நங்கநல்லூர் பஞ்சாமிர்தம் - 07.08.2009

பெரியாரின் எழுத்துகளுக்கான உரிமை சண்டை
பார்க்கவே தமாஷாக இருக்கிறது. சமயசந்தர்ப்பத்துக்கேற்ப, தனது அவ்வப்போதைய அரசியல் நிலைமையை வைத்து பெரியார் அவர்கள் எழுதியதை வெளியிட வீரமணி அவர்களுக்கு மட்டும்தான் உரிமையாம் என்ற நோக்கத்தில் அவர் கோர்ட் தடை வாங்கியது குறித்து அழுவதா சிரிப்பதா எனத் தெரியவில்லை. பெரியாரின் எழுத்துக்களை போட்டியாளர் வெளியிட்டால் அவர் அதிக பணம் சம்பாதித்து விடுவார், தனக்கு பண நஷ்டம் வரும் என தனது கோரிக்கையில் வீரமணி அவர்கள் கூறியிருப்பதாக படித்தேன்.

இப்போதுதான் தமிழ் ஓவியா பெரியாரின் கருத்துகளை எல்லாம் இம்மாதிரி சகட்டு மேனிக்கு காப்பி பேஸ்ட் செய்து போடுகிறாரே, ஆனால் அவற்றை படிக்கத்தான் மக்கள் தயாராக இல்லை. அவரோ என் கடமை காப்பி பேஸ்ட் செய்து கிடப்பதே என்று இருக்கிறார். நிற்க.

இந்த அழகில் போட்டியாளர்கள் வெளியிட்டு, அதனால் பணம் சம்பாதித்து என ஓவர்டைம் போட்டு கவலைப்படுகிறார்கள். அதை என்னவென்று கூறுவது? எனக்கு என்ன படுகிறதென்றால், பெரியார் அவர்களது முழு எழுத்துக்களும் வெளியே வந்தால், அவற்றையும் யாரேனும் படிக்க நேர்ந்தால் துணியை கிழித்து கொண்டு ஓடப்போவது உறுதி. சும்மா சொல்லப்படாது. மனிதர் மனதுக்கு தோன்றியவாறெல்லாம் பேசியுள்ளார். தான் ஏற்கனவே கூறிக் கொண்டதற்கு முரணாக வந்தாலும் அவர் கவலைப்பட்டதாகத் தெரியவில்லை. ஆக, அவற்றை வெளியிட அனுமதி தராது வீரமணி அவர்கள் பெரியார் பெயரை மேலும் டேமேஜ் ஆகவிடாமல்தான் தடுக்கிறார் என்றுதான் எனக்கு படுகிறது. இது அவரது நோக்கம் எனக் கூற மாட்டேன். ஆனால் விளைவு என்னவோ நான் சொன்னதுதான்.

எஸ்.வி. சேகர்
எஸ்.வி. சேகர் அதிமுகவில் சேர்ந்தபோது நான் மிகவும் வியப்படைந்தேன். தொண்ணூறுகளில் அவரது நாடகம் “தத்துப்பிள்ளை” வந்தது. அதில் வரும் வில்லி பாத்திரம் ஜெயலலிதாவை நினைவுறுத்துவதாக அமைந்தது. அதை ஜெயலலிதா பார்க்கவில்லை போலும். அதனால்தான் சேகரை சேர்த்து கொண்டார் என நினைக்கிறேன். அந்த நாடகம் பற்றி சில வரிகள்.

முக்கியப் பாத்திரமே ஒரு பெண் அரசியல்வாதிதான். அவரது செயல்பாடுகளில் முக்கியமானது கண்ணில் கண்ட சொத்துக்களையெல்லாம் வளைத்து போடுவது. அவரது தம்பியாக எஸ்.வி.சேகர் வருகிறார். அவருக்கு எல்லா விதத்திலும் உதவியாக இருக்கிறார். ஆனாலும் நல்லவர் என கதை அமைந்திருக்கிறது. அப்பெண்மணி அடிக்கடி ஒரு போலி சாமியாரிடம் ஆலோசனை கேட்கிறார். ஒரு நல்ல இடத்தை தான் பார்த்ததாகவும் ஆனால் தனது தம்பி அதை தனக்கு முடித்து தரவில்லை என்றும் சாமியாரிடம் குறையாக கூறுகிறார். எஸ்.வி.சேகரோ அக்கா குறிப்பிட்ட இடம் மெரீனா பீச் என்றும் அதையெல்லாம் வளைத்து போட முடியாது என்றும், வேண்டுமானால் அந்த இடத்தில் சைக்கிள் ஸ்டாண்ட் வைக்கும் காண்ட்ராக்ட் முயற்சிக்கலாம் எனக்கூற நாடகம் கலகலப்பாக செல்கிறது.

