்யப்போகிறார் என்று செய்தி வெளியானது. பல தரப்பிலும் எதிர்பார்த்தபடி, பிரதமர் மன்மோகன் சிங்கை சந்தித்து ராஜினாமா கடிதம் கொடுத்தார்.

பின்னர் நிருபர்களுக்கு பேட்டி அளித்த ராஜா கூறுகையில்,""எனது கட்சி தலைவர் கருணாநிதி ஆலோசனையின் பேரில் பிரதமரை சந்தித்து ராஜினாமா கடிதத்தை அளித்துள்ளேன். என் மீது குற்றம் இல்லை என்பதை, பார்லிமென்ட்டிலும், நீதிமன்றத்திலும் நிருபிப்பேன் என்பதை பொதுமக்களுக்கு தெரிவித்து கொள்கிறேன். பார்லிமென்ட்டில் எதிர்க்கட்சிகள் கிளப்பும் கேள்விகளுக்கு தக்க பதிலளிப்பேன். எனது பதவிக்காலத்தில் தொலை தொடர்புத் துறை மிகுந்த மிகுந்த வளர்ச்சி அடைந்துள்ளது' என்றார்.

ராஜாவின் ராஜினமாவை ஏற்றுக்கொண்ட பிரதமர், தொலைதொடர்பு துறை இலாகாவை தன் வசமே வைத்துக்கொண்டதாக பிரதமர் அலுவலகம் வெளியிட்ட செய்தி குறிப்பில் தெரிவிக்கப்பட்டது.

ராஜா ராஜினாமாவை தொடர்பாக தி.மு.க., தலைமை கழகம் வெளியிட்ட செய்தி குறிப்பில், "" பார்லிமென்ட்டின் ஜனநாயக நடவடிக்கைகள் தொடர்ந்து நடைபெறவும், நாட்டு மக்களுக்கு தேவையான பிரச்னைகள் விவாதித்து முடிவெடுக்கப்பட வழிவகுத்திடும் வகையில், ராஜா அமைசசர் பொறுப்பிலிருந்து விலகிக்கொள்ள வேண்டுமென்று தி.மு.க., முடிவெடுத்து அவருக்கு அறிவுறுத்தியுள்ளது,'' என, தெரிவிக்கப்பட்டது.

ராஜாவின் ராஜினாமாவை அடுத்து, கடந்த இரண்டு நாட்களாக நீடித்த இழுபறி முடிவுக்கு வந்தது. ராஜா ராஜினாமா செய்துவிட்டாலும், ஸ்பெக்ட்ரம் விவகாரம் குறித்து, பார்லிமென்ட் கூட்டு குழு விசாரணை தேவை என்ற கோரிக்கையில் எதிர்க்கட்சிகள் உறுதியாக இருக்குமென எதிர்பார்க்கப்படுகிறது.
நன்றி: தினமலர்

இதைவிடக் குறைந்த லெவலில் குற்றம் சாட்டப்பட்ட மந்திரிகள் பதவியிழந்திருக்க, ராசா மட்டும் இத்தனை நாட்கள் தாக்குப் பிடித்திருப்பது என்பது அதனுள்ளேயே ஒரு தனி ரிகார்ட் என்றுதான் கூற வேண்டும். ராசா தலித் ஆகவேதான் அவருக்கு எதிராக இத்தனை சதி என்றெல்லாம் கருணாநிதி பிரலாபித்ததெல்லாம் வீணாகப் போயினவா? அல்லது இது வெறும் டேமேஜை லிமிட் செய்யும் நடவடிக்கையா?

பத்திரிகையாளர்களை சந்திக்கும் ராசா தான் பதவி விலகியது தனது தலைவர் டாக்டர் கலைஞரின் அட்வைஸ் பேரிலேயே என்பதை பலமுறை அழுத்திச் சொன்னது ப்ரூட்டஸ் நெம்பவுமே நியாயஸ்தர் என்ற ஆண்டனி சொன்ன ரேஞ்சுக்கு சென்றது.

மேலும் பி.ஜே.பி அரசு ஃபாலோ செய்ததைத்தான் தானும் செய்ததாகக் கூறுகிறார். நடுவில் பல ஆண்டுகள் கடந்த நிலையில் சூழ்நிலைகள் அப்படியே இருக்குமா என்பதைக் கூட வேண்டுமென்றே காணாமல் இருந்துதான் இவர் செயல்பட்டுள்ளார் என்பதுதான் நிஜமாகிறது.

