டோண்டுவை கவர்ந்த நிகழ்வுகள்/செய்திகள்-1

நண்பர் நக்கீரன் பாண்டியன் எனது டோண்டு பதில்கள் 01.01.2009 பதிவில் இவ்வாறு பின்னூட்டம் இட்டுள்ளார். “ஜெயமோகன் பதிவுகளில் உள்ள சிறப்பானவற்றை தொகுத்து வழங்கியது போல் பிற உங்களை கவர்ந்த பிரபல பதிவர்களின் பதிவுகளில் ,தாங்கள் படிக்கும் சிறப்பான பதிவுகளின் சாராம்சத்தை சுருக்கமாய் கொடுத்தால்,உங்கள் பதிவுகளுக்கு நாளும் வந்து போகும் 600-700 வாசகர்கள் நன்மை பெறுவர்களே. நீங்கள் பல சுட்டி கொடுத்துள்ளீர்கள், இருந்தாலும் இந்த வேண்டுகோளை பரிசீலிக்கவும். டோண்டு பதில்கள் மாதிரி டோண்டுவை கவர்ந்த நிகழ்வுகள்/செய்திகள் புதிய தொடர் வாரம் ஒரு முறை பதிவு மலரட்டுமே”!

நல்ல யோசனைதான். ஆகவே செய்ய வேண்டியதுதான். எப்போது? எப்போதோ என்ன இப்போதே ஆரம்பித்து விடுகிறேன். பதிவர்கள் என்றில்லை நான் அனுபவிக்கும் எல்லா நிகழ்வுகளுமே இங்கு பரிசீலனைக்கு வைக்கப்பட்டு அவற்றிலிருந்து சுவாரசியமானவை தேர்ந்தெடுக்கப்பட்டு பதிவுகளாக வரும். முதலில் எங்கிருந்து ஆரம்பிப்பது என்ற யோசனைக்கே இடமில்லை. தமிழ் பதிவுகளில் நான் படித்த முதல் பதிவரிலிருந்தே ஆரம்பிக்கிறேன். அவர்தான் நண்பர் என்றென்றும் அன்புடன் பாலா. அவரேதான், இந்த டோண்டு ராகவன் பதிவு போட காரணமாக இருந்தவர். “ஐயோ பாவம், அவர் செஞ்சதை எத்தனைவாட்டி சொல்லி அவரை போட்டு கொடுப்பே” என்று கத்துகிறான் முரளி மனோஹர்.

மார்கழி மாதம் ஆரம்பித்த நாளில்ருந்தே அவர் தினம் ஒரு திருப்பாவை என்ற ரேஞ்சில் பதிவிட்டு வருகிறார். கடந்த ஆண்டு மார்கழியில் செய்ததை இப்போது விரிவுபடுத்தி எழுதுகிறார். இந்த மார்கழி முதல் தேதி அவர் இட்ட பதிவு அவரது வலைப்பூவின் 400-வது பதிவு என்பதும் இன்னொரு விசேஷம். அதில் அவர் எழுதுகிறார், “சென்ற வருடம் மார்கழி மாதத்தின் போது ஒரு சில திருப்பாவை பாசுரங்களுக்கு பொருள் விளக்கத்தையும், சிறப்பையும் எனது திருப்பாவைப் பதிவுகளில் எழுதியிருந்தேன்.

விட்டுப்போன பாசுரங்களுக்கு, பொருள் விளக்கத்தையும், சிறப்பையும் எடுத்துச் சொல்லும் பதிவுகளை இந்த மார்கழி மாதம் இட உத்தேசம். திருப்பாவையின் முதல் பாடலிலிருந்து ஆரம்பிக்கிறேன். அதற்கு முன் மார்கழி பற்றியும், பாவை நோன்பு குறித்தும் ஒரு சிறிய முன்னுரை !

மார்கழி, பன்னிரண்டு தமிழ் மாதங்களில் ஒரு மாதம். 'மாரி' என்ற வார்த்தையிலிருந்து உண்டானது 'மார்' என்பது. 'மாரி' என்றால் மழை என்று பொருள். 'கழி' என்றால் 'கழிந்த' அல்லது 'பின்னர்' என்று அர்த்தம். எனவே, மழைகாலம் முடிந்த பின்னர் ஆரம்பிக்கும் மாதம் என்று பொருள்.

மார்கழி மாதத்தில், முக்கியமாக பெண்கள் ஏற்கும் விரதம், 'மார்கழி நோன்பு' ஆகும். ஆயர்ப்பாடியிலுள்ள கன்னியர்கள், நாட்டு நலத்திற்காகவும், பால் வளம் பெருகவும், நல்ல கணவர்களை அடையவும், நோன்பு நோற்றனர். மார்கழியில் நோற்றதால் மார்கழி நோன்பு என்றும், கன்னிப் பெண்களால் நோற்கப்படுவதால் 'பாவை நோன்பு' என்றும் கூறப்படுகின்றது. கன்னியர்கள் விடியற்காலை எழுந்து, மற்றப் பெண்களையும் எழுப்பி, ஆற்றங்கரை சென்று, அங்குள்ள மணலினால் பாவை போன்ற உருவம் செய்து, மலர்கள் சூட்டி, பார்வதிதேவியை பாடித் துதித்து வழிபட்டனர்.

தான் பிறந்து வளர்ந்தது ஸ்ரீவில்லிபுத்தூர் ஆயினும், தன்னை கோகுலத்திலுள்ள கோபியராகவே கருதி, கண்ணனை மணக்க வேண்டி, 'பாவை நோன்பு' நோற்ற சமயம் சூடிக் கொடுத்த நாச்சியார் பாடிய முப்பது பாடல்களே 'திருப்பாவை'.

