வி.பி. சிங் பற்றி சில வார்த்தைகள் கூறுவது டோண்டு ராகவன்

சோ அவர்களது எல்லா கருத்துகளையும் இந்த டோண்டு ராகவன் அப்படியே ஏற்றுக் கொள்வான் என்பது தமிழ்ப் பதிவர்கள் அத்தனை பேருக்கும் தெரிந்ததே. தெரியாத சில விஷயங்களும் உண்டு. சில சமயங்களில் சோ அவர்களது கருத்தை நான் முதலில் ஆதரிக்கவில்லை. அவற்றில் இரண்டு முக்கிய விஷயங்கள் புலிகள் மற்றும் வி.சிங் பற்றியவை. எண்பதுகளின் ஆரம்பத்தில் தமிழகத்தில் கிட்டத்தட்ட அத்தனை பேரும் புலிகள் ஆதரவு நிலை எடுத்திருக்க (நான் உட்பட) சோ அவர்கள் மட்டும் அவர்களை முதலிலிருந்தே சரியாகக் கண்டு கொண்டதை காலப்போக்கில் நானும் அறிந்து எனது நிலைப்பாட்டை மாற்றிக் கொண்டேன். அது பற்றிப் பிறகு வேறு ஒரு பதிவில் பார்ப்போம்.

வி.பி. சிங் விஷயமும் அவ்வாறே. முதன் முதலில் அவர் ராஜீவ் மந்திரிசபையில் நிதி அமைச்சராக வந்தபோது நானும் மற்றவர்களைப் போலவே அவரை திருவாளர் சுத்தம் என்பதாகவே கணித்திருந்தேன். என்ன சோ இப்படி பேசுகிறாரே/எழுதுகிறாரே என்று திகைப்பும் அடைந்தேன்.

வி.பி. சிங் பற்றி சோ கூறியதை முதலில் பார்ப்போம்.

"வி.பி. சிங் செயலாக இருந்தக் காலக்கட்டம் ஒரு aberration. நான் முதலிலிருந்தே அவரை எதிர்த்து வந்திருக்கிறேன். என்ன, நான் பாரபட்சமாகப் பேசுகிறேன் என நினைப்பது உங்கள் உரிமை. காங்கிரசிலிருந்து வெளியேறியதிலிருந்தே, ஏன் அதற்கு முன்பாகவும் கூட நான் அவரை அதிகமாகவே விமரிசனம் செய்து வந்துள்ளேன். அவரிடம் ஜாக்கிரதையாக நடந்து கொள்ளும்படி சந்திரசேகர், ஹெக்டே, ஜனதா கட்சியில் உள்ள எனது நண்பர்கள் என எல்லோரையும் எச்சரித்தேன்.

ஆனால் அவர்களோ வி.பி. சிங் எதிர்க்கட்சிகள் ஒன்றுபட்டு மத்தியில் ஆட்சியை அமைக்க வேண்டும் என்று மட்டும் விரும்பியதாகவும், தானே பிரதமராகவெல்லாம் ஆசைப்படவில்லை என்ற ரேஞ்சில் மட்டுமே சிந்தித்தனர். ஆனால் நானோ அப்படியில்லை விஷயம் என்றுதான் கூறிவந்தேன். தான் என்னவோ விருப்பமேயின்றி பிரதமராவது போன்ற டிராமாவெல்லாம் போடுவார் என்றும் கூறினேன். அதே போல பிரதமரைத் தேர்ந்தெடுக்கும் சமயம் சந்திரசேகர் முதுகில் குத்தி வி.பி. சிங்கை பிரதமராக தெரிவு செய்ய உதவிய தேவிலால்தான் வி.பி. சிங்கையும் பிறகு கவிழ்த்து சந்திரசேகர் பிரதமராக வழி செய்யப் போகிறார் என்றும் கூறிய ஒரே பத்திரிகையாளனும் நான்தான். கடைசியில் நான் சொன்னபடித்தான் நடந்தது”.

