பெரியாரின் பொருந்தாத் திருமணம்

இது குறித்து நான் ஏற்கனவேயே எழுதியதை ஜூலை 1949-ல் நடந்ததென்ன என்னும் எனது பதிவில் காணலாம். அதிலிருந்து சில வரிகள்:

“ஜூலை 1949 திராவிடக் கட்சிகளின் வரலாற்றில் ஒரு முக்கிய மைல்கல் என்றால் மிகையாகாது. அம்மாதம்தான் ஈ.வே.ரா. அவர்கள் மணியம்மையாரைப் பதிவுத் திருமணம் செய்துக் கொண்டார். அதை எதிர்த்தனர் அண்ணாத்துரை, ஈ.வி.கே. சம்பத் ஆகியோர். அதன் விளைவாக தி.மு. க. பிறந்தது என்பது மேலோட்டமாகப் பார்க்கப்படும் செய்தி.

அறுபதுகளிலும் இத்திருமணம் விவாதிக்கப் பட்டு வந்தது. 1964-ல் வெளியானப் படம் "பணக்காரக் குடும்பம்". எம்.ஜி.ஆர். நடித்தது. அதில் கதாநாயகனின் தந்தை தனக்கு ஒரு துணை தேடிக் கொள்ள அதை எம்.ஜி.ஆர். சாடி விட்டுத் தன் தங்கை மணிமாலாவுடன் வீட்டை விட்டு வெளியேறுவார். அதைப் பற்றி எழுதும் போது குமுதம் தி.மு.க. வினர் இன்னும் பெரியார் திருமணத்தால் தங்களுக்கு ஏற்பட்டப் பாதிப்பிலிருந்துத் திரும்பவில்லை என்று விமரிசனம் செய்தது. அதே படத்தில் கடைசிக் காட்சியில் கதாநாயகனின் தந்தை அவனுடன் வந்து சேர்ந்துக் கொள்ளும் போது, குமுதம் அதே விமரிசனத்தில் "திருந்தி வந்தப் பெரியார்" என்று ஒரு உப-தலைப்பைக் கொடுத்தது. இது நான் நேரடியாகப் படித்தது”.

“தாத்தா கட்ட இருந்த தாலி!” என்ற தலைப்புக் கொடுத்து அண்ணாதுரை 1940-ல் விடுதலையில் இவ்வாறு எழுதுகிறார்:

“தொந்தி சரிய மயிரே வெளிர நிறை தந்தமனைய உடலே” படைத்த 72 வயதான ஒரு பார்ப்பனக் கிழவர், ”துள்ளுமத வேட்கைக் கணையாலே” தாக்கப்பட்டு கலியாணம் செய்துகொள்ள ஆசைப்பட்டார்.

வயது 72! ஏற்கெனவே மணமாகிப் பெண்டைப் பிணமாகக் கண்டவர். பிள்ளைக்குட்டியும் பேரன் பேத்தியும் பெற்றவர். இந்தப் பார்ப்பனக் கிழவர். ஆயினுமென்ன? இருண்ட இந்தியாவில், எத்தனை முறை வேண்டுமானாலுந்தான் ஆண்மகன் கலியாணம் செய்து கொள்ளலாமே!

பெண்தானே, பருவ மங்கையாயினும் பட்டாடை உடுத்திக் கொண்டு பல்லாங்குழி ஆடி விளையாடும் சின்னஞ்சிறு சிறுமியாயினும், மணமாகிப் பின்னர் கணவன் பிணமானால் விதவையாகிவிடவேண்டும்.

இளமை இருக்கலாம். ஆனால் இன்பவாழ்வுக்கு அவள் அனுமதி பெற அந்தக் கூட்டம் அனுமதிப்பதில்லை. அவளது விழி, உலகில் உள்ள வனப்பான வாழ்க்கைச் சித்திரங்கள் மீது பாயலாம்.

ஆனால் என்ன பயன்? விம்மி விம்மி வாழலாம் விதவைக்கோலத்துடன். இல்லையேல் விபச்சாரியாகலாம். மறுமணத்துக்கு மார்க்கம் மலர் தூவியதாக இல்லை. கல்லும் மண்ணும் முள்ளும், குருட்டுக் கொள்கையினரின் முரட்டுப் போக்கும், சாத்திரமெனும் சேறும் நிரம்பியதாகவன்றோ இருக்கிறது.

அவள் பதினெட்டு ஆண்டுள்ள பாவையாக இருக்கலாம். மலர்ந்த மலராக இருக்கலாம். வாடை சுற்றுப்பக்கம் எங்கும் வீசலாம். அவளது தகப்பனார் மூன்றாம் மனைவியுடன் கொஞ்சிக் குலாவும் காட்சி அவளது கண்களில் படலாம்.

ஆனால் பூவிழந்த பூவை புத்தி கெட்டவர்களின் போக்கிரித்தனமான பொறியாகிய வைதிகத்தால் வாட்டப்பட்டு, நீலநிற வானத்திலே நின்றுலவும் நிலவைக்கண்டும், பாதி இராத்திரி வேளையிலே பலப்பல எண்ணியும், பாழான வாழ்வு வாழ வேண்டும். இல்லையேல் தொட்டிலில் கிடத்திச் சீராட்டிப் பாலூட்டி வளர்க்க வேண்டிய குழந்தையை, பாழும் கிணற்றில், கழுத்தை நெரித்து வீசவேண்டும்!

பேதைப் பெண், ஏன் இவ்வளவு துடுக்கு? இவ்வளவு பதைப்பா? என்று ”பெரிய பெரிய” மனிதர்களெல்லாம் கேட்பர் கோபத்துடன். எனவே பசித்தபாவை, பஞ்சத்தில் அடிபட்டு நசித்துவிடுவாள்.

ஆண் மகனுக்கென்ன; எத்தனை முறை வேண்டுமாயினும் மணம் செய்து கொள்ளலாம். காசநோய் இருக்கலாம். ஆனால் இதற்காக வேண்டி மணம் செய்து கொள்ளாதிருப்பானா? ஊரார், உனக்குக் காசம் இருக்கிறது. மணம் ஏன்? என்றா கேட்பர்! இல்லை! காசநோயால் கஷ்டப்படும் இவனுக்குக் காலமறிந்து கனிவுடன் ‘மருந்துதர’ ஒரு மங்கை நல்லாள் தேவை என்றுதான் கூறுவர். சட்டம் குறுக்கே நிற்காது. சமுதாயம் ஏனென்று கேட்காது. கொட்டு முழக்குடன் மங்கல ஒலியுடன் மணம் நடக்கும். மூன்றாம் முறையாயினுஞ் சரி, ஐந்தாம் ஆறாம் முறையாயினுஞ் சரி ஆண் மகனுக்கு அந்த உரிமை உண்டு! அக்ரமம்! என்று கூறுவர் அறிவாளிகள்.

ஆம்! அக்கிரமந்தான். ஆனால் கேட்பவர் யார்? கேட்டனர். ஒரு ஊரில்! கேட்டது மட்டுமல்ல, குறுக்கே நின்று இத்தகைய கூடா மணத்தைத் தடுத்தும் விட்டனர். தடுத்ததோடு நிற்கவில்லை. மணமகளை அதே நேரத்தில் தக்க மணமகனுக்கு மணமுடித்துக் கொடுத்தனர். அத்தகைய சீரிய செயல் புரிந்த சீலர்களை நாம் பாராட்டுகிறோம்.

கல்கத்தா அருகேயுள்ள மைமன்சிங் என்ற ஊரில், 72 வயதுள்ள பார்ப்பனக் கிழவனொருவன் இளமங்கை யொருத்தியை மணம் செய்து கொள்ள ஏற்பாடு செய்தான்.

பொன் அவிர் மேனியளைக் கிழவன், தன் பிண உடல் காட்டி எங்ஙனம் மணத்துக்குச் சம்மதிக்கச் செய்ய முடியும்! வாலிபம் இல்லை அவனுக்கு. ஆனால் பணம் இருக்கிறது. பெண்ணின் பெற்றோர் பணத்தைக் கண்டனர். கிழவனின் பெண்டாகப் போயினும், கை நிறையப் பொருள் இருக்குமல்லவா! மணத்துக்கு ஒப்பினர். சகல ஏற்பாடுகளும் நடைபெற்றன.

அந்த ஊரில் இந்தக் கிழவரின் கூடாத் திருமணத்தைத் தடுக்க வேண்டிப் பலரும் சென்று பலப்பல கூறினர்; கிழவர் கேட்டாரில்லை. திருமண நாள் குறித்துவிட்டார். மணப்பந்தல் அமைத்துவிட்டார். மங்கல ஸ்நானம் செய்தார். பட்டுடுத்திப் பணிபூண்டு, பரிமளம் பூசிப் பார்ப்பனக் கிழவர் பரிதாபத்துக்குரிய பாவையை மணமுடித்துக் கொள்ளப் பக்குவமானார்!

மைமன் சிங் ஊர்வாசிகள் கண்டனர். இந்த அக்ரமத்தை எப்படியேனும் தடுத்தே தீர வேண்டும் என உறுதி கொண்டனர். மயிலே மயிலே இறகுபோடு என்றால் போடுமா! எனவே ஊரில் உறுதி கொண்டவர்கள் உள்ளே நுழைந்தனர். மணக்கோலத்திலிருந்த பெண்ணைத் தூக்கிச் சென்றனர்.

இந்தத் திவ்வியமான திடுக்கிடும் செயல்புரிந்ததில் மூஸ்லீம்களும் இந்துக்களும் ஒன்றுபட்டே உழைத்தனர்.

கிழவர் கல்யாண மண்டபம் வந்தார். காலி இடத்தைத் தான் கண்டார். கடுகடுத்தார். முகம் சுளித்தார். கா, கூவெனக் கூவினார்.

இடையே அந்த இளமங்கையைத் தக்கவனொருவனுக்கு ஊராரே மணஞ்செய்து வைத்தனர்.

கண்டார் கிழவர் காரியம் மிஞ்சி விட்டதை. காரிகை போனால் போகட்டும். கைக்கு ஏதேனும் பொருளாவது வரட்டும் என்று கருதி, தனக்கு நேரிட்ட அவமானத்துக்கு, நஷ்ட ஈடாகப் பணம் கேட்டார்.

இந்தக் கூடாமணத்தைத் தடுக்க குணசீலர்கள், தமக்குள்ளாகவே பணமும் வசூலித்து விருந்தும் நடத்தினர்.

பாராட்டுகிறோம்.

பெண்ணாசைப் பித்துக்கொண்டு அலைந்து அந்தப் பார்ப்பனக்கிழவன் பணப்பேராசை தீர்ந்ததும் போதுமென்று இருந்துவிட்டான். பாவை தக்கனொருவனை மணந்தாள். ”தாத்தா” கட்ட இருந்த தாலியைத் தவிர்த்த, அந்த மைமன்சிங்வாசிகளை நாம் மனமாரப் பாராட்டுகிறோம்.

ஆனால் மைமன்சிங்கில் தடுக்கப்பட்டது போன்ற மணங்களை எத்தனை எத்தனையோ தடுக்கப்படாமல் நடந்தேறித்தான் வருகின்றன! தடுப்பாரில்லையே! அறிவு வளரவில்லையே!

ஏன் இத்தகைய கூடாமணங்களைக் கண்காணித்துத் தடுத்துச் சர்க்கார் முன்வரக்கூடாது என்று கேட்கிறோம். எத்தனை முறை ஊரில் உறுதி கொண்டவர்களால் தடுக்க முடியும்? இத்தகைய மணங்கள் நடக்கவொட்டாமல், நாகரிக சர்க்கார் மாதர் வாழ்வு கெடும் விதத்தில் நடைபெறும் இத்தகைய மூடத்தனத்தை தடுக்க, ஏதாவது வழி செய்ய வேண்டும். ஊருக்கு ஊர் பிரபலஸ்தர்கள், பகுத்தறிவாளர்கள் கொண்ட கமிட்டிகளை சர்க்கார் நிறுவி, இவ்விதமான கூடா மணங்கள் நடைபெற ஒட்டாது தடுக்க அக்கமிட்டிகளுக்கு அதிகாரம் அளிக்கலாம். குடித்துக் கெடுவதை, சூதாடிக் கெடுவதை, விபசாரம் செய்து கெடுவதை, தடுக்க சர்க்கார் சட்டம் செய்து சமுதாயக் கோளாறுகளை நீக்குவது போலவே, இவ்விதமான மணவினைகள் மூலம் மங்கையர் வாழ்வு மிதித்துத் துவைக்கப்படுவதையும் தடுக்கச் சட்டமியற்ற வேண்டும்.

