மனப்பிறழ்ச்சி பற்றி ஒரு பதிவு

ஸ்கீஸோப்ரீனியா என்ன என்பதை தெரியாமலேயே நம்ம சாருநிவேதிதா எழுதுகிறார். உண்மை கூறப்போனால் ஸ்கீஸோப்ரினியா என்பது ஒரு மனிதனுக்குள் பல பெர்சனாலிட்டிகள் இருப்பதுதான். ராபர்ட் லூயி ஸ்டீவென்ஸன் எழுதிய டாக்டர் ஜெகில் & மிஸ்டர் ஹைட் நாவல் இந்தக் கருவைத்தான் அடிப்படையாகக் கொண்டது.

ஒரே மனிதனுக்குள் நல்லவனும் அரக்கனும் குடிகொண்டிருக்க மாறிமாறி அவர்கள் அந்த மனிதன் மேல் மேலாண்மை பெறுவதால் வரும் குழப்பங்களை அந்த நாவல் சொன்னது. அதில் முக்கியமாக ஒரு அடிப்படையில் நல்ல மனிதனின் மனதை கெட்ட எண்ணம் கொண்டவனது ஆத்மா ஆக்ரமிப்பதால் வரும் பிரச்சினைகளைத்தான் ஜெகில் ஹைட் கதை பேசுகிறது. ஆனால் உல்டாவாக யோசித்து பார்த்திருக்கிறீர்களா? அதாவது சராசரி குணநலன்களுடன் உள்ள ஒரு மனிதனை ஒரு நல்ல ஆத்மா ஆக்கிரமிப்பதால் என்னென்ன வரும் என்று நினைத்து பார்த்துள்ளீர்களா? சற்று கற்பனையை ஓட்டிப் பாருங்கள். முடியாவிட்டாலும் கவலையில்லை. ஏற்கனவே ஃபிரெஞ்சு எழுத்தாளர் Pierre Boulle இதை கற்பனை செய்து ஒரு அருமையான கதையை எழுதியுள்ளார். அது அவரது Quia Absurdum (Sur la Terre comme au Ciel) (சொர்க்கத்திலும் பூமியிலும் அபத்தங்கள்) என்ற சிறுகதை தொகுப்பில் வருகிறது. இக்கதையின் தலைப்பை மறந்து விட்டேன். தேடி இன்னொரு முறையும் படிக்க ஆவல்.

மற்றப்படி சமீபத்தில் 1970 என்று கூறுவதை total recall என்று கூறிக்கொள்ளலாம். இப்படித்தான் நான் சமீபத்தில் 1958-ல் பார்த்த ‘சபாஷ் மீனா” என்னும் படத்தை மீண்டும் நண்பர்களுடன் சமீபத்தில் 1972-ல் பார்க்க, அப்போது சமீபத்தில் 1958-ல் பார்த்த படக்காட்சிகள் வசனம் உட்பட சம்பந்தப்பட்ட காட்சி வருவதற்கு சில நொடிகள் முன்னால் வர என்றெல்லாம் நடப்பதை பற்றியும் சமீபத்தில் 1955-ல் நான் கேள்விப்பட்ட ஆடுதுறை ரகுவை சமீபத்தில் 1972-ல் சந்தித்து அவரை பெயரை கேட்டே அடையாளம் கண்டு கொண்டது பற்றியும் நான் ஏற்கனவே எழுதியுள்ளேன்.

மறுபடியும் ஸ்கீஸோ ப்ரினியா பற்றி பேசுவோமா? நர்கீஸ் நடித்த “ராத் அவுர் தின் (இரவும் பகலும்)” என்னும் கதையிலும் இதே தீம்தான். இணையத்திலேயே உதாரணம் பார்க்கலாமே. ஒரு பதிவில் ஒரு மனிதரைப் ப்ற்றி ஆகா ஓகோ என புகழ்வது, வலையுலக டெண்டுல்கர் எனக் கூறுவது, இன்னொரு பதிவில் அதே பதிவரை காண்டு கஜேந்திரன் என்று நையாண்டி செய்வது போன்ற செயல்பாடுகளை வைத்திருப்பதும் ஸ்கீஸோபிரீனியாதான். என்ன செய்வது ஏதோ பூர்வஜன்ம கர்மா என்றுதான் கூற வேண்டும்.

அன்புடன்,
டோண்டு ராகவன்
பின்குறிப்பு: கடைசி பத்தியில் சொன்ன பதிவர் உதாரணம் ஸ்கீஸோப்ரினியாவுக்கானது இல்லையென பதிவர் அக்னிப் பார்வை கூறியுள்ளார். இணையத்தில் தேடிப் பார்த்தபோது அவர் சொன்னதுதான் சரி எனத் தெரியவருகிறது. மருத்துவத் துறையில் இல்லாத சாதாரண பொது மக்கள் (நான் உட்பட) மேலே சொன்னது போலத்தான் புரிந்து கொண்டுள்ளோம் என்றும் புரிகிறது. அக்னிப் பார்வைக்கு என் நன்றி. அது மல்டிபிள் பெர்சனாலிட்டி டிஸார்டராம்.