'திருப்பாவை' யும் (திருமால் மீது பாடப்பட்ட பாடல்கள்), மாணிக்கவாசகர் சிவபெருமான் மீது இயற்றிய 'திருவெம்பாவை' யும் பாவைப் பாட்டுக்களில் சிறந்தவை. திருப்பாவை முப்பது பாடல்களைக் கொண்டது. திருவெம்பாவை இருபது பாடல்களைக் கொண்டது. இந்த இருபது பாடல்களுடன் 'திருப்பள்ளியெழுச்சி' யிலுள்ள பத்து பாடல்களும் சேர்த்து அதுவும் முப்பது பாடல்களாக மார்கழி மாத முப்பது நாட்களிலும் பாடப்படுகின்றது. இப்பாடல்களில் பக்திப் பெருக்கும், தன்னலமற்ற இறைசேவை ஆகியவை தவிர வேறு நோக்கம் எதுவும் இல்லாமலிருப்பதையும் காணலாம்”.

திருப்பாவையில் எனக்கு பிடித்த பாட்டு உந்து மதகளிற்றன் ஓடாத தோள்வலியன் என்று தொடங்கும் 18-வது பாடல். அது பற்றி பதிவர் தேசிகன் எழுதியதைப் பார்ப்போம்.

“திருப்பாவை - 18
நந்த கோபரின் மருமகளான நப்பின்னை பிராட்டியை எழுப்புதல்
ஸாவேரி ராகம், ஆதி தாளம்

உந்து மதகளிற்றன் ஓடாத தோள்வலியன்,
நந்தகோ பாலன் மருமகளே! நப்பின்னாய்!
கந்தம் கமழும் குழலீ! கடைதிறவாய்;
வந்தெங்கும் கோழி அழைத்தனகாண்; மாதவிப்
பந்தல்மேல் பல்கால் குயிலினங்கள் கூவினகாண்;
பந்தார் விரலி! உன் மைத்துனன் பேர்பாட,
செந்தா மரைக்கையால் சீரார் வளையொலிப்ப
வந்து திறவாய், மகிழ்ந்தேலோ ரெம்பாவாய்.

பொழிப்புரை:
மத யானையை மோதி தள்ளுகின்ற வலிமையும், போரில் பின் வாங்காத
தோள்ளை படைத்தவனுமான நந்தகோபாலன் மருமகளே ! நப்பின்னையே!
மணம் வீசும் கூந்தலை உடையவளே கதவைத்திற!
கோழிகள் சுற்றிலும் வந்து கூவுவதைக்கேள்!
குருக்கத்தி(மல்லிகைப்பூ) கொடிப் பந்தலில் குயில்கள் பலமுறை கூவி விட்டன
பந்தைத் தாங்கிய விரல்களையுடையவளே ! உன் கணவன் பேர் பாட வந்துள்ளோம்.
உன் தாமரைக் கையால் வளையல்கள் ஒலிக்க
மகிழ்ச்சியுடன் வந்து கதைவை திறக்கவேணும்.

ராமானுஜருக்கு பிடித்த திருப்பாவை
ராமானுஜருக்கு திருப்பாவையில் ஈடுபாடு மிக அதிகம். அதனால் அவர் திருப்பாவை ஜீயர் என்ற பெயர் பெற்றார். இந்த பெயரையே அவர் விரும்பினார்.
"உந்துமத களிற்றன்" என்ற திருப்பாவை பாடிக்கொண்டு பிக்ஷைக்கு ஒரு நாள் பெரிய நம்பி திருமாளிகைக்கு (வீட்டிற்கு) சென்ற போது "செந்தாமரைக் கையால் சீரார் வளையொலிப்ப வந்துதிறவாய்" என்று பாடி முடிக்க, நம்பியின் மகள் அத்துழாய் கைவளை குலுங்கக் கதவை திறப்பதும் ஒரோ சமயம் நிகழ, ராமானுஜர் அவளை நப்பின்னை என்று நினைத்து ஸாஷ்டாங்கமாக விழுந்து தண்டம் சமர்ப்பித்தார் (சேவித்தார்) என்று கூறுவர்.
இதனால் இந்த பாட்டை கோயில்களில் இன்றும் இரண்டு முறை பாடுவது வழக்கம்”.

அப்பதிவுக்கு நான் இட்டப் பின்னூட்டம்:
“ராமானுஜர் தன்னைச் சேவித்து மயக்கமடைந்ததைக் கண்ட அத்துழாய் திகைத்து நிற்க, அப்பக்கம் வந்த பெரிய நம்பி ராமானுஜரை ஆதரவுடன் எழுப்பி, "என்ன திருப்பாவை ஜீயரே, 'உந்து மதகளிற்றன்' பாடலை பாடிக் கொண்டே வந்த போது அத்துழாயைக் கண்டு இச்சிறுமிதான் நப்பின்னை என்று மயங்கினீரோ?" என்றுக் கேட்டதாகவும் அதன் பின்பே ராமானுஜருக்கு இப்பெயர் வந்ததாகவும் நான் அறுபதுகளில் கல்கியில் படித்த ஞாபகம்.
எனக்கு மிகப் பிடித்தத் திருப்பாவைப் பாடல்களில் இது மிக முக்கியமானது”.

இந்தப் பாடலுக்கு பாலா அவர்கள் எழுதப்போவதை பார்க்க நான் ஆவலுடன் இருக்கிறேன்.

அன்புடன்,
டோண்டு ராகவன்