துருக்கியில் கலியாணம் நடப்பதென்றால் மணமகனும், மணமகளும் நோய் ஏதுமின்றி இருக்கின்றனர் என முதலில் டாக்டர் சர்ட்டிபிக்கேட் வாங்கி சர்க்காருக்கு அனுப்ப வேண்டும்.

இந்தூர் சமஸ்தானத்தில் வயதில் அதிக வித்தியாசமுள்ள ஆண் மணந்துகொள்ளக் கூடாது என்ற சட்டம் கொண்டு வரப்பட்டது. சில சமஸ்தானங்களில் இத்தகைய சட்டமும் இருக்கிறது.

பம்பாய் மாகாண சட்டசபையில் எம்.எல்.ஏ. அம்மையாரொருவர் 45 வயதுக்கு மேற்பட்ட ஆடவன் 18 வயதுக்குக் குறைவான பாவையை மணப்பதைத் தடுக்க சட்டம் இயற்றவேண்டுமென்றம், சிந்து மாகாண சட்டசபையில் பேராசிரியர் கன்ஷாயம், பெண்ணின் வயதுக்கு மேல் 20 வயது அதிகமாக உள்ள ஆடவன் பெண்ணை மணக்கக் கூடாது என்றும் பேசி சட்டங்கள் இயற்ற முற்பட்டனர்.

இத்தகைய சட்டத்தின் அவசியத்தைத்தான் மைமன் சிங் மணவினை எடுத்துக்காட்டுகிறது.

சர்க்கார் கவனிப்பார்களா? சர்க்கார் கவனிக்கும்படி சமூகம் கேட்குமா?
(திராவிட நாடு 10.07-49)

இப்படி அதிக வயதுள்ள ஆண் மிகக் குறைந்த வயதுள்ள பெண்களை மணக்கக்கூடாது என்று பல கட்டுரைகள் - பல பிரசாரத்தின் மூலம் திராவிடர் கழகம் சொன்னது. இதை ஈ.வே. ராமசாமி நாயக்கரும் ஆதரித்தார்.

ஆனால் அதே பெரியார்தான் தானே ஒரு பொருந்தாத் திருமணம் செய்து தனது சீடர்களின் மூக்கை உடைத்தார். அத்தருணத்தில் தான் செய்ததை இராம. அரங்கண்ணல் இவ்வாறு கூறுகிறார் :-

”பழைய குடியரசு ஏட்டில் இருந்து பெரியாரின் பழைய பேச்சுகளை அடிக்கடி விடுதலையில் மறுபிரசுரம் செய்வேன். அதற்காக ஏடுகளை புரட்டிக் கொண்டிருந்தபோது பொருந்தாத திருமணம் பற்றிய பேச்சு கண்ணில் பட்டது. ஒரு இளம் பெண்ணை வயதானவர் கட்டிக்கொள்வது சரியல்ல என்கிற பேச்சு. அதை அப்படியே வெட்டி எடுத்து, ‘ தக்க வயதும் பொருத்தமே திருமணத்தின் இலட்சியங்கள்”- பெரியாரின் பேருரை என்று கொட்டை எழுத்துகளில் தலைப்பிட்டு கம்போசிங்குக்கு கொடுத்தேன். அதுவும் வெளிவந்தது. பிறகு நான் வேலையில் ராஜினாமா செய்துவிட்டு பாக்கிப் பணத்தைப் பெறுவதற்காக சென்றபோது, ‘பெரியார் என்னைப் பார்த்து, “பெருமாள் வீட்டு சோத்தையே தின்னுட்டு பெருமாளுக்கே துரோகம் செய்றானுங்க” என்று கூறினார்.
(நூல்:- நினைவுகள்)

26 வயது பெண்மணியை திருமணம் செய்து கொண்ட 72 வயது கிழவர் மனைவிக்கு என்ன உடல் சுகம் கொடுத்திருக்க முடியும்? மனைவியுடைய வாழ்நாள் முழுதும் பாழ் ஆகவில்லையா? மணியம்மையாரை யாரும் கட்டாயப்படுத்தவில்லைதான். இருப்பினும் பெரியாருக்கு என்று ஒரு பொறுப்புணர்ச்சி வேண்டாமா? அம்மாதிரி சொந்த விருப்பின்படி தியாக வாழ்க்கை வாழ்ந்தக் கண்ணகியைப் பற்றி மட்டும் பெரியார் ஏன் கடுமையாகப் பேச வேண்டும்?

அவருடைய இச்செயலை புத்தியுள்ளவர்களால் ஒத்துக் கொள்ள முடியாது. ஆகவேதான் அவர் தனக்கு புத்திசாலிகள் தேவையில்லை, முட்டாள்களே போதும் என்றும் கூறினார்.

அன்புடன்,
டோண்டு ராகவன்

அன்புடன்,
டோண்டு ராகவன்

டோண்டு பதில்கள் - 8.10.2009

கேள்விகள் கேட்போருக்கு வழக்கமான ஒரு வேண்டுகோள். சில சமயம் எங்காவது இணையத்தில் படித்ததை ஆதாரமாக வைத்து கொண்டு கேள்விகள் கேட்கப்படுகின்றன. அதில் தவறில்லை. ஆனால் அப்படியே தமது கேள்விகளின் பின்புலனையும் கூறினால் சௌகரியமாக இருக்கும். நானே கூகளிட்டு பார்ப்பதுண்டு என்பது நிஜமே. ஆயினும் அந்த சுட்டி ரெடியாக கிடைத்தால் அதை தேடும் நேரம் விரயமாகாமல் பதிலில் இன்னும் அதிக முனைப்பாக இருக்கலாம் அல்லவா?

அனானி (32 கேள்விகள் கேட்டவர்)
1. முதல்வர் கருணாநிதி ,"என் கருத்தால் பிறர் மனதை புண்படுத்த விரும்பவில்லை"-உங்கள் விமர்சனம்?
பதில்: நல்ல காமெடி.

2. ரஜினி, கமலுக்கு சிறந்த நடிகர் விருது-விருதுகள் பகிர்வின் உள்நோக்கம்?
பதில்: எல்லாம் ஒரு சம்ச்சீராக்கும் செயல்தான். பல கலைஞர்கள் தங்களுக்கு பிடித்த நடிகர்களை பற்றிக் கூறும்போது எம்.ஜி.ஆர். - சிவாஜி, கமல் - ரஜனி, விஜய் - அஜீத் என்று ஜோடி ஜோடியாக சேர்த்து அவர்களை தங்களுக்கு பிடிக்கும் என்று கூறிவிடுவார்கள். அப்போதுதானே ஏதேனும் சந்தர்ப்பம் சம்பந்தப்பட்ட நடிகர்களது கேம்பிலிருந்து கிடைக்கும்?

3. கோவை 9 வது உலகத் தமிழ் மாநாடு-கலைஞரின் திடீர் முடிவு -இலங்கை அரசியல் பிண்ணனி-ராகுல் விசிட்-திசைதிருப்பும் திருப்பணி-இதில் எது சரி?
பதில்: ஒன்றுமே சரியில்லை. தன்னைத் துதிப்போருக்கு இன்னொரு வாய்ப்பு தரும் சீரிய நோக்கமே காரணம்.

4. இலங்கைத் தமிழர் படும் இன்னல்கள் பற்றி வரும் தகவல்கள்?
பதில்: மனதை உருக வைக்கின்றன. ஆனால் அதே சமயம் இன்னும் பிரபாகரன் உயிருடன் இருக்கிறார் என்றெல்லாம் தமாஷ் செய்து ஈழத்தமிழர்களுக்கு ஆப்பு வைக்கும்வேலையும் அவ்வப்போது நடப்பது கண்டிக்கத்தக்கது.

5. புஸ்வாணமாய் போன நடிகர் விஜயின் அரசியல் விஜயம்- காரணகர்த்தா யார்?
பதில்: சரத்குமாருக்கு நேர்ந்த கதியைப் பார்த்து மிரண்டிருக்கலாமோ?

6. தமிழக தென்பகுதி காவலர் மாவீரனுக்கு டெல்லி கசக்குதாமே-இனி?
பதில்: அது அவர் பாடு, அவர் குடும்பம் பாடு. நமக்கென்ன இதில் அக்கறை?

7. இந்தியாவின் கண்டுபிடிப்பு -நிலவில் நீர் -உங்கள் பாராட்டு விமர்சனம்?
பதில்: இந்தியாவின் பெருமைக்கு அணி சேர்க்கும் செய்தி இது.

8. ராஜராஜ சோழன் புகழ் பழம்பெரும் நடிகை எஸ். வரலட்சுமி பற்றி?
பதில்: இவர்தானே “குழந்தையும் தெய்வமும்” படத்தில் ஜமுனாவின் அன்னையாக வந்தது? எனக்கு பிடித்த நடிகை. இவர் மல்யுத்தவீரர் அஜித்சிங்கை மணந்தவர் என நினைக்கிறேன். அல்லது அது ஜி.வரலட்சுமியா?

9. சீன ராணுவ உதவியுடன் இலங்கை ராணுவத்தின் தொந்திரவு தமிழக மீனவ்ர்களுக்கு-இது எதில் கொண்டு போய் விடும்?
பதில்: இம்மாதிரி செய்தி ஏதும் நான் படித்ததாக நினைவில்லையே? சுட்டி ஏதேனும்?

10. சமீபத்தில் சிவபத அடைந்த பிரபல எழுத்தாளர் தென்கச்சி ‌கோ சுவாமிநாதனை சந்தித்து உள்ளீர்களா?
பதில்: இல்லை.

11. கறுப்புப்பண முதலைகள் பற்றிய விக்ரமின் ‘கந்தசாமி’ படம் எப்படி?
பதில்: இந்தியன் படத்தைப் பார்க்க பிளாக்கில் டிக்கெட் எல்லாம் விற்று அதன் காரணமாக படத்தை சாடியவர்களுக்கு இப்படத்தில் அதற்கான வாய்ப்பு இல்லாது போயிற்று.

12. தொலை தொடர்புத்துறை சாதனையாளர் தயாநிதிமாறன் ஜவுளித்துறையிலும் சாதிப்பாரா?
பதில்: அதில் சாதிக்கிறாரோ இல்லையோ, தன் மனைவிக்காக இவரே தனியாக ஜவுளிக்கடைக்குப் போய் புடவை செலக்ட் செய்து மனைவியிடமிருந்து இடிவாங்காமல் இருந்தால்தான் இவர் ஜெயித்ததாக ஒத்துக் கொள்வேன்.

13. சன் டீவி-கலைஞர் டீவி போட்டி தொடர்வது போலுள்ளதே?
பதில்: போட்டியா, யார் சொன்னது? சன் டீவியை கலைஞர் காப்பி அடிப்பது தொடர்கிறது என்று வேண்டுமானால் கூறுங்கள். அதை விடுத்து போட்டி எனக் கூறுவது அவதூறானது.

14. முதலில் ஜஸ்வந்த் சிங், பின் அருண்ஷோரி - அடுத்து?
பதில்: பா.ஜ.க. சுதாரித்துக் கொள்ளவிலை என்றால் நஷ்டம் அதற்குத்தான்.

15. எல்லா டீவிகளும் கமலின் ஐம்பது வருடத் திரையுலகச் சேவை பற்றித் கலக்குகின்றனவே?
பதில்: கலக்க வேண்டிய விஷயம்தானே.

16. ஒரு கலக்கு கல்க்கிய பன்றிக் காய்ச்சல்-அமெரிக்காவின் சதியா?
பதில்: கண்டிப்பாக இருக்கவியலாது. இதெல்லாம் ஒருவித சுழற்சியில் வருகின்றன. எல்லா வகைக் கிருமிகளும் காற்றில் உள்ளன. சிலவற்றின் எண்ணிக்கை ஒரு க்ரிட்டிகல் அளவைத் தாண்டியதும், கூடவே அதன் பரவலுக்கு தோதான சீதோஷ்ணநிலையும் இருந்தால், மேலும் வேறுகாரணிகளுக்கான ஷரத்துகளும் பூர்த்தி செய்யப்பட்டால் அது பரவ ஏதுவாகிறது. அதுதான் இந்த விஷயத்திலும் நடந்துள்ளது.

