நங்கநல்லூர் பஞ்சாமிர்தம் - 05.12.2009

அப்பாடா கோலங்கள் சீரியல் முடிந்தது
என்னதான் திட்டினாலும் அதை பார்க்காமல் இருக்க முடியவில்லை என்றால் அதன் நேர்த்தியான தயாரிப்பைத்தான் கூற வேண்டும். அதன் 1533 எபிசோடுகளில் நான் வேண்டுமென்றே பார்க்காமல் விட்டவை சில நூறுகள் இருக்கும். தேவையில்லாமல் காம்ப்ளிகேஷன்களை வளர்த்துப் போவதாக எனக்கு தோன்றியபோதெல்லாம் நான் சீரியலைப் பார்க்காமல் தவிர்த்தேன்.

பாலசந்தருக்கு அடுத்தபடியாக பெண் கதாபாத்திரங்களுக்கு கொடுமை செய்பவர் என திருச்செல்வத்தை கண்டிப்பாக குறிப்பிடலாம். அபி கல்யாணம் செய்து கொள்ளக்கூடாது என்றே அவர் தீர்மானம் செய்து விட்டார். அபிக்கு ஏற்ற ஜோடி தொல்காப்பியன் என்பதை கடைசி எபிசோடிலாவது ஒத்துக் கொண்டு அவர்கள் திருமணத்தை நடத்தி வைத்திருக்கலாம்.

அவர் செய்த இன்னொரு அலம்பல் தேவையின்றி இலங்கைப் பிரச்சினையினை உள்ளே நுழைத்ததுதான். ஓக்கே, ஒக்கே, டி.ஆர்.பி. ரேட்டிங்காய நமஹ. அதை வைத்து கொண்டு சிலர் குதூகலித்ததுதான் பெரிய காமெடி.

நான் தொல்காப்பியனைக் கேட்ட கேள்வி பதிவின் கடைசி பின்னூட்டத்தில் கச்சிதமாக முடித்திருக்க வேண்டிய சீரியல்களை ஜவ்வு மாதிரி இழுத்தது பற்றி குறிப்பிட்டிருந்தேன். அது இந்த சீரியலுக்கும் பொருந்தும். இரண்டு ஆண்டுகளுக்கு முன்பே முடித்திருக்க வேண்டியது.

இத்தருணத்தில் சோ அவர்களது எங்கே பிராமணன் சீரியலை குறிப்பிட்டே ஆக வேண்டும். கச்சிதமாக 103 எபிசோடுகளில் அது முடிக்கப்பட்டது. இத்தனைக்கும் ஜெயா டிவியில் அதை நீடிக்குமாறு கேட்டுக் கொண்டும் சோ அவர்கள் ஒத்துக் கொள்ளவில்லை. சாத்திரம் சொன்னதில்லை நாடகத்தைச் சேர்த்ததும் பொருத்தமாகவே இருந்தது. என்ன, இரண்டு நாடகங்களிலும் வரும் அரசியல்வாதி கேரக்டர் ஒன்றுக்கொன்று சற்றே முரணாக இருந்தன. அதன் இரண்டாம் பகுதி வரப்போகிறதாம். அதுவும் அதே மாதிரி கச்சிதமாகத் தயாரிக்கப்படும் என நம்புவோம்.

காஞ்சி அர்ச்சகர் தேவநாதன் விவகாரம்
ரொம்பக் கேவலமான செயல் செய்துள்ளான் தேவநாதன். அதுவும் கோவில் கருவறையில் செய்தது அசிங்கத்தின் உச்சக்கட்டம். கடுமையாக தண்டிக்கப்படவேண்டியவன் அவன். செல்பேசியில் எடுத்து சிடிக்கள் விற்பனைக்கு காரணமானது வேறு சைபர் கிரைமில் வரும்.

அவன் வாக்குமூலத்தைப் பார்த்தால் அவனுடன் ஒத்துழைத்த பெண்களும் லேசுப்பட்டவர்கள் இல்லைதான். நான் வேறு தருணத்தில் குறிப்பிட்டது போல பாலியல் செயல்பாடுகள் அவற்றைப் பொருத்தவரை மனம் ஒத்து வயது வந்த இருவர் ஈடுபடுவதால் குற்றத்துக்குரிய செயல் இல்லை, அதாவது cognizable offence இல்லை. செய்த இடம்தான் ஆட்சேபணைக்குரியது. வேண்டுமென்றால் தேவநாதனின் மனைவியோ அல்லது அவனுடன் சேர்ந்து செயல்பட்ட பெண்களின் கணவர்மார்களோதான் புகார் செய்ய இயலும்.

ஆனால் விநாச காலே விபரீத புத்தி என்பதற்கேற்ப தேவநாதனுக்கு அவற்றையெல்லாம் செல்பேசியில் பதிவு செய்யத் தோன்றியிருக்கிறது என்பதுதான் கடவுள் செயல். அதுவே அவன் பிடிபடவும் காரணமாகி விட்டது. நிக்சன் மாட்டிக் கொண்டதும் இப்படித்தான்.

ராமாயணத்தில் ஒரு காட்சி
கடைசி நாள் யுத்தம். ராவணன் சிவபெருமானை வணங்க வருகிறான். மண்டோதரி எடுக்கும் ஆரத்தி அணைந்து தட்டு கீழே விழுகிறது. ராவணன் சிவனைப் பார்த்து கத்துகிறான்.

“மஹாதேவரே, நீங்கள் என்னைக் கைவிட்டதை உணர்கிறேன். நான் உங்களிடமும் பிரும்மனிடமும் பெற்ற வரங்கள் சும்மா வந்ததில்லை. அதற்காக நான் கடும் தபஸ் செய்தேன். ஆகவே அவற்றைக் கொடுப்பதைத் தவிர உங்களுக்கு வேறு வழி இல்லைதானே.

இருப்பினும் இவ்வளவு வரங்கள் கொடுத்தாலும் அவற்றுடன் கூடவே எங்களுக்கு கர்வம் என்னும் கொடிய மருந்தையும் தந்து விடுகிறீர்கள். அவற்றால் நாங்கள் பீடிக்கப்பட்டு தவறுகள் பல செய்து வரங்களின் பலன்களை வீணாக்குகிறோம். அவை தீர்ந்ததும் இம்மாதிரி நிலைதான் எங்களுக்கு. சரி, போகட்டும். அந்த வரங்களை நான் எவ்வளவு கர்வத்துடன் அனுபவித்தேனோ அதே கர்வத்துடன் தண்டனையையும் அனுபவிப்பேன். இன்றைய யுத்தத்திலிருந்து உயிர் மீண்டு வந்தால் உங்களை சந்திக்கிறேன், இல்லையேல் நீங்கள் விட்ட வழிதான்”.

தவம் செய்யும்போது தேவர்களால் அதற்கு பங்கம் வருகின்றன. அவற்றையும் மீறி தவம் செய்து முடித்தால் அதற்கான வரங்களை தந்தே ஆக வேண்டும். அதை கடவுளாலும் மீற இயலாது. எல்லா நிகழ்வுகளுமே அவற்றுக்கான ஒழுங்கில்தான் இயங்குகின்றன.

அன்புடன்,
டோண்டு ராகவன்