எங்கே பிராமணன் - மனதை கொள்ளை கொள்ளும் மெகா தொடர்

எனது டோண்டு பதில்கள் - 05-02-2009 பதிவுக்காக எம். கண்ணன் என்பவர் இந்த கேள்வி கேட்டிருந்தார். கேள்வியும் அதற்கு நான் தந்த பதிலும் கீழே.

“1. 'எங்கே பிராமணன்' - சோவின் கதை ஜெயா டிவியில் திங்கள் முதல் தொடராக (8pm) வருகிறதே. பார்க்கிறீர்களா?
பதில்: நீங்கள் சொல்லித்தான் அதையே நான் அறிந்தேன். உங்கள் பின்னூட்டத்தை மட்டுறுத்தக்கூட செய்யாது தொலைகாட்சிப் பெட்டிக்கு ஓடினேன். மணி சரியாக எட்டாயிற்றே. பை தி வே இன்றுதானே (02.02.2009) ஆரம்பம்? உங்களுக்கு முதற்கண் நன்றி”.

உண்மைதான். முதல் எபிசோடை பார்த்து விட்டுத்தான் பின்னூட்டத்தையே மட்டுறுத்தினேன்.

சீரியலைப் பற்றி பேசும் முன்னால் கண்ணன் அவர்கள் இது சம்பந்தமாக கேட்ட மற்ற கேள்விகளையும் அவற