17. மு.க. அழகிரி-ஸ்டாலின் -தமிழரசு இவர்களின் சகோதர உறவு ஒரு எடுத்துக்காட்டாய் உள்ளதா?
பதில்: பஞ்ச பாண்டவர்களும் கௌரவர்களும் சகோதரர்களே. போதுமா?

18. 2 வழிகள் கோபத்தை அடக்க?
பதில்: உன்னையே நீ அறிவாய், எதிராளியையும் அறிவாய்.

19. 2 வழிகள் ஆனந்தத்தை அதிகரிக்க?
பதில்: உன்னையே நீ அறிவாய், எதிராளியையும் அறிவாய்.

20. 2 வழிகள் வாழ்வில் வெற்றி அடைய?
பதில்: உன்னையே நீ அறிவாய், எதிராளியையும் அறிவாய்.

21. 2 வழிகள் எதிரிகளை சமாளிக்க?
பதில்: உன்னையே நீ அறிவாய், எதிராளியையும் அறிவாய்.

22. 2 வழிகள் துரோகிகளை எதிர் கொள்ள?
பதில்: உன்னையே நீ அறிவாய், எதிராளியையும் அறிவாய்.
(பின்குறிப்பு: ஒரே பதில் பல கேள்விகளுக்கும் ஏற்றதாய் இருந்தால் வேறு என்னதான் செய்வதாம்)

23. விலைவாசி ஏற்றத்தால் அல்லல்படும் சாதரண மக்களின் நிலை?
பதில்: செலவுக்கேற்ப வருவாயை பெருக்கிக் கொள்வதைத் தவிர வேறு வழியே இல்லை. அது எங்கனம் என்பதை சம்பந்தப்பட்டவர்கள்தான் தீர்மானிக்க வேண்டும். அந்த வழிகளின் சாதக-பாதகங்களுக்கும் அவரவரே பொறுப்பு.

24. வாக்குபதிவு எந்திரம் பற்றிய எதிர்க்கட்சிகளின் எதிர்ப்பு என்னாச்சு?
பதில்: அந்த எதிர்ப்பு குழந்தைத்தனமானது. அந்த ஏற்பாட்டிற்கு மாற்றாக அக்கட்சிகள் கூறியது பொறுப்பற்றத்தனத்தின் உச்சக்கட்டம்.

25. நல்லச் செயல்களுக்கும் செய்த நன்றிகளுக்கும் மதிப்பு குறைகிறதே?
பதில்: எந்நன்றி கொன்றார்க்கும் உய்வுண்டாம் உய்வில்லை செய்நன்றி கொன்ற மகர்க்கு என்னும் ரேஞ்சில் வள்ளுவரே எழுதியதிலிருந்து இதெல்லாம் ஒன்றும் புதிதில்லை எனத் தெரியவில்லையா?

26. விஜயதசமி அன்று ஒரு கரும்பு விலை 50 ரூபாய்-இனிப்பும் கசக்குமோ?
பதில்: கரும்பு கடிக்க முடிகிறது உங்களுக்கு? அது மட்டுமல்ல சர்க்கரை தொல்லை வேறு (எனக்கில்லைதான் என இருந்தாலும்). நான் கரும்பு ஒரு துண்டுதான் பொங்கல் பானையில் கட்ட வாங்குவேன். அவ்வளவே. ஆகவே கரும்புவிலை என்னைப் பொருத்தவரை இர்ரெலவண்ட்தான்.

27. அதிமுகவை வி.காந்த் கட்சி முந்துகிறதா?
பதில்: அப்படித்தான் இப்போதைக்கு தோன்றுகிறது.

28. கமலின் அரசியல் பிரவேசம் நடைபெற வாய்ப்புள்ளதா?(அவர் அறிவு ஜீவி)
பதில்: கூடவே புத்திசாலியும் கூட. அரசியலுக்கெல்லாம் அவர் வருவார் எனத் தோன்றவில்லை.

29. கமல் இயக்கத்தில் இயக்குனர் சிகரம் பாலச்சந்தர் -இதற்கு உவமையாய் எதைச் சொல்வீர்கள்?
பதில்: பிரேக் வண்டியோட்டுகிறது, மோட்டார் பிரேக் அடிக்கிறது என்பது போன்ற எண்ணங்கள் வருகின்றன.

30. இயக்குனர் இமயம் என்ன செய்கிறார்?
பதில்: பாலச்சந்தர்தானே, மறுபடியும் நாடகம் எடுக்கப் போவதாகக் கேள்வி.

31. உங்களை கவர்ந்த இளம் திரைப்பட இயக்குனர் யார்?
பதில்: அப்படியென்று என்னைப் பொருத்தவரை யாரும் கிடையாது

32. இதுவரை மொத்தம் எத்தனை கேள்விகள் உங்கள் பதிவில் கேட்கப்படுள்ளது?
பதில்: யார் இதையெல்லாம் உட்கார்ந்து எண்ணுவதாம்? ஆளை விடுங்கள்/

தமிழ் ஓவியா
1. ஓடிப்போன சங்கராச்சாரியார் or ஓடிப்போகாமல் இங்கேயே ஆபாசபடம் பார்த்த்து அக்கிரகார அம்மணிகளை செட்டப் செய்த சின்ன (வீடு) சங்கராச்சாரியார் - இவர்களில் யார் சிறந்த மாமாப் பயல்?
பதில்: முதலில் மாமாப்பயல் என்ற சொல்லின் விளக்கத்தில் தெளிவுடன் இருப்பது அவசியம். மாமாப் பயல் என்பவன் மற்றவர்கள் அனுபவிப்பதற்காக பெண்களை ஏற்பாடு செய்பவன். பெரிய அல்லது சின்ன சங்கராச்சாரியர்கள் மேலே வைக்கப்பட்ட குற்றச்சாட்டு அதுவல்ல. ஆகவே அவர்களில் யாருமே மாமாப்பயல் என அவர்தம் விரோதிகள்கூட சொல்லிட இயலாது.

மேலும், சொந்த மனைவியையே ஊருக்கு வந்துள்ள புது தாசி என தம் நண்பர்களுக்கு அடையாளம் காட்டி அவர்களை விட்டு அந்த உத்தமப் பெண் நாகம்மையாரை கேலி செய்வித்து, கோவிலுக்கு வந்த மற்ற பெண்டிரை பயம்காட்டி, அவரது மனதையும் நோவடித்த ஈ.வே. ரா. அவர்கள் பற்றி என்ன கூறுவீர்கள்?

இதுதான் போதாது என்றால், ஒரு முறை மனைவிகளும் கள்ள புருஷன் வைத்துக் கொள்ளலாம் என ஈ.வே.ரா. அவர்கள் ஒரு கூட்டத்தில் கூற, நாகம்மையிடம் தான் செல்லலாமா என ஒருவர் கூட்டத்தில் கேட்டு வைக்க, “நாம் இருவருமே நாகம்மையிடம் இது சம்பந்தமாக பேசுவோம், அவர் கொடுப்பதை வாங்கி வருவோம்” என்று பொருள்பட திருவாய் மலர்ந்தருளினது பற்றியும் என்ன கூறுவீர்கள்?


எம்.கண்ணன்
1. வரலாறு, புவியியல் என முன்பெல்லாம் பள்ளிக்கூட பாடத்திட்டத்தில் தனியாக பரீட்சைகள் இருந்தது. தற்போது சமூக அறிவியல் (Social Science) என ஒரே பரீட்சையாகவும் வரலாறுக்கு முக்கியத்துவத்தை குறைத்துவிட்டனரா? சேரர், சோழர், பாண்டியர், அசோகர், பாபர், அக்பர் என தற்போது சிறார்கள் படிப்பதில்லையா?
பதில்: தெரியவில்லையே. நான் படிக்கும்போது கூட சமூக அறிவியல் என்றுதான் இருந்தது. சரித்திரம், பூகோளம் இரண்டும் அதில் அடங்கின. நான் பத்தாம் வகுப்பில் பொறியியல் சிறப்புப் பாடமாக எடுத்ததில் சமூக அறிவியலில் பெறும் மதிப்பெண்கள் பள்ளியிறுதி வகுப்பு தேர்வில் கணக்கிடப்படாது எனக்கூறிவிட்டனர். இதில் சோகம் என்னவென்றால், அதை வெளிப்படையாக நான் 11-ஆம் வகுப்புக்கான தேர்வுகளை முடித்தபின்னால்தான் கூறினார்கள். அது தெரியாது மெனக்கெட்டு நான் படித்து 61% வாங்கியிருந்தேன்.

நீங்கள் சொன்ன சுட்டி ரொம்பவும் ஜெனரலாக இருக்கிறது. பாட மாடல்கள் எதையும் பார்க்க இயலவில்லை. ஒரு வேளை நான் தவறுதலாக அந்தச் சுட்டியை கையாண்டேனா எனத் தெரியவில்லை. இங்கு இன்னொரு விஷயம். பாடநூல்களில் சரித்திர சம்பவங்கள் எவ்வாறு கையாளப்படுகின்றன என்பது குறித்து நான் இம்சை அரசன் தூண்டிய நினைவுகள் என்னும் பதிவில் இவ்வாறு எழுதியுள்ளேன்.

“நான் சமீபத்தில் எழுபதுகளில் பம்பாயில் இருந்தபோது எனது நண்பன் ஸ்ரீனிவாசமூர்த்தி கூறியது நினைவுக்கு வருகிறது. அவன் ஷிமோகாவைச் சேர்ந்தவன். "கர்னாடகாவில் உள்ள பள்ளிகளில் இப்போது கூட (எழுபதுகளில்) சரித்திரப் பாடங்களில் புலிகேசிதான் ஹீரோ. வாதாபி கொண்டான் நரசிம்மவர்ம பல்லவன் கொடுங்கோல் மன்னனாகவே சித்தரிக்கப்படுகிறார்." எழுபதுகளில் உள்ள நிலைமைதான் தற்போதும் என்று உறுதியாக நினைக்கிறேன்.

இதே போல பழைய சரித்திரங்கள் இன்னும் நமது தற்கால நம்பிக்கைகளின் மீது ஆட்சி செலுத்துகின்றன என்பதையும் பார்க்கிறேன். உதாரணத்துக்கு "வீரபாண்டிய கட்டபொம்மன்" படம் ஐம்பதுகளில் வெளியானபோது தமிழ்நாட்டில் எட்டையபுரத்தில் உள்ள தியேட்டர்களில் ஒன்றில்கூடத் திரையிடப்படவேயில்லை என்பது பத்திரிகை செய்தி. ஊர்கட்டுப்பாடுதான் அதற்குக் காரணம். தங்கள் மஹாராஜாவின் மீது அவ்வளவு பக்தி ஊர் மக்களுக்கு. ஒன்று இரண்டு மூன்று என்று கூறும்போது கூட, ஆறு, ஏழு, மஹாராஜா, ஒன்பது, பத்து என்றுதான் எண்ணுவார்களாம். ஏனெனில் எட்டு என்று கூறிவிட்டால் மஹாராஜாவைப் பெயர் வைத்துக் கூப்பிடுவதுபோல ஆகிவிடுமாம். அதனால்தான் பாரதியார் கூட தன் எழுத்துக்களில் வீர பாண்டிய கட்டபொம்மனைப் பற்றி ஒன்றும் குறிப்பிடவில்லை என நினைக்கிறேன். அக்காலக் கட்டங்களில் கட்டபொம்முவை கொள்ளைக்காரனாகத்தான் குறிப்பிட்டனர் பலர். பாரதியாரும் அவ்வாறே கருதியிருக்கலாம்.

இன்னொரு உதாரணம் "தர்பண் (Dharpan)" என்ற தொடரில் காண்பித்த ஒரு கதையே. (பை தி வே, இந்த தர்பண் சமீபத்தில் எண்பதுகளில் வந்த ஒரு அருமையான தொலைக்காட்சித் தொடர். அது பற்றி பிறகு, வேறொரு பதிவில்). அதில் இந்தியாவில் உள்ள பல மொழிகளில் வந்த சிறந்த சிறுகதைகள் படமாக்கப்பட்டன. அதில் ஒரு கதை பற்றி இங்கே கூறுவேன்.