சோ சொன்னது 100 சதவிகிதம் முற்றிலும் உண்மை. நான் அக்காலக் கட்டங்களிலேயே இதையெல்லாம் துக்ளக்கில் படித்துள்ளேன். பிறகுதான் வி.பி. சிங் பற்றி எனது கருத்தும் அப்படியே எதிராக மாறியது. அவரைப் பற்றி பற்றி சோ மேலும் சொன்னதில் சிலவற்றை இப்போது பார்ப்போம்.

தான் ராஜீவின் மந்திரி சபையில் அங்கம் வகித்தபோதே பிரதமரைக் கண்காணிக்க வெளி ஏஜென்ஸியின் துணையை இவர் நாடியிருக்கிறார். இதைவிட பெரிய துரோகம் இருக்க முடியாது. அப்போதிலிருந்தே இவரை அபாயமானவர் எனக் கணித்ததாக சோ அவர்கள் கூறியுள்ளார். பிற்படுத்தப்பட்ட வகுப்பினர் நலனில் எல்லாம் இவருக்கு உண்மையான அக்கறையில்லை. ரொம்ப நாளாக கிடப்பில் கிடந்த மண்டல் கமிஷன் அறிக்கையை இவர் தூசி தட்டி எடுத்ததற்கு முக்கியக் காரணமே பா.ஜ.க.வுக்கும் அவருக்கும் இடையே வந்த கருத்து வேற்றுமை மட்டுமே. அக்கட்சியினரிடமிருந்து பிற்படுத்தப்பட்டோரின் வோட்டுகளை பிரிக்க அவர் செய்த யுக்திதான் இது.

இப்போது டோண்டு ராகவன்.

ஆனால் மண்டல் கமிஷனால் அவருக்கு பிரயோசனம் ஏதும் லேது என்பதே பெரிய நகைமுரண். பல ஆண்டுகளாக கிடப்பில் இருந்த அறிக்கையை, ஆழ்ந்து படிக்காது அதிலுள்ள விஷயங்களை இற்றைப்படுத்தாது அப்படியே அமலாக்கி சொதப்பியதால் வந்த விளைவுகள் இன்னமும் நம்மிடையே உள்ளன. மண்டல் அந்த அறிக்கையை தயாரித்த சமயத்திலேயே அவர் பயன்படுத்திய தரவுதளங்கள் கிட்டத்த 40 ஆண்டுகள் பழமையானவை. ஆக அவர் அறிக்கையை தயார் செய்த சமயத்திலேயே அது காலாவதியான விசித்திரமும் நடந்தது. அதைப் போய் வைத்து வி.பி. சிங் குண்டுச்சட்டியில் குதிரை ஓட்டியது பற்றி அதனால் வந்த விளைவுகள் சீரியசாக இல்லாதிருந்தால் நாம் இப்போது சிரித்திருக்கலாம். ஆனால் விளைவுகள் பயங்கரமாகப் போனதில் அதுவும் நாம் செய்ய இயலாது.

இப்போது என்ன ஆயிற்றென்றால் பள்ளிச் சிறுவர்களும் ஜாதி பற்றி பேச ஆரம்பித்து விட்டார்கள். தனது குறுகிய சுயநலனுக்காக இந்த மனிதர் நாட்டையே அடமானம் வைத்து விட்டார் என்றுதான் கூறவேண்டும். பாஜக ஆதரவை நீக்கியவுடன் குதிரை வியாபாரத்தில் ஈடுபட்டு எப்படியாவது தனது பதவியை தக்கவைத்துக் கொள்ள அவர் செய்த முயற்சிகள் வெற்றி பெறவில்லை என்பதிலும் சற்றே ஆறுதல்.

தான் பிரதமராக இருந்தபோது ராஜீவுக்கு தந்த பாதுகாப்புகளை பெருமளவுக்கு குறைத்ததும் இவர் செய்த இன்னொரு குளறுபடி. அதே ராஜீவ் பாதுகாப்பு குறைபாட்டால் இறந்ததும் எல்லா முன்னாள் பிரதமர்களுக்கும் பாதுகாப்பு அதிகப்படுத்தப்பட, அதனாலும் மிக அதிகப் பயன் அடைந்ததும் இந்த மனிதர்தான்.

அன்புடன்,
டோண்டு ராகவன்