நங்கநல்லூர் பஞ்சாமிர்தம் - 02.08.2009

எஸ்கலேஷன்
எல்லாவித ஒப்பந்தங்களிலும் காணப்படும் முக்கிய ஷரத்து எஸ்கலேஷன் ஷரத்து எனப்படும். இந்த எஸ்கலேஷனுக்கு தமிழில் என்ன சொல்லலாம் என யோசித்து கொண்டிருக்கிறேன். இப்பதிவை எழுதும்போது இது பற்றிய சிந்தனை ஆழ்மனதில் ஓடுமாறு ஆணை பிறப்பித்துவிட்டு மேலே எழுதுகிறேன். எழுதி முடிப்பதற்குள் பதில் மனதுக்கு தோன்றி விடும் மொழிபெயர்ப்பை கூறிவிடலாம் என நினைக்கிறேன்.

முதலில் எஸ்கலேஷன் என்றால் ஒப்பந்தங்களில் அது எவ்வாறு பொருள் கொள்ளப்படுகிறது என்பதை பார்ப்போம். ஒப்பந்தம் செய்யும் இரு/எல்லா தரப்பினரும் தத்தம் சார்பில் அந்த ஒப்பந்தம் சம்பந்தமாக பதில் சொல்லுதல்/கேள்வி கேட்டல் ஆகிய காரியங்களுக்கு ஒரு அதிகாரியை பெயர் மற்றும் அவர் பதவியை குறிப்பிட்டு நியமிப்பார்கள். உதாரணத்துக்கு மன்னார் கம்பெனிக்கும் ராஜமன்னார் கம்பெனிக்கும் ஒப்பந்தம் என வைத்துக் கொள்வோம். ராஜமன்னார் மன்னாருக்கு ஒரு தொழில்நுட்பத்தை விலைக்கு தருகிறது. அத்துடன் அந்த தொழில்நுட்பத்தை மன்னார் கம்பெனியின் தளத்தில் நிறுவவும் செய்கிறது. சில காலகட்டத்துக்கு அதை நடாத்தியும் தருகிறது. இதற்கிடையே அதே நேரத்தில் மன்னார் கம்பெனியின் ஊழியர்களுக்கு அந்த தொழில்நுட்பத்தை நடாத்தவும் பயிற்சி தருகிறது.

இப்போது இரு கம்பெனிகளுக்குமிடையே கருத்து பரிவர்த்தனை நடக்கும். சில தகவல் அறிதலுக்காக இருக்கும், சில புகார்களாக இருக்கும். இதையெல்லாவற்றையும் ஒருங்கிணைக்க அதற்கென இரு கம்பனிகளிலும் மேலே சொன்னது போல ஆட்களை நியமித்திருப்பார்கள். அவர்களை தொடர்பாளிகள் (contact persons) என அழைப்பார்கள். அவர்களே நல்ல சீனியாரிட்டியோடு இருப்பவர்கள்தாம். அவர்களுக்கு வரும் கேள்விகளுக்கு தத்தம் கம்பெனிகளில் பேசியோ அல்லது தனக்கே தனிப்பட்ட முறையில் தரிந்ததை வைத்தோ குறிப்பிட்ட நேரத்தில் பதில் சொல்ல வேண்டியது.

குறிப்பிட்ட நேரத்தில் பதில் தராவிட்டால் கேள்வி கேட்ட தரப்பு அந்த தொடர்பு அதிகாரியின் மேலதிகாரிக்கு தகவல் அனுப்பும். அங்கிருந்து பதில் வர இன்னும் அவகாசம் தரப்படும். அங்கும் பதில் கிடைக்காவிடில் அவருக்கும் மேல் அதிகாரிக்கு புகார் போகும். இது ஒப்பந்தத்தில் கையெழுத்திட்ட எல்லா தரப்பினரது கம்பெனிகளிலும் நடக்கும். ஆக இம்மாதிரி மேலே மேலே போவதைத்தான் எஸ்கலேஷன் என்பார்கள். அந்த எஸ்கலேஷனில் யார் யார் இருப்பார்கள், எஸ்கலேஷன் காலநிரல் என்ன என்பதையும் ஒப்பந்தத்திலேயே கூறுவார்கள். இதையெல்லாம் கூறும் ஷரத்துதான் எஸ்கலேஷன் ஷரத்து.

இதை தமிழில் நான் புகார்/கோரிக்கை அளித்தலின் ஏறுவரிசை ஷரத்து என்று மொழிபெயர்க்கலாம் என நினைக்கிறேன்.

ராகவன் ஒழிக
நான் சமீபத்தில் 1955-56 கல்வியாண்டில் சென்னை திருவல்லிக்கேணி ஹிந்து உயர்நிலை பள்ளியில் ஐந்தாம் வகுப்பில் A செக்‌ஷனில் படிக்கையில் (வகுப்பாசிரியர் ரங்காராவ் சார்) திடீரென ஒழிக கோஷங்கள் சுவர்களில் எழுதப்பட்டன. முதலில் டி.ஆர். ராதாகிருஷ்ணன் ஏ.பாலசுப்பிரமணியம் ஒழிக என எழுதினான். அவன் கையெழுத்தை அடையாளம் கண்டு கொண்ட ஏ. பாலசுப்பிரமணியன் டி.ஆர். ராதாகிருஷ்ணன் ஒழிக என எழுதினான். பார்த்து கொண்டிருக்கும்போதே அவன் ஒழிக, இவன் ஒழிக என்றெல்லாம் சுவர்களில் எழுத ஆரம்பித்து விட்டார்கள். அதிர்ஷ்டவசமாக நான் இதில் சிக்கவில்லை.

சில நாட்கள் எல்லாவற்றையும் வேடிக்கை பார்த்து விட்டு சிரித்து கொண்டிருந்தேன். திடீரென வரதராஜன் ஓடி வந்து “டேய் ராகவா, ராகவன் ஒழிகன்னு யாரோ எழுதியிருக்காங்கடா என்றான். போய் பார்த்து விட்டு அதனால் என்ன, ராகவன் என்றால் நான் மட்டும்தானா என சமாதானம் செய்து கொண்டேன். வரதராஜனிடமும் அவ்வாறே கூறினேன். இரண்டு நாட்களிலேயே என். ராகவன் ஒழிக என எழுதப்பட்டிருந்தது கண்டு முதலில் துணுக்குற்றாலும் வேறு யாராவது என். ராகவனாயிருக்கும் என எண்ணி சமாதானமானேன். ஆனால் கடைசியில் 5A. என்.ராகவன் ஒழிக என்ற செய்தியுடன் வரதராஜன் வந்ததும் அசடு வழிந்தேன்.

இங்கு/இப்போது ஏன் அந்த விஷயம் ஞாபகத்துக்கு வர வேண்டும்? எஸ்கலேஷன் ஷரத்துக்கு தமிழாக்கத்தை தேட நான் ஆணை பிறப்பித்த எனது ஆழ்மனதானது கொசுறாக இந்த நிகழ்ச்சியையும் என் நினைவிலிருந்து தோண்டி எடுத்து வெளியே போட்டது. யோசித்து பார்த்தால் இதுவும் ஒரு எஸ்கலேஷன் விஷயம்தானே?

இப்போது ஒரு சிறு சம்சயம். ஒருவேளை இங்கு பிரஸ்தாபிக்கப்பட்ட அந்த வரதராஜன் ஏதேனும் விஷமம் செய்திருப்பானோ?

அன்புடன்,
டோண்டு ராகவன்