அது ஒரு ஒரியமொழிக்கதை. புவனேஸ்வரில் ஓர் அலுவலகத்தில் இரண்டு நண்பர்கள். ஒருவர் ஒரிஸ்ஸாவைச் சேர்ந்தவர், இன்னொருவர் ஆந்திராவைச் சேர்ந்தவர். இருவரும் ஒரிஸ்ஸாக்காரர் வீட்டில். ஒரிஸ்ஸாக்காரர் கிருஷ்ணதேவராயரை பற்றி இகழ்ச்சியாகப் பேசி தங்கள் பழங்காலத்து கலிங்கதேசத்து மன்னரை உயர்த்திப் பேச சீறி எழுகிறார் ஆந்திராக்காரர். பேச்சு தடித்து விரோதமாகப் போகும் நிலையில், ஒரிஸ்ஸாக்காரரின் மனைவி பேச்சில் குறுக்கிடுகிறார்.

அவர் கேட்கிறார்: "இந்த விஷயங்களெல்லாம் நடந்து பல நூற்றாண்டுகளாகி விட்டன. உங்கள் வாதத்தில் கிருஷ்ணதேவராயர் அல்லது ஒரிய மன்னர்தான் சிறந்தவர் என்று ஸ்தாபிப்பதால் உங்களில் ஒருவருக்கேனும் ஏதேனும் பிரயோசனம் உண்டா? இப்போதைக்கு பே கமிஷன் அரியர்ஸை கிருஷ்ணதேவராயரோ, கிருஷ்ணராஜுவோ வாங்கித்தர இயலுமோ? என்ன இது சிறுபிள்ளத்தனமால்ல இருக்கு." (கடைசி வாக்கியத்தை நிச்சயமாகவே வடிவேலு பாணியில் அவர் கூறவில்லை என்பதை நான் இங்கு கூறிவைக்கிறேன்). இரு நண்பர்களும் சிரிக்க, கதை சுமுகமாக முடிகிறது.

இம்மாதிரித்தான் உள்ளூர் மக்களின் செண்டிமெண்ட்டில் சரித்திரம் தப்ப இயலவில்லை”.

2. கோயில் கருவறைக்குள் குஜால் என்றெல்லாம் ஜூவி கவர் ஸ்டோரி போடுகிறதே? அதுவும் பலான சிடி படங்கள் எல்லாம் காட்டி? இதுமாதிரி (அல்லது பாதிரியாரின் செக்ஸ் சம்பந்தப்பட்ட கட்டுரைகள்) செய்திகள் அதிகம் வெளியாவதால்தான் மக்களும் பலவித செக்ஸ் வக்கிரங்களுக்கு தூண்டப்படுகிறார்களா?

பதில்: சம்பந்தப்பட்ட குருக்கள் கடும் தண்டனைக்கு உரியவர். அதில் எந்த சமாதானமும் கூடாது. பாதிரியார்கள் பற்றி இங்கு பேச விரும்பவில்லை. இக்கட்டுரைகள் மக்களின் விழிப்புணர்வை தூண்டினால் சந்தோஷமே.

3. வாத்தியார் சுப்பையா சார், ஸ்வாமி ஓம்கார், சாரு நிவேதிதா (நித்யானந்தர்) - யாருடைய ஜோதிட / ஆன்மீக பதிவுகள் சுவாரசியமாக இருக்கிறது (உங்களைப் பொறுத்தவரை) ? யாருடைய எழுத்து நல்ல நடை? படிக்க சுவாரசியம்? (விஷயங்களில் உங்களுக்கு நம்பிக்கை இருக்கலாம் / இல்லாதிருக்கலாம் - அது வேறு)? யாருடைய பதிவுகளில் இருந்து பல நல்ல விஷயங்கள் தெரிய வருகிறது?
பதில்: சாரு நிவேதிதா என்னைப் பொருத்தவரை அன்செலக்டட். வாத்தியார் சுப்பையா, ஓம்கார் ஸ்வாமிகள் டபுள் ஓக்கே.

4. மகாராஷ்டிர தேர்தலில் அதிமுக 2 இடங்களில் போட்டியிடுகிறதே? தாராவி / மாதுங்கா / சயான் தமிழர்களை நம்பித்தானே? ஜெயலலிதாவோ இன்னும் கொடநாட்டை விட்டே வர மனமில்லை. இப்படி இருக்கையில் மும்பையில் போட்டியிட்டு என்ன ஆகப் போகிறது ? அங்கிருக்கும் தமிழர்கள் எல்லாம் எதற்காக அதிமுகவுக்கு ஓட்டுப் போடவேண்டும்? ஒரு அவசரம் உதவி என்றால் அவர்களுக்கு உதவப் போவது லோக்கல் கட்சிகள்தானே?
பதில்: வெற்றி வாய்ப்பை கணிக்காமலா அவர்கள் இருந்திருப்பார்கள்? மற்றப்படி தாராவியில் தமிழர் எம்.எல்.ஏ.வாக இருப்பதே நல்லது. அவர்களாலும் உள்ளூர் மக்களுக்கு உதவ முடியும்.

5. மகாராஷ்டிர தேர்தலில் சிவசேனா, பாஜக ஜெயித்து உத்தவ் தாக்கரே முதல்வராகிவிட்டால் - ராஜ் தாக்கரே என்ன செய்வார்? சென்றவாரம் டைம்ஸ் நவ் தொலைக்காட்சியில் அர்நாப் கோஸ்வாமி கேட்ட ஆங்கிலக் கேள்விகளுக்கு முழுவதும் மராட்டியில் பதிலளித்த (ஆங்கிலம் தெரிந்திருந்தும்) ராஜ் தாக்கரே போன்ற மொழி வெறியர்கள் ஏதாவது ஒரு வகையில் மும்பை சாமானியர்களுக்கு குடைச்சல் கொடுத்துக் கொண்டிருக்கின்றனரே? மக்கள் பாடம் புகட்டுவார்களா? இதில் மருமான் ராஜ் தாக்கரே, மகாராஷ்டிராவின் ஜின்னா என பால் தாக்கரே அறிவித்துள்ளாரே ? பிள்ளைப்பாசம் இந்தளவுக்கா ?
பதில்: ராஜ் தாக்கரே நிச்சயம் சிவசேனாவுக்கு தலைவலிதான். அவரை எதிர்க்க சிவசேனாவுக்கு அதுவே போதிய காரணமே.

ஆங்கிலம் தெரிந்திருந்தும் மராட்டியிலேயே பேசுவேன் எனக் கூறுவது இந்த காண்டக்ஸ்டில் அசட்டுத்தனமானது.

6. சீனாவில் மாவோவின் பேரன் ராணுவத்தில் முக்கிய பதவியிலும், அரசியல் கமிட்டியிலும் முக்கிய பதவிக்கு வந்திருப்பது - சீனாவிலும் வாரிசு அரசியல் என்பதைத் தானே காட்டுகிறது ?
http://beta.thehindu.com/news/international/article27209.ece
பதில்: வாரிசு அரசியல் எங்குதான் இல்லை? சீனாவில் இருப்பது குறித்து ஏன் வியப்படைய வேண்டும்?

7. தற்போது சாதாரண போஸ்ட் கார்டு, இன்லேண்ட் லெட்டர் போன்றவற்றின் விலை என்ன? சமீபத்தில் யாருக்கேனும் கார்டில் கடிதம் அனுப்பியதுண்டா?
பதில்: போஸ்ட் கார்ட் 50 பைசா, ரிப்ளை பெய்ட் 1.00 ரூபாய். இன்லேண்ட் லெட்டர் 2.50 ரூபாய், கவர் 5.00 ரூபாய் (முதல் 50 கிராம்களுக்கு, பிறகு ஒவ்வொரு 50 கிராம்களுக்கும் 3 ரூபாய்). கடைசியாக பதிவுத் தபால்தான் அனுப்பினேன், அதன் விலை முதல் 50 கிராம்களுக்கு 22 ரூபாய், கவர் நீங்கள் கொடுத்தால். இல்லாவிடில் 22.50 ரூபாய். தில்லியில் இருந்தபோது ஒவ்வொரு நாளும் இன்லேண்ட் லெட்டர்கள் பத்துக்கு குறையாமல் வாடிக்கையாளர்களை பிடிக்க அனுப்பியிருக்கிறேன். அப்போது கணினி இல்லை, மின்னஞ்சலும் இல்லை. இங்கு வந்ததும் லெட்டர் அனுப்புவது சுத்தமாக நின்று போயிற்று. உள்ளூர் தபாலுக்கு கூரியர்கள் 9 ரூபாய் ஆகவே உள்ளூருக்கு அது உத்தமம். அதுவே தில்லி போன்ற இடங்களுக்கு 50 ரூபாய்கள். அங்கு ரிஜிஸ்டர்ட் போஸ்ட் லாபகரமானது.

8. ஐடிபிஎல் போன்றே ஏர் இண்டியாவையுவும் மறையவிட வேண்டும் என்றெல்லாம் கட்டுரையாளர்கள் எழுத ஆரம்பித்துவிட்டார்கள். உங்கள் கருத்து என்ன? ஐடிபிஎல் என்ன செய்திருக்கவேண்டும் ? ஏர் இண்டியா என்ன செய்யவேண்டும்?
பதில்: ஏர் இண்டியா இழுத்து மூடப்பட வேண்டும். ஐ.டி.பி.எல் பற்றி நான் ஒரு பதிவில் எழுதியது எல்லா அரசு கம்பெனிகளுக்கும் பொருந்தும். அதிலிருந்து சிலவரிகள்:
“ஐ.டி.பி.எல்லின் வீழ்ச்சி மூலம் ஒன்று கற்கலாம். அதாவது ஒரு நிர்வாகம் எவ்வாறு இருக்கக் கூடாது என்று. அதற்காக ஐ.டி.பி.எல்லின் உயர் அதிகாரிகளை குற்றம் சொல்வதாக நினைத்து விடாதீர்கள். அதிகாரிகளில் பலர் மிகத் திறமைசாலிகள். ஆனால் ஐ.டி.பி.எல்லை தன் கட்டுப்பாட்டில் வைத்திருந்த மினிஸ்ட்ரியின் செயல்கள் அது நல்ல முறையில் செயல்பட முடியாமல் தடுத்துவிட்டது.

உதாரணத்துக்கு ஐ.டி.பி.எல்லுக்கு சொந்தமான கார்களில் ஒன்று மினிஸ்ட்ரி அதிகாரிகள் வசமே இருந்தது. அதன் உபயோகத்தின் மேல் ஐ.டி.பி.எல்லுக்கு ஒரு கட்டுப்பாடும் இல்லை. ஆனால் அதன் செலவுகள் மட்டும் ஐ.டி.பி.எல் தலையில். அதன் ஓட்டுனர் ஐ.டி.பி.எல்லில் சம்பளம் பெற்றார். அது மட்டுமன்றி ஐ.டி.பி.எல்லில் வேலை செய்த எழுத்தர்கள் நான்கைந்து பேர் மினிஸ்ட்ரியிலேயே நிறுத்திக் கொள்ளப்பட்டனர். அவர்கள் சம்பளமும் ஐ.டி.பி.எல். பொறுப்பிலேயே. அதே போல மினிஸ்ட்ரியில் இருந்த ஜாயிண்ட் செக்ரெடரி வீட்டில் வாஷிங்க் மெஷின் வேலை செய்யவில்லையென்றால் எலெக்ட்ரிஷியனை அழைத்துக் கொண்டு நான் செல்லவேண்டிய நிர்ப்பந்தம். நாங்கள் சென்ற காரை அந்த அதிகாரியின் வீட்டினர் தங்கள் வீட்டிலிருந்து மூன்று கிலோமீட்டர் தூரத்தில் உள்ள காய்கறி மார்க்கெட்டில் கறிகாய் வாங்க எடுத்து சென்றனர், ஏனெனில் அங்கு கிலோவுக்கு அரை ரூபாய் மலிவாம். எங்கு அடித்துக் கொள்வது என்று தெரியவில்லை.

அல்ஜீரிய வேலையைப் பற்றியும் எழுதியிருந்தேன். தோல் பதனிடும் தொழிற்சாலையில் வரும் கழிவு நீரை சுத்தம் செய்யும் ப்ளாண்டை நிறுவும் வேலைக்கு ஒப்பந்தப் புள்ளிகள் தருமாறு ஐ.டி.பி.எல். என்னும மருந்துக் கம்பெனிக்கு அரசியல் ரீதியான நிர்ப்பந்தம். நல்ல வேளையாக அல்ஜீரியாவிலேயே எதோ அரசு கவிழ்ப்பு நடந்து எங்களுக்கு அந்த வேலை கிடைக்கவில்லையோ பிழைத்தோமோ. ஆனால் அதற்குள் ஒரு கணிசமான தொகையும் செலவழிக்கப்பட்டிருந்தது. அத்தனையும் எள்ளுதான்.