ஆடிட்டர் ஜெனெரல் குறிப்பிட்ட வருவாய் இழப்பான 1,75,000 கோடி ரூபாய் வெறும் பேப்பர் இழப்புத்தான் என கூறப்பட்டாலும், அதை அலட்சியம் செய்யலாகாது என்பதே நிஜம். அத்தனையையும் ராசாவா அடித்துக் கொண்டு போனார் எனக் கேள்வி கேட்பதே அவசியமற்றது. ஏனெனில் அது உண்மையில்லை. ராசா வெறும் முன்னால் வைக்கப்பட்ட சதுரங்கக் காய் மட்டுமே. அவர் பின்னால் இருக்கும் கும்பல்களின் ரேஞ்சே தனி. அது எல்லோருக்கும் தெரியும். அவர் ஒரு பனிப்பாறையின் வெளியே தெரியும் சிறு முனையே. எல்லோருக்கும் பங்கு சென்றிருக்கும் ஆகவேதான் ராசா இத்தனை நாள் குப்பை கொட்ட முடிந்தது.

இங்கு மோதி அவர்களை நான் இழுக்கிறேன். துக்ளக் 2008 மீட்டிங்கில் அவர் அளித்த ஒரு தகவல் சுவாரசியமானது. அவர் என்ன சொன்னாரென்றால், “அரசு மனம் வைத்தால் வருவாயையும் பெருக்க இயலும் என்றார். ஆனால் அது லஞ்சத்தை ஒழித்தால்தான் முடியும் என்றார். உதாரணத்துக்கு மஹாராஷ்டிரம் மற்றும் குஜராத் வழியில் செல்லும் நெடுஞ்சாலையில் குஜராத் பக்கத்தில் ஒரு எல்லை செக்போஸ்ட் உண்டு, மஹாராஷ்ட்ரா பக்கத்தில் ஒரு செக்போஸ்ட் உண்டு. இரண்டிலும் ஒரே அளவு வண்டிகள் போக்குவரத்துதான். குஜராத் தரப்பினர் சட்ட பூர்வமாக கலெக்ட் செய்வது மஹாராஷ்ட்ரா தரப்பில் உள்ளதை விட 239 கோடியே 60 லட்சம் ரூபாய் அதிகம் எனக் கூறினார் (எவ்வளவு காலக்கட்டம் என்பதை சரியாக கேட்க இயலவில்லை லௌட்ஸ்பீக்கர் சதி செய்தது). ஆனால் மிகவும் அதிகம் அது, சட்டப்படி என்னவெல்லாம் வருமானம் அரசுக்கு வரக்கூடும் என்பதை அது தெளிவாகக் காட்டுகிறது. ஆனால் அதெல்லாம் செய்யாது விட்டால் கீழ்மட்டத்திலிருந்து மேல் மட்டம் வரை அதிகாரிகள், மந்திரிகள் ஆகியோரது தனிப்பட்ட பணப்பைதான் நிறைகிறது என்பதை புரிந்து கொள்ள வேண்டும்.

இப்போதுதான் இதை ஊர்ஜிதம் செய்ய சம்பந்தட்டப்பட்ட வீடியோவை மீண்டும் பார்த்தேன். அதில் நான்காண்டுகாலம் எனக்குறிப்பிட்டுள்ளனர். ஆகா ஆண்டுக்கு 50 கோடிக்கு மேல், அதுவும் ஒரே ஒரு செக்போஸ்டில். நீங்களே அந்த வீடியோவை இங்கே பாருங்களேன்.



மோடிக்கு முந்தைய மந்திரி சபைகள் வருவாய் இழப்பைத்தானே செய்தன எனக்கூறி அவருமா அவ்வாறு செய்தார்? ஜோதிக்ராம் திட்டம் நடக்காது என பழைய முன்னுதாரணக்களைக் கூறி அவருக்கு அட்வைஸ் செய்தவர்கள் அனேகம், அவர்களில் காங்கிரசைச் சேர்ந்த முன்னாள் குஜராத் மந்திரிகளும் அடங்குவர். ஆனால் என்ன அக்கிரமம், மனிதர் கேட்கவில்லையே. அந்தத் திட்டத்தை வெற்றிகரமாக நிறைவேற்றி எல்லோர் முகத்திலும் கரியைப் பூசிவிட்டாரே. ஆகவேதான் அவருக்கு எதிர்ப்பு அதிகமோ?

ஆக, வருவாய் இழப்பு என்பது வெறும் பேப்பர் எண்ணிக்கை அல்ல. அதற்கு யதார்த்தமும் உண்டு. ஆகவே ராசா அதை எடுத்துச் சென்றாரா என்றெல்லாம் கேள்வி கேட்பது அபத்தத்திலும் அபத்தம்.

அன்புடன்,
டோண்டு ராகவன்