இதனால் எல்லாம் அப்பெண்மணி ஜெயை நினைவுபடுத்திவிடுவாரா என்பவர்க்கு இந்த டயலாக் தருகிறேன். அப்பெண்மணியின் கணவர் சரியாக சமையல் செய்யவில்லை என அப்பெண் சலிப்புடன் பேச, அதென்ன விவரம் என சேகர் கேட்க, தான் காலையில் செய்த சிற்றுண்டிதான் அவளுக்கு பிடிக்கவில்லை என கணவர் கூறுகிறார். அப்படியென்ன டிபன் செய்தார் எனக் கேட்க, “சென்னா, ரொட்டி” என கணவர் கூற, சென்னாரொட்டிதான் அக்காவுக்கு பிடிக்கவே பிடிக்காதே என எஸ்.வி. சேகர் கூற, நாடகத்தை பார்ப்பவர் மத்தியில் இன்னொரு குபீர் சிரிப்பு. இந்த ஜோக் புரியாதவர்களுக்கு நான் அதை விளக்கிக் கொண்டிருக்கப் போவதில்லை.

எது எப்படியோ, சேகர் அதிமுகவில் சேர்ந்தது ஒரு விபத்து என்றுதான் எனக்கு படுகிறது. அவருடைய மனோபாவத்துக்கும் அதிமுக அடிப்பொடிகளுக்குத் தேவையான காலில் விழும் கலாச்சாரத்துக்கும் ஸ்நான பிராப்தி கூட கிடையாது என்றுதான் கூறவேண்டும்.

ஐ.டி.ஐ. புத்தகங்களின் மொழிபெயர்ப்பு
இன்று ஒரு மத்திய அரசு அமைப்பின் டெபுடி டைரக்டருடனும் அவர் கீழ் வேலை செய்யும் துணை டைரக்டருடனும் இது சம்பந்தமாக பேசிக் கொண்டிருந்தேன். ஆங்கிலத்தில் உள்ள புத்தகங்களுக்கு ஹிந்தி மொழிபெயர்ப்பு தேவை என என்னிடம் கூறினார்கள். அது நம்மால் ஆகாது என மரியாதையாக கூறிவிட்டேன். ஏனெனில் அந்த வேலைக்கு முக்கியத் தேவையே ஹிந்தி அருங்கலைச்சொல் அகரமுதலி. அது என் வசம் இல்லை. அதுவும் ஐ.டி.ஐ. புத்தகங்களின் பாடங்கள் வெவ்வேறு தொழில்நுட்பம் சம்பந்தப்பட்டவை. தமிழிலும் வேண்டுமென என்னிடம் கேட்க, அது வேண்டுமானால் செய்து தருகிறேன் என்றேன். எப்போது ஆரம்பிப்பீர்கள் என என்னை கேட்க, முதலில் அவர்கள் தரும் ரேட் என்ன என கேட்டேன். டெபுடி டைரக்டர் பெருமையுடன் அப்போதுதான் ரேட்டை ரிவைஸ் செய்தார்கள் எனக் கூறிவிட்டு, அதை கூறினார். நான் வழக்கமாக வாங்கும் ரேட்டில் பத்தில் ஒரு பங்கு கூட இல்லை. இது எனக்கு கட்டுப்படியாகாது எனக் கூறிவிட்டு வந்தேன்.