நான் ஏற்கனவே குறிப்பிட்டிருந்தது போல 1980களின் தொடக்கத்திலேயே ஐ.டி.பி.எல்லின் சரிவு நிதானமாக ஆரம்பித்தது. அதெல்லாம் இப்போது பின்னோக்கிப் பார்க்கும்போதுதான் தெரிகிறது. நிலைமை மோசம் என்பதை நான் 1990-ல் ஐ.டி.பி.எல். ரிஷிகேஷுக்கு துபாஷி வேலையாய் சென்றபோது உணர்ந்தேன். அதற்கான சில அறிகுறிகள். டௌன்ஷிப்பில் விளையாடிய குழந்தைகள் பெரும்பான்மையினர் வேலை செய்பவர்களின் குழந்தைகள் அல்ல, பேரக் குழந்தைகள். அதாவது வேலை செய்பவர்களின் சராசரி வயது 40-க்கும் மேல். புது ஆள் சேர்ப்பு பல வருடங்களாக நடைபெறாததன் விளைவுதான் இது. வருடா வருடம் பலர் ஓய்வு பெற்று சென்றனர். ஆனால் அதனால் விளைந்த காலியிடங்கள் நிரப்பப்படவில்லை. தெரு விளக்குகளில் பாதிக்கு மேல் பல்புகள் இல்லை. தெருக்களின் பராமரிப்பும் மோசம். வேலை செய்யும் இடத்தில் தொழிலாளர்கள் கூடி நின்று வம்பு பேசிக் கொண்டிருந்தனர். தொழிற்சாலைக்கு வந்த பிரெஞ்சுக்காரர் கேட்ட அளவுக்கு மூலப் பொருள்கள் கிடைப்பதில் தாமதம். இன்னும் கூறிக் கொண்டே போகலாம்.

1992-ல் விருப்ப ஓய்வுத் திட்டம் அறிவிக்கப்பட்டது. டைனமிக்காக வேலை செய்யக் கூடியவர்களில் முக்கால்வாசிப்பேர் விருப்ப ஓய்வு பெற்று சென்றனர். தினசரி உற்பத்திக்கு தேவையான பணம் கிடைப்பதில் சுணக்கம். க்ரெடிட்டில் மருந்துப் பொருட்கள் பெற்ற அரசு மருத்துவமனைகள் பில்கள் செட்டில் செய்வதில் ஆமை வேகம் காட்டினர். இத்தனை ஆண்டுகளாக மத்திய அரசு கொடுத்துவந்த பட்ஜெட் ஆதரவு சுருங்கிப் போயிற்று. ஒரு நிதி ஆண்டில் 19 கோடி ரூபாய் அரசு ஒதுக்க, அது போதாது என்று தலைமை நிர்வாகி பெரிய நோட் போட்டார், அதை பரிசீலித்த அமைச்சு அதிகாரிகள் விழித்துக் கொண்டு உண்மையில் ஒதுக்கியது 19 கோடி அல்ல 19 லட்சமே என்று கண்டுபிடித்து எங்கள் தலைமை அதிகாரியை நோக அடித்தனர் என்றெல்லாம் வதந்திகள் பரவின. 1993 வாக்கில் இன்னொரு செய்தி அடிபட்டது. அதாவது அந்த ஆண்டு முடிவதற்குள் ரிஷிகேஷிலிருந்து கணிசமான மின்னியல் அதிகாரிகள் ஓய்வு பெறப்போவதால் எங்களில் அனேகம்பேரை அந்த ப்ளாண்டுக்கு மாற்றப் போவதாக அறிந்தேன். அப்போதுதான் நான் விழித்துக் கொண்டு என்னுடைய விருப்ப ஓய்வு விண்ணப்பத்தை சமர்ப்பித்தேன். நல்ல வேளையாக ரிலீவும் செய்யப்பட்டேன். சிறிது தாமதித்திருந்தாலும் காரியம் கெட்டிருக்கும். ஏனெனில் எனக்கப்புறம் என் துறையில் வேலை செய்தவர்களுக்கு விருப்ப ஓய்வு மறுக்கப்பட்டது.

இவ்வளவு ஆண்டுகள் கழித்து பார்த்தாலும் ஐ.டி.பி.எல்லின் வீழ்ச்சி எனக்கு மனச் சோர்வை ஏற்படுத்துகிறது”.

9. பா.ரா தவிர எல்லா எழுத்தாளர்களும் பின்னூட்டப் பெட்டி வைக்காமல் கடிதப் போக்குவரத்தையே வைத்து கடிதங்களையும் பதிவுகளை வெளியிட்டு பதிவு எண்ணிக்கை அதிகரித்துக் கொள்கிறார்களே?
பதில்: அவர்களில் ஜெயமோகனது பதிவுக்கு வரும் ஹிட்ஸ்கள் அபாரம்.

10. காந்திஜி, லதா மங்கேஷ்கர் போன்ற பலர் தமிழில் எழுதவும் தெரிந்து வைத்திருந்தார்களே (விகடன் பொக்கிஷம்) - தமிழ் மீது அவர்களுக்கு என்ன அப்படியொரு பாசம்?? (அப்பாடா காந்தி பிறந்த நாள், லதா 80 இரண்டையும் சேர்த்து கனெக்ட் பண்ணியாகிவிட்டது)
பதில்: சரியாகப் பாருங்கள் தெலுங்கு, மலையாளம், கன்னடம் ஆகிய மொழிகளிலும் எழுதியிருக்கக் கூடும். அப்படியொன்றும் தமிழ் மீது மட்டும் என்ன பற்று வந்துவிடுமாம்? வேறு கருத்துகள் இல்லை.

சுதாகர்
1. டான் புரொனின் புதிய படைப்பான, The Lost Symbol, படித்தீர்களா? அல்லது படிக்க வேண்டுமென எண்ணம் உள்ளதா?
பதில்: டான் புரோனின் ஒரு புத்தகம் The Da Vinci Code வாங்கினேன், இன்னும் படிக்க முடியவில்லை. எனக்கு பிடிக்கவில்லை. அதன் ஃபிலிம் கூட அரசில் தடை செய்தார்கள்.

2. இந்திய விமான நிறுவன ஊழியர்கள் வரிசையாக வேலை நிறுத்தம் செய்கிறார்களே, அவர்கள் கோரிக்கை சரியா (அ) அவர்களை கட்டுப்படுத்த முடியாதா?
பதில்: இவர்களுக்கெல்லாம் மார்கரெட் தாச்சர்தான் சரி.

சவகிருஷ்ணா
1. சிட்டுகுருவி லேகியம் ருசித்துண்டா?
பதில்: இல்லை, எனக்கு அதன் தேவை ஏற்படவில்லை. அது இல்லாமலேயே செயல்பாடு அமர்க்களமாக இருந்தது.

கேடியார்
1. ஜம்மு காஷ்மீர் மாநில மக்களுக்கு சீனா வர சீன அரசு விசா தேவை இல்லை என்று சொல்லி இருக்கிறதே, உங்கள் கருத்து என்ன?
பதில்: விஷமத்தனமான்ச் செயல். தேசத்துரோகத்தனமாக சீனாவை அடிவருடும் இந்தியக் கம்யூனிஸ்டுகள் இதற்கு என்ன கூறுவார்களாம்?

கேடி/பேடி கண்ணன்
1.மத்தியப் பல்கலைகழகம் திருவாரூரில் அமைவதால் என்ன நன்மை? அந்த கல்லூரியில் என்ன பாடங்கள் சொல்லி தருவார்கள்.
பதில்: திருவாரூர் தொகுதி முன்னேறும். முதல்வர் குடும்பமும் முன்னேறும். அவ்வளவே.

2. இம்முறை ஏன் பதிவர் சந்திப்பு பதிவு போடவில்லை?
பதில்: எனது கார் அங்கு போய் சேரும் முன்னாலேயே நல்ல மழை. பதிவர்கள் மரத்தடியில் ஒண்டிக் கொண்டிருந்தனர். கொட்டும் மழையில் சமுத்திரக் கரையில் நின்று கால்களை நனைத்துக் கொண்டேன். திரும்பி வரும்போது எல்லோரும் டீக்கடைக்கு கிளம்பிக் கொண்டிருந்தனர். கைவசம் நோட்புக் வைத்துக் கொள்ளவில்லை. ஆகவே நோ ரிகார்ட்ஸ். நோ பதிவு.

மணி
Given a choice where would you like to live among these three places 1. Munich 2. Thenthirupperai 3. Triplicane
பதில்: திருவல்லிக்கேணிதான் அதில் என்ன சந்தேகம்?

பிருகு
1. சார் அப்படியே இதற்குமொரு பதில் சொல்லிவிடுங்கள்!! வீட்டில் மகாபாரதம் புத்தகத்தைப் படிக்ககூடாது என்கிறார்களே? எந்தளவுக்கு உண்மை. நான் இரண்டு முறை படித்த போதும் விரும்பத்தகாத அதிர்ச்சி செய்தி வந்தது. எனக்கும் அது சரியோ என்று தோன்றி விட்டது. மகாபாரதம் வீட்டில் படிக்கலாமா, கூடாதா?
பதில்: பாரதம் படித்தால் கலகம் வரும் என்பார்கள். பகவத் கீதையையும் பாராயணம் செய்யகூடாது என்பார்கள். கடவுள் மிகவும் சோதிப்பார் எனக் கேள்வி.

மகாபாரத நிகழ்ச்சிகள் பல எதிர்மறையான சிந்தனைகளை தூண்டுபவையாக சிலரால் பார்க்கப் படுகின்றன.

ரமணா
சுவிஸ்வங்கி நிர்வாகம் மத்திய அரசு விண்ணபித்தால் இந்திய பகாசுரக் கொள்ளையர்கள் கள்ளத்தனமாய் சேர்த்து வத்துள்ள 70 லட்சம் கோடிகள்(வல்லான் பொருள் குவிப்பு அல்ல இது- வழிப்பறி,மொள்ள மாறித்தனம்,மக்களின் உழைப்பை உறிஞ்சிய அட்டைக் கூட்டம், வரிஏய்ப்பு வல்லூறுகள்)பற்றிய தகவல் தரத்தயார் என் அறிவித்துள்ளதே!
1. என்ன நடக்கும்?
பதில்: ஒன்றும் நடக்காது. நாசர் பதவிக்கு வந்ததும் ஸ்விஸ் வங்கிகளை இவ்வாறு வற்புறுத்த, அந்த அரசும் எகிப்தின் அத்தனை டிபாசிட்காரர்கள் பெயரையும் பகிரங்கமாக அறிவிக்கப் போவதாக மிரட்டல் விட நாசர் பின்வாங்கினார். என்ன காரணமாக இருக்கும் என நினைக்கிறீர்கள்?

2. இதுவும் இன்னொரு கீரி-பாம்பு சணடை காட்டுவேன் என சொல்லி 100 ஆண்டுகளாய் வேடிக்க பார்க்க கூடும் பாமர மக்களை ஏமாற்றும் குறளி/மோடி வித்தையா?
பதில்: ஆம்.

3. இந்த சுநலமிகளுக்கு தெய்வ தண்டனையாவது கிடைக்குமா? (அரசன் அன்று கொல்வான்,தெய்வம் நின்று கொல்லும்)
பதில்: பலருக்கு தண்டனை கிடைத்துள்ளது. வங்கி கணக்கு வைத்திருப்பவர்கள் அதை ரொம்பவுமே ரகசியமாக செய்ய, அவர்கள் திடீரென இறந்ததும் வாரிசுதாரர்களுக்கு அக்கணக்கு இருந்தது கூடத் தெரியாது போன நிகழ்வுகள் உண்டு. அதுதான் தண்டனை என வைத்துக் கொள்ள வேண்டியதுதான்.

4. இவர்கள் அநியாயமாய் சேர்த்த அட்ட கருப்பு பணம் இவர்களுக்கும் இவர்கள் சந்ததியினருக்கு உதவமால் போக என்ன நடந்தால் நல்லது?
பதில்: மேலே உள்ள பதிலைப் பாருங்கள்.

5. வால் பையனின் கருத்து இதில் என்னவாயிருக்கும்?
பதில்: இன்று வியாழன் அல்லது நாளை வெள்ளியன்று அவர் பதில் தருவார். நானும் அதைப் பார்க்கும் ஆவலில் உள்ளேன்.

கிருஷ்ணகுமார்
1.Who is more dengerous to World peace u.s.a or china? why?
பதில்: சீனாதான். ஜனநாயக நாடான அமெரிக்காவில் இருக்கும் checks and balances அங்கு இல்லாததே முக்கியக்ஜ் காரணம்.

2.Female population always less than male population reason?
பதில்: பெண் குழந்தை எனத் தெரிந்தால் கருக்கலைப்பு செய்தல், பெண் குழந்தைகளை சரியாக பராமரிக்காது அவர்களை சாக விடுதல்

3.There is H2O in the moon. will you want to go & live there?
பதில்: எனக்கு இங்கு கிடைக்கும் பாலாற்றுத் தன்ணீரே போதும்.

4. tell does LOVE needs SACRIFICE?
பதில்: ஆம், ஆனால் அது இரு தரப்பிலிருந்தும் வருதல் அவசியம்.

5. Does your childhood deeds still haunt you ?
பதில்: அப்படியென்று சொல்லிக் கொள்கிற மாதிரி இல்லை.

ராகவ்
1. Dondu Sir, from your point of view, could you explain more on this topic
பதில்: “சாதி மற்றும் இனத்தை வைத்து பிழைப்பு நடத்துபவர்கள் தன்னம்பிக்கை அற்றவர்கள். ஆகவே, தன்னம்பிக்கை அற்று கற்பனை வாழும் வீணர்களின் கட்டுக்கதைகளுக்கு பதிலளித்தல், ஆதரித்தல், எதிர்த்தல் போன்றவை அவர்களக்கு ஊக்கம் அளித்து சமூக பிரிவினையை வளர்க்கும். கண்டுகொள்ளமல் விட்டுவிட்டால் அவர்கள் தானாகவே மனம் திருந்தி வாழ ஆரம்பிப்பார்கள். சமூகத்தில் சாதி, மத, இன வேறுபாடுகள் மெல்ல மறைந்து விடும்”, என ஒரு கருத்து கூறப்பட்டுள்ளது. அதை நான் ஆதரிக்கவில்லை. பொய்பிரசாரங்களை எல்லா தளங்களிலும் எதிர்த்தேயாக வேண்டும் என்றுதான் நான் கூறுவேன்

மீண்டும் அடுத்த வாரம் சந்திப்போமா?

அன்புடன்,
டோண்டு ராகவன்

La provocation policière

பிரெஞ்சில் இருக்கும் தலைப்பைப் பார்த்து பயப்பட வேண்டாம். போலீசாரால் தூண்டப் பெற்ற குற்றங்கள் என்றுதான் அதற்கு பொருள் கொள்ளப்படுகிறது. இந்தத் தலைப்பில் சமீபத்தில் 1979-ல் ஒரு புத்தகம் படித்தேன். குற்றவாளிகளை பிடிக்க பாடுபடும் போலீசார், சில சமயம் வேண்டுமென்றே மெனக்கெட்டு இவர்களாகவே குற்றம் புரியும் சூழ்நிலையை உருவாக்கி, சிலரை ஆசைக்காட்டி அழைத்து வந்து, அவர்களை அக்குற்றங்களைச் செய்வித்து பிறகு பிடித்து மெடல் வாங்கும் பல நிகழ்ச்சிகள் அதில் உண்மையான உதாரணங்களுடன் சித்தரிக்கப்பட்டிருந்தன. போலீஸ் என்றாலே உலகம் முழுக்க அப்படித்தானா என்ற ஏக்கமும் வந்தது.

நம்மூரில் கூட பார்த்திருக்கலாம். போக்குவரத்து போலீசார் ஹால்ட் & கோ என்று இருக்கும் போர்டுகளுக்கு சற்று தள்ளி மாருதி ஜிப்சியுடன் ஒளிந்திருப்பார்கள். ஏதேனும் கார்க்காரன் தெனாவெட்டாக அதை கடக்கும் போது பின்னால் துரத்திச் சென்று பிடிப்பார்கள். அப்போதுதானே கேஸ் கிடைக்கும், மாதக் கடைசி தொல்லையும் இல்லாதிருக்க இயலும்?

இதெல்லாம் ஏன் இப்போது சொல்கிறேன்? நடிகை புவனேஸ்வரியை போலீசார்களே போலி வாடிக்கையாளரை ஏற்பாடு செய்து அவரை வரவழைத்து பிடித்த நிகழ்ச்சி முதல் பார்வையிலேயே provocation policière என அறிய முடிகிறது. எழுபதுகளில் சோ அவர்களது நாடகம் யாருக்கும் வெட்கமில்லை பற்றி நான் எழுதிய இப்பதிவில் இவ்வாறு எழுதியிருந்தேன்.

“கதாநாயகி பரிமளா ஒரு விலை மாது. அவ்வாறு அவள் ஆவதற்கு முன்னால் அவளை முதலில் காதலித்து ஏமாற்றியிருப்பான் நாடகத்தின் வில்லன் - கதாநாயகன். பிறகு சந்தர்ப்பச் சூழ்நிலையால் அவள் விலை மாது ஆகிறாள்.

இதில் சோ அவளுக்கு ஆதரவாகப் பேசும் ராவுத்தர் பாத்திரத்தை ஏற்றிருந்தார்.

அதில் ஒரு காட்சி.

முதலில் காட்சியின் பின்புலத்தைப் பார்ப்போம். கதாநாயகனின் தந்தை அப்பாதுரையும் ராவுத்தரும் வியாபாரத்தில் பங்காளிகள். கதாநாயகி ஒரு விலைமாது என்பதை கதாநாயகனின் தாயிடம் கூறுவார் அந்த வீட்டுக்கு வந்திருக்கும் ரங்கநாதன் என்பவர். தான் விலை மாதிடம் போகும் வழக்கம் உடையவன் என்பதையும் அவ்வாறு செல்லும் ஒரு தருணத்தில் கதாநாயகியைக் கண்டதாகவும் அவர் கூறுவார்.

அந்தத் தாய் கதாநாயகியைத் திட்டி விட்டு ரங்கநாதனிடம் இன்னும் ஒரு ஸ்வீட் எடுத்துக் கொள்ளச் சொல்லி உபசரிப்பார். உடனே சோ கூறுவார்:

"அம்மா, நீங்கள் பிரமீளாவைக் குற்றம் கூறியது சரியே. அந்தப் பெண்ணைச் செருப்பால் அடியுங்கள். ஆனால் அதே செருப்பையெடுத்து இந்த ரங்கநாதனையும் ரெண்டு அடி அடிப்பதற்குப் பதிலாக அவனுக்கு இன்னும் ஒரு ஸ்வீட் எடுத்துக் கொள்ள உபசரிக்கிறீர்களே. இது என்ன நியாயம்?"

நான் ரசித்த மிகச் சிறந்த காட்சி இது. அதைத்தான் இப்போது நான் மறுபடியும் உங்கள் முன் வைக்க விரும்புகிறேன்.

விபசார ஒழிப்புச் சட்டம் விபசாரிகளை மட்டும் தண்டிக்கிறது. கொழுப்பெடுத்துப் போய் அவர்களிடம் செல்லும் வாடிக்கையாளர்களை மட்டும் விட்டு விடுகிறது.

இதே கேள்வி "ஜனவாணி" என்ற நேருக்கு நேர் நிகழ்ச்சியில் பொது மக்கள் தரப்பிலிருந்து அப்போதையச் சட்ட மந்திரி பரத்வாஜ் அவர்களிடம் வைக்கப்பட்டது.

ஆனால் அவர் கேள்வியைத் தவறாகப் புரிந்துக் கொண்டு (வேண்டுமென்றே?) பதிலளித்தார்.

கேள்வி: " விபசாரச் சட்டம் ஆண்களை ஏன் தண்டிப்பதில்லை?"

பதில்: " ஏன், நாங்கள் பிம்புகளையும் (pimps) தண்டிக்கிறோமே!"

வாடிக்கையாளர்களைப் பற்றி ஒன்றுமே கூறவில்லை.

நான் இப்போது வைக்கும் இன்னொரு கேள்வி. இச்சட்டம் பால் அடிப்படையில் பாகுபாடு (sexual discrimaination) செய்து பெண்ணை மட்டும் தண்டிக்கிறது. இது அரசியல் சட்டத்துக்கு விரோதமானது. ஆகவே இச்சட்டமே செல்லாது என நினைக்கிறேன். இவ்வாறு யாராவது ரிட் பெட்டிஷன் போட்டால் வெற்றி பெருமா?

இவ்வாறு செய்வது பலரது "மாமூல்" வாழ்க்கையைப் பாதிக்கும் என்பதை அறிவேன். ஆனால் எப்போதுதான் ரங்கநாதனையும் செருப்பால் அடிப்பது”?

“இதே நாடகத்தில் இன்னொருக் காட்சி நினைவுக்கு வருகிறது. கதாநாயகி நீதிமன்றத்தில் வைத்துக் கூறுவார்:"என்னுடைய வாடிக்கையாளர் ஒருவரை இங்கு இருப்பதைக் காண்கிறேன். நாளைக்கும் அவர் வந்தால் அவர் யார் என்பதைப் பகிரங்கமாகக் கூறிவிடுவேன்"

அடுத்த நாள் பார்த்தால் வேறு நீதிபதி வந்திருப்பார்”.

அன்புடன்,
டோண்டு ராகவன்

டோண்டு பதில்கள் - 1.10.2009

கேள்விகள் கேட்போருக்கு வழக்கமான ஒரு வேண்டுகோள். சில சமயம் எங்காவது இணையத்தில் படித்ததை ஆதாரமாக வைத்து கொண்டு கேள்விகள் கேட்கப்படுகின்றன. அதில் தவறில்லை. ஆனால் அப்படியே தமது கேள்விகளின் பின்புலனையும் கூறினால் சௌகரியமாக இருக்கும். நானே கூகளிட்டு பார்ப்பதுண்டு என்பது நிஜமே. ஆயினும் அந்த சுட்டி ரெடியாக கிடைத்தால் அதை தேடும் நேரம் விரயமாகாமல் பதிலில் இன்னும் அதிக முனைப்பாக இருக்கலாம் அல்லவா?

ஷிர்டி சாயிதாசன்
1. சுதந்திர மென்பொருட்களின் (Free/Libre Open Source Software) எதிர்காலம் பற்றி தங்களின் மேலான கருத்து என்ன? Example : Firefox
பதில்: இம்மாதிரி கேள்விகளுக்கு நான் அணுகும் தளங்களில் இந்த வலைப்பூ மிக முக்கியமானது. அதில் ஏன் சுதந்திர மின்பொருள் தேவை என்பது ஆணித்தரமாகக் கூற்ப்பட்டுள்ளது. ஆனால், எதேச்சையாக அந்த வலைப்பூவின் ப்ரொஃபைலை பார்க்கலாம் எனப் பார்த்தால் அவர் பெயர் ஷிர்டி சாயிதாசன் எனத் தெரிய வருகிறது. அவ்வ்வ்வ்.

சற்றே சீரியசாக கூறுகிறேன். ஃபைர்ஃபாக்ஸ் என்பது எனக்கு பிடித்த உலாவி. கூகள் குரோமும் அவ்வாறே. அவை இரண்டும் இருக்கும்போது இண்டெர்னட் எக்ஸ்ப்ளோரர் என்னைப் பொருத்தவரை அன்செலெக்ட்டட். ஆனால் லினக்ஸில் ஈடுபட இன்றுவரை சற்றே பிரத்தியேக கணினி அறிவு தேவைப்படுகிறது. அது எல்லோராலும் முடியுமா எனத் தெரியவில்லை. 90 சதவிகிதத்துக்கும் அதிகமாக பயனர்கள் ஏதோ கம்ப்யூட்டர் வாங்கினோமா அதைச் செயல்படுத்தினோமா என்றுதான் இருக்க ஆசைப்படுகிறார்கள். புது மென் பொருளை நிறுவும்போது அனேகம் பேர் இன்ஸ்டல்லேஷன் விஜார்டின் உபயோகத்தைத்தான் தெரிவு செய்கின்றனர்.

இந்த மனத்தடையை உடைத்து விட்டால் லினக்ஸ் வருவதற்கு ஒரு தடையும் இல்லை.