அரசின் சாபக்கேடு என்றுதான் இதை கூறவேண்டும். அரசு முழுநேர ஊழியர்கள் சம்பளம் என்னவோ மிக அதிகம். ஆனால் இம்மாதிரி அவுட்சோர்ஸ் செய்து தரப்படும் வேலைகளுக்கு என்னவோ அடிமாட்டு ரேட்தான். மத்திய அரசில் CSIR கீழ் செயல்படும் Insdoc இம்மாதிரி தொழில்நுட்ப கட்டுரைகளை மொழிபெயர்க்கும் வேலைகளை எடுத்து செய்கிறது. அதனிடம் முழுநேர மொழிபெயர்ப்பாளர்கள் உண்டு. அவர்கள் சம்பளம் மிகவும் அதிகம். ஆனால் ஓபி அடித்து கொண்டிருப்பார்கள். எங்களை மாதிரி பேனல் மொழிபெயர்ப்பாளர்கள்தான் பெரும்பாலான வேலையெல்லாம் செய்வோம். எங்களுக்கு தரும் ரேட்களோ மிகவும் குறைவே. ஆனால் எண்பதுகளில் என்ன நிலை என்றால் மொழிபெயர்ப்பு வேலைகள் கிட்டத்தட்ட எல்லாமே அரசு வாரியங்களுக்குத்தான் வரும். அவையும் இன்ஸ்டாக்குத்தான் தரப்படும். தனியார் நிறுவனங்களின் தேவை அவ்வளவாக இருக்காது. ஆகவே நான் தில்லியில் இருந்தபோது 1981-முதல் 1991 வரை இன்ஸ்டாக்தான் எனது வேலைகளில் பாதிக்கு மேல் கொடுத்தது. 1991-க்கு பிறகு உலகமயமாக்கல் ஆரம்பித்ததும் நிலைமை மெதுவாக மாறத் துவங்கியது. இப்போது என்ன நிலை என்றால் இன்ஸ்டாக்கில் உள்ள முழுநேர மொழிபெயர்ப்பாளர்கள் இப்போது பழைய அளவுக்கு இல்லை என்றுதான் கூறவேண்டும்.

ஆனால் ஒன்று இன்ஸ்டாக் ஒரு சிறந்த ஐடியா. நடத்த வேண்டியபடி நடத்தியிருந்தால் அது இப்போதும் செயல்பட்டு கொண்டிருக்க வேண்டும். ஆனால் பொதுவான அலட்சியத்தால் அவ்வாறு நடக்கவில்லை. என்னை பொருத்தவரை அடிமாட்டு விலைக்கு நான் வேலை செய்தது குறித்து வருந்தவில்லை. ஏனெனில் அது எனக்கு அற்புதமான அனுபவத்தை கொடுத்தது. அதுவும் மொழிபெயர்ப்புக்காக வரும் கட்டுரைகள் பல்வேறு துறைகளை சார்ந்தவை. ஆகவே எனது மொழிபெயர்ப்பின் வீச்சும் அதிகமாயிற்று. இப்போது தைரியமாக தேவையான ரேட்டுக்காக பேரம் பேச முடிகிறது. ஆகவே தனிப்பட்ட முறையில் நான் கூற விரும்புவது, “Hats off Insdoc"!

தகவல் திருட்டு
சர்வதேச மொழிபெயர்ப்பாளர் தலைவாசலாம் ப்ரோஸ்.காம்-ல் இப்போது ஒரு பிரச்சினை கடந்த சில வாரங்களாக சூடுபறக்க விவாதிக்கப்பட்டுக் கொண்டு வருகிறது. பயனர்களின் தகவல்கள் இன்னொரு தளத்தால் ஹேக் செய்யப்பட்டு அவர்கள் பெயரில் போலி ப்ரொஃபைல்கள் உருவாக்கப்பட்டுள்ளன. அவரவர் இப்போது லபோ லபோ என அடித்து கொள்கின்றனர். தலைவாசலின் அதிபர் பேய்முழி முழிக்கிறார். பார்க்க பாவமாக இருக்கிறது. அவரை எனக்கு தனிப்பட்ட முறையில் பிடிக்கும். என்னதான் இருந்தாலும் எனக்கு பணம் வாங்காமல் பிளேட்டினம் மெம்பர்ஷிப் தந்தவரல்லவா? ஆனாலும் என்ன செய்வது, அதுதான் வாழ்க்கை. இப்பிரச்சினையிலிருந்து அத்தலைவாசல் இழப்பின்றி மீண்டு வரவேண்டும் என இறைவனை வேண்டி கொள்கிறேன்.

அன்புடன்,
டோண்டு ராகவன்