அனானி (24.09.2009 காலை 06.19-க்கு கேட்டவர்)
1. அன்பழகன், அண்ணாவின் மறைவுக்குப் பின் நடந்த முதல்வர் பதவி பிடிக்கும் சண்டையில் தினத்தந்தி ஆதித்தனாரின் பணபலத்துடன், எம்ஜிஆரை ஆசைவார்த்தை கூறி ஏமாற்றியும் முதல்வர்-திமுக தலைவர் பதவிக்கு வர முயற்சி செய்யும் கலைஞரின் தகிடுதத்தங்களை கண்ட பிறகு வெகுண்டு, பொதுக்கூட்டங்களில் கலைஞரை தலைவராய் நான் ஏற்றுக்கொள்ளமாட்டேன்.அப்படி நடந்தால் நான் வேட்டிகட்டிய ஆண்பிள்ளை என் எனது மனவிகூட ஏத்துக்கொள்ளமாட்டாள் என் கொக்கரித்தவ்ர் திடிரென பதவிக்காக கருணாநிதியின் காலில் விழுநதவர் இன்று வரை எழவில்லையே? இடையில் நடந்தது என்ன?
(இதை கொச்சையாக அப்போது பத்திரிக்கைகள் ஒரு சில விவரித்து எழுதியதை இந்த நாடறியும்)
பதில்: என்ன நடந்திருக்கும் என நினைக்கிறீர்கள்? மேலும் அப்போது கன்சிடெரேஷனில் இருந்தது நெடுஞ்செழியன்தான். அவரும் பிகு செய்து பார்த்தார். பிறகு வேறு வழியின்றி கருணாநிதியுடன் தன்னை இணைத்துக் கொண்டார். அவருக்கும் தனது பலவீனம் புரிந்து போனதால் மட்டுமே அவ்வாறு செய்தார். அன்பழகனுக்கும் அதே நிலைதான்.

2. சுகாதாரத்துறை அமைச்சராய் இருந்தபோது, தன் சொந்த மகளின் தோழியை (இளவயது மங்கை) இரண்டாம் தாரமாய் ஆக்கிகொண்டார் என சொல்லப்பட்டதே? அது உண்மையா?
பதில்: இந்த விஷயத்தை இப்போதுதான் கேள்விப்படுகிறேன். இதில் பார்க்க வேண்டியது ஒன்றுதான். சம்பந்தப்பட்ட இளநங்கையை அவர் ஃபோர்ஸ் எல்லாம் செய்ததாகக் கூற முடியுமா? இல்லையென்றால் இது அன்பழகனின் தனிப்பட்ட விவகாரம். அந்த இளமங்கை ஒத்துக் கொண்டால் அன்பழகனின் மகள் கூட இதில் தலையிட்டிருக்க முடியாது. அப்படியிருக்க வெளி ஆட்களாகிய நமக்கு அதை பற்றி பேச ஒரு விஷயமும் இல்லை.


கேடி/பேடி கண்ணன் (எப்படியெல்லாம் பேர் வைக்கிறாங்கப்பா!)
1. வட்ட வடிவு கிராமபோன் காலாவதி ஆன பின் சிடி தட்டாக வந்தது. பழமை என்றும் அழிவதில்லையா?
பதில்: சுற்ற வேண்டிய எதுவுமே வட்டமாகத்தான் இருக்கும், அதுதான் மிகச் சிக்கனமான கன்ஃபிகரேஷன். கிராமஃபோன், சிடி தட்டு என்று மட்டும் ஏன் நிறுத்த வேண்டும்? வெளியில் சதுரமாக தெரியும் ஃபிளாப்பி கூட தன்னுள்ளே ஒரு வட்டத்தைத்தான் வைத்துள்ளது.

2. தினகரன் நாளிதழ் புதுதில்லி பதிப்பு தொடங்கியுள்ளதே. தில்லியில் வெளிவரும் முதல் தமிழ் நாளிதழ் தினகரனா?
பதில்: எனக்குத் தெரிந்து அப்படித்தான் என நினைக்கிறேன். அதாவது தில்லியிலிருந்தும் அச்சிடப்படுவதைத்தானே கூறுகிறீர்கள்?

எம். கண்ணன்
1. நேஷனல் செக்யூரிடி அட்வைசர் எம்.கே நாராயணன் போன்றோர் (70+ வயதுடையவர்கள்) யாருடைய வழிகாட்டுதல்படி செயல்படுகிறார்கள் ? பரந்து விரிந்த நமது தேசத்தின் பல்வேறு பிரச்னைகளை, அன்னிய நாட்டின் தாக்குதல்கள், உள்நாட்டு / வெளிநாட்டு தீவிரவாதங்கள் போன்ற பலவற்றிற்கும் இப்படித்தான் நடவடிக்கை எடுக்க வேண்டும் என பிரதமருக்கும், சோனியாவுக்கும், ப.சிதம்பரத்திற்கும் பாதுகாப்பு, வெளியுறவு அமைச்சர்களுக்கும், அட்வைஸ் கொடுக்குமளவிற்கு அவருக்கு (அந்த பதவியில் இருப்பவருக்கு) எப்படி எல்லா விஷயங்களிலும் நாட்டு நலன் பற்றியே சிந்திக்கத் தோன்றும்?
பதில்: எப்படித் தோன்றும் என்றெல்லாம் கேள்வி கேட்கக் கூடாது. தோன்றியே ஆக வேண்டும். நட்டுக்கு நிரந்தர எதிரிகள் அல்லது நண்பர்கள் என்றெல்லாம் இல்லை. நாட்டின் நலமே நிரந்தரம் என்பதுதான் ஒரு நாட்டின் அயல்நாட்டுக் கொள்கையின் மூலாதாரம். சாணக்கியர் காலத்திலும் அதையே சொன்னார்கள். இன்னும் பல நூற்றாண்டுகள் கழித்தும் அதையே சொல்வார்கள்.

2. உன்னைப் போல் ஒருவன் - கமல் போட்டிருக்கும் வெள்ளைச் சட்டைக்குள் பூணுல் தெரிகிறதா? பெயர் பட்டியலில் இரா.முருகன் பேர் இருட்டடிப்பு ஏன்? (நான் சில வாரங்கள் முன்பு கேட்டிருந்த 'தமிழ் படங்களில் படத்தில் பணியாற்றியவர்கள் பெயர் போடும்' கேள்வியை மீண்டும் பார்க்கவும்?
பதில்: இது சம்பந்தமாக நான் இரா. முருகன் அவர்களுக்கே போன் செய்து கேட்டேன். தமிழ்த் திரையுலகின் சில நடைமுறைகளை விளக்கினார் அவர். மேலும் எல்லா மீட்டிங்குகளிலும் சம்பந்தப்பட்ட டைரக்டர் வெளிப்படையாகவே கூறி அவரை கூப்பிட்டு கௌரவித்தார் என்றார். இன்னும் சில நாட்கள்தான், நம்ம முருகன் சாருக்கும் சுஜாதா அளவுக்கு பெயர் கிடைக்கும். அப்போது அவர் பெயரை போஸ்டரில் போடுவது தயாரிப்பாளருக்கு படத்தை விற்பதில் உதவி செய்யும். அதுவரை போடுவதும் போடாததும் தயாரிப்பாளர் இஷ்டம்.

அம்முறையில் அபூர்வ ராகங்கள் படம் என நினைக்கிறேன், அதன் தெலுங்கு வெர்ஷனின் தயாரிப்பாளர் எல்லோர் பெயரையும் விட்டு விட்டு ஆஃபீஸ் பாயின் பெயரை மட்டும் போட்டதாகவும் கூட அக்காலக் கட்டத்தில் படித்ததாக ஞாபகம். அபூர்வ ராகங்கள் படம் இல்லையென்றால், வேறு ஏதோ கே. பாலசந்தர் படம்.

3. விஜய்யின் அழகிய தமிழ் மகன் படத்தை சிலாகித்து எழுதியிருந்தீர்கள். அந்தப் படம் தற்கால இளைஞர்களின் (பெரும்பாலான) நடைமுறையை காட்டும் படம் - குடி, சிகரெட், போதைப் பொருள், பெண்ணை ரிசார்ட்டுக்குத் தள்ளிக் கொண்டு போவது, ஆள் மாறாட்டம், மோசடி என - இளைஞர்களின் சீரழிவைத்தான் காட்டுகிறது. அதுவும் படம் அவ்வளவாக ஓடவில்லை.
பதில்: அப்படத்தை நான் எதேச்சையாக டிவியில் எந்த எதிர்பார்ப்பும் இன்றிதான் பார்த்தேன். ஒருவன் மனக்கண்ணின் மூலம் எதிர்க்காலம் தோன்றுவது என்பது சுவாரசியமான விஷயம்தானே. அப்படத்தின் கிளைமாக்சுக்கும் ஒருவித மனோதத்துவ கான்சப்ட்தான் அடிப்படையாக இருந்தது. அதெல்லாம் இப்படித்தான் ரூம் போட்டு யோசிப்பாங்களோ என்னும் எனது இப்பதிவில் எழுதியுள்ளேனே.

4. கண்ணதாசனின் வனவாசம் புத்தகத்தில் கருணாநிதியைப் பற்றி எழுதியிருப்பது பற்றி உங்கள் கருத்து என்ன?
பதில்: அப்புத்தகம் இதுவரை படித்ததில்லை. வெறுமனே கேள்விப்பட்டுள்ளேன்.

5. சாதாரண வைரல் ஜுரத்துக்கு கொடுக்கப்படும் ஆண்டிபயாடிக்ஸ் மருந்துகளின் விலை (சில வருடங்களுக்கு முந்தைய விலையை விட) மிக அதிகமாகிவிட்டதே? இது மாதிரி மருந்து கம்பெனிகள் அதிக விலை வைத்து விற்பதில் எத்தனை பங்கு மத்திய சுகாதார அமைச்சருக்கு?
பதில்: வைரல் ஜுரங்களுக்கு ஓய்வு மட்டுமே தேவை. எங்கள் டாக்டர் அதைத்தான் சொன்னார்.

6. மருந்து கம்பெனிகளின் தொழிற்சாலைகள் பெரும்பாலும் சில்வாச, ஹிமாச்சல், பாண்டிச்சேரி என யூனியன் பிரதேசமாக உள்ளதே? எத்தனை வருடங்களுக்கு அவர்களும் வரிச்சலுகைகள் கொடுத்துக் கொண்டிருப்பார்கள்?
பதில்: வரிச்சலுகைகள் எல்லாம் ஒரு ஸ்டேட் தனது மாநிலத்தில் உற்பத்தியை அதிகரிக்க தருவது. மேலும் பல நோக்கங்களும் உண்டு. என்னிடம் அவற்றைச் சொல்வதற்கான தகவல்கள் இல்லை.

7. சி பி எஸ் இ பாடத்திட்டத்தில் 10ஆம் வகுப்புக்குத் தேர்வு இல்லை எனவும் இனிமேல் மதிப்பெண்கள் கிடையாது - கிரேடுகள் எனவும் சொல்கின்றனரே? உங்கள் கருத்து என்ன? நமது இந்திய கல்வித்திட்டத்தில் எத்தனையோ குளறுபடிகள் இருந்தாலும் இத்தனை வருடங்களாக இருந்த மனப்பாடம் முறைதானே நமது நாட்டு மாணவர்களுக்கு இளைஞர்களுக்கு இவ்வளவு உயரம் செல்ல உதவியிருக்கிறது. மற்ற நாட்டவரைக் காட்டிலும் (சீனா, அமெரிக்க, ஐயோப்பிய) நமது மாணவர்கள்/இளைஞர்கள் தானே கணக்கிலும், அறிவியலிலும் புலியாக இருந்து வந்துள்ளார்கள்? அதனால்தானே பெரிய பெரிய தொழில் நுட்ப நிறுவனங்கள் அவர்களுக்கு இது நாள் வரை சிவப்புக் கம்பளம் வரவேற்பு கொடுத்துள்ளது ? நாமும் அமெரிக்க முறைக்கு மாறிவிட்டால் பெரும்பான்மை அமெரிக்க மாணவர்களைப் போல மந்தமான கூட்டங்களைத் தான் உற்பத்தி செய்யப் போகிறோமா?
பதில்: இந்த கிரேடுகள் முறை எனக்கு பிடிபட்டதே இல்லை. இதிலிருந்து முதல் ரேங்கில் பாஸ் செய்ததை எவ்வாறு கண்டுபிடிப்பார்கள் என்றும் புரியவில்லை. அதற்கு மட்டுமாவது மதிப்பெண்களை பார்ப்பார்களாக இருக்கும்.

முன்பெல்லாம் எட்டாம் வகுப்பு முடிந்ததுமே ஒரு பரீட்சை வைத்தார்கள். சில வேலைகளுக்கு அதையே குறைந்தபட்சத் தகுதியாகவும் வைத்தார்கள். பிறகு அம்மாதிரி வேலைகளுக்கு பள்ளியிறுதிப் பரீட்சையையே குறைந்தபட்சத் தகுதியாக மாற்றினார்கள். இப்போது 12-ஆம் வகுப்பாக மாற்றுவார்களோ? என்னைப் பொருத்தவரை இம்மாதிரி பொதுக் கல்வியின் காலகட்டத்தை அதிகரிப்பது நல்லதல்ல. உதாரணத்துக்கு பத்தாம் வகுப்பில் கணக்கு வராதவர்கள் வேறு குரூப்புகளுக்கு போக முடிந்தது. இப்போது அவர்களுக்கு இன்னும் இரண்டு ஆண்டுகள் சித்திரவதை அதிகம்.

8. விஜய் டிவியில் (கடந்த 3 நாட்களாக) இரவு பத்து மணிக்கு ரஜினி சென்ற பாபா குகைக்கு ஜூ.வி (உ)ஆசிரியர் செல்லும் வழிப்பயணத்தை 'நடந்தது என்ன' நிகழ்ச்சியில் காட்டி வருகிறார்கள். இன்று கடைசி எபிசோட். அநேகமாக குகையைக் காட்டிவிடுவார்கள் என நினைக்கிறேன். நீங்கள் டெல்லியில் வசித்தபோது ஹரித்வார், ரிஷிகேஷ் எல்லாம் சென்றதுண்டா? பத்ரிநாத்? கேதார்நாத்? மழை, குளிர், மலைச்சரிவு என இயற்கையின் பிடியில் எப்படி அங்கேயே வசிக்கும் மக்களால் வாழமுடிகிறது?
பதில்: கேதார்நாத் போனதில்லை. மீதி இடங்களுக்கு சென்றுள்ளேன். பத்ரிநாத்தில் குளிர்காலத்தில் சாதாரண மக்கள் வாழ அனுமதியில்லை. சம்மரில் கோவில் திறக்கும் காலத்தில்தான் ராணுவத்தினர் அவர்களை அனுமதிக்கின்றனர். இது முக்கியமாக ராணுவம் சம்பந்தப்பட்ட விஷயம். மற்றப்படி மக்களால் எங்குமே வாழவியலும். எஸ்கிமோக்களை விடவா?

9. தினமும் வாக்கிங் எனப்படும் நடைப்பயிற்சி தவிர, எளிதாக செய்யக்கூடிய யோகா அல்லது பயிற்சி ஏதேனும்?
பதில்: யோகாவுக்கு நல்ல குரு தேவை. தேகப் பயிற்சிகளுக்கும் அவ்வாறே. எனது மனநிலைக்கு நடைப் பயிற்சியே உத்தமம்.

10. ஜூ.வி.ஆசிரியர் வெங்கடேஷ் எனப்படும் விகேஷ் - வருமானத்திற்கு அதிகமான சொத்து என கண்டுபிடித்து அனுப்பினார்களாமே ? நீதித்துறை (பி.டி.தினகரன்), பத்திரிக்கைத்துறை என எல்லா தூண்களிலும் கரையான் அரிக்க ஆரம்பித்துவிட்டதே?
பதில்: விகேஷ் விஷயமாக முன்னாள் விகடன் ஆசிரியரை சந்தித்து நான் கேட்டபோது அவர் நடந்த உண்மை விகேஷுக்கும் விகடன் மேலிடத்துக்கும் மட்டுமே தெரியும் எனக் கூறிவிட்டார். விகேஷை சில மாதங்களுக்கு முன்னால் நான் வேறு விஷயமாக ஒரே ஒரு முறை சந்தித்துள்ளேன். அவ்வளவே.

மற்றப்படி ஊழல் புகார் இப்போது எந்த துறையையுமே விட்டுவைப்பதில்லை. வருவாய்க்கு மீறிய சொத்து என்பது சாதாரணமாக அவமானமாகக் கருதப்படாததே காரணம். பணம்தான் எல்லாவற்றையும் தீர்மானிக்கிறது.

அனானி (24.09.2009 பிற்பகல் 03.40-க்கு கேட்டவர்)
1. What is your view/comments on Umberto Eco’s view in Guardian about good handwriting?
பதில்: எந்த ஒரு திறமையுமே அதன் தேவை இருக்கும்வரை மட்டுமே போற்றப்படும். முன்பெல்லாம் பத்திரம் எழுதுபவர்கள் என்று ஒரு ஒரு தனி குழாமே இருந்தது. அவர்கள் எழுத்துக்களை கம்பீரமாகத் தோன்றுமாறு எழுதுவார்கள், முக்கியமாக லத்தீன எழுத்துகளில். இப்போது அந்த எழுத்துக்கள கணினிமயமாக்கப்பட்டு யார் வேண்டுமானால் தட்டச்சிட வசதியுடன் வந்து விட்டது. இப்போதெல்லாம் அலுவலகங்களில் ஸ்டெனோ டைப்பிஸ்டுகளை பார்க்க முடிகிறதா எனத் தெரியவில்லையே. ஒரு வேளை அரசு அலுவலகங்கள், நீதி மன்றங்கள் ஆகிய இடங்களில் மட்டுமே மட்டுமே நாம் மெகானிகல் தட்டச்சுப் பொறிகளை பார்க்கவியலும் என நினைக்கிறேன். எல்லாம் கணினியிலேயே அடித்து வன்தகட்டில் சேமித்தும் வைக்க முடியும்போது ஸ்டெனோக்கள், டைப்பிஸ்டுகள் தேவை அனேகமாக மறைந்தே விட்டது என்றே கூறலாம். அதே போலத்தானே கையெழுத்தில் எழுதுவதும்? இனிமேல் எதிர்காலத்தில் வேறு வகையான தேவைகளுக்கு அத்திறமைகள் மீண்டும் தேவைப்படலாம் யாரே அறிவர்? பை தி வே, நாங்கள் பொறியியல் கல்லூரியில் படித்தபோது உபயோகித்த ஸ்லைட்ரூல்கள் எங்கே போயின?

2. எஸ்ரா, பாரா, இரா அடுத்து நராவிற்கு வாய்ப்பு வருமா?
பதில்: நராவா அது யார்? அவரை நான் நேரில் பார்த்ததே இல்லையே?

கிறுக்கன்
1. ஆன்மீகத்தின் எல்லை எது? (அனுபவத்தில், சாதாரண மனிதனுக்கு)
பதில்: அமைதி, பேரமைதி, எல்லோருக்குமே.

2. குடும்பத்திற்காக ஆண்மகன் எதையெதை விட்டுக் கொடுக்கலாம்?
பதில்: குடும்பத்தின் நியாயமான ஆசைக்காக வேண்டுமானால் விட்டுக் கொடுப்பதில் தவறில்லை. ஆனால் அதே சமயம் தன்னை மெழுகுவர்த்தியாக எல்லாம் கருதிக் கொண்டு தன்னை வருத்தி செயல்படுவது அனாவசியம். குடும்பத்திலுள்ள மற்றவர்களும் பொதுக் கஷ்டத்தை உணர்ந்து தத்தம் பொறுப்புகளை சுமக்கச் செய்ய வேண்டும்.


சுதாகர்
//எனது ஆட்சியில் ”பொதுப் பணித்துறை“ அமைச்சராக நீ இருந்தபொழுது, “பொதுப்பணியை“ கவனிக்காமல், “கலைப்பணி“ யில் ஈடுபட்டு, “காகிதப்பூ“ கதாநாயகியை கர்ப்பிணியாக்கி நான் சொன்னதால், இரண்டாவதாக மணம் புரிந்ததையும் நான் அறிவேன்.//
இது உண்மையா?
பதில்: உண்மையா பொய்யா என்பது சம்பந்தப்பட்டவரது தனிப்பட்ட பிரச்சினை. கண்டிப்பாக வெளி ஆட்கள் அதைப் பற்றிப் பேசலாகாது. இந்த பதிலைத் தரவேண்டும் என்பதற்கு மட்டுமே இந்தக் கேள்வியை அனுமதித்தேன்.


ரமணா
1. தண்ணீர் கட்டணம் கட்டுகிறோம் ஆனால் குழாயில் குடி தண்ணிர் வரவில்லையே?
பதில்: கோர்ட்டில் பொதுநலவழக்கு போட்டு சொத்துவரி வாங்காமல் இருக்க ஸ்டே வாங்கலாம். பலர் பலமுறை செய்துள்ளனர். முக்கியமாக அறுபதுகளில் பழைய மாம்பலவாசிகள் செய்துள்ளனர். வெற்றியும் பெற்றுள்ளனர்.

2. குளத்தை,கால்வாயை தூர்வாரியதாய் செய்தி போட்டு விழாவும் எடுகிறார்கள் ஆனால் மழைகாலத்தில் அவையெல்லாம் பல்லிளிக்கின்றனவே?
பதில்: தகவல் அறியும் சட்டம், பொதுநல வழக்கு.

3. பட்டவர்த்தனமாய் பகல் கொள்ளையாய் லஞ்சம் வாங்கும் தமிழக அரசு (அரசு கொள்ளை கொள்ளையாய் 6 வது ஊதியக் குழுவில் கொட்டிக் கொடுத்த பிறகும்) பத்திரப்பதிவுத் துறை, போக்குவரத்துத் துறை, ரெவினியு துறை,நெடுஞ்சாலைத் துறை, மின்பகிர்மானத்துறை, ரேசன் கடைகள்) ஊழியர்களில் ஒரு பகுதியினர் செய்யும் ஊழல்கள்
பதில்: பத்திரிகைகளில் எழுதுதால், குறிப்பிட்ட உதாரணங்களுடன், பொதுப்படையாக அல்ல.

4. பேட்டை தாதாக்கள் போல் கப்பம் வாங்கும் ஒரு சில அரசுத்துறைகள்
பதில்: பொதுநல வழக்கு

5. எதுவும் செய்யாமல் தன் வயிறு வளர்க்கும் அரசியல் சுரண்டல் பெருச்சாளிகள்?
பதில்: தில் இருந்தால் (பை தி வே மேலே சொன்ன கேள்விகள் சம்பந்தமான நடவடிக்கைகளிலும் அந்த தில் தேவைதான்) பத்திரிகைகளுக்கு தகவல் தரலாம்.

6. உணவுப் பொருட்களை பதுக்கி விற்கும், பகாசுரக் கொள்ளையர்கள்
பதில்: அன்னியன் வெப்சைட் அப்படியே உள்ளதா?

7. நச்சு கலந்த வேதியப் பொருட்களை குடி தண்ணிரில் கலக்கும் கயவர்கள்?
பதில்: அன்னியன்?

8. காற்றினை மாசுபடுத்தும் கல்நெஞ்சக்காரர்கள்?
பதில்: அன்னியன். அவர்களையும் அதே காற்றை அதிக அளவில் சுவாசிக்க விடவேண்டும்.

9. மரபுஅணு மாற்றத்தோடு இந்திய விவசயத்தை குழி தோண்டி புதைக்க நினைக்கும் அறிவு ஜீவிகள்?
பதில்: மக்களின் விழிப்புணர்வை தூண்ட வேண்டும்.

10. பொய்யான போலி விளம்பரம் தந்து தன் சொத்தை பெருக்கும் பேராசைக்காரர்கள்?
பதில்: இம்மாதிரி விளம்பரங்கள் மக்களது பேராசை உணர்வுக்கு தீனிபோட்டே வளர்கின்றன. எதுவுமே வாழ்க்கையில் இலவசம் இல்லை என்னும் அறிவு மக்களிடம் வளர வேண்டும். அது இல்லாதவரைக்கும் இம்மாதிரி ஏமாற்றங்கள சகஜமே.

இவ்வாரத்துக்கான பதில்களுக்கான பதிவு திங்களன்றே ஃபைனலைஸ் செய்யப் பட்டு முன்னமைவு கொடுக்கப்பட்டு விட்டது. 32 கேள்விகள் கேட்கும் அனானி புதனன்று கேட்டதாலும், அவரது கேள்விகள் நான் அன்றையதினம் பெரிய துபாஷி வேலைக்கு செல்வதால் பதிலளிக்க நேரம் இல்லாததாலும் என்பதாலும் அவற்றை அடுத்த பதிவுக்கு கொண்டு செல்கிறேன். மீண்டும் அடுத்த வாரம் சந்திப்போமா?

அன்புடன்,
டோண்டு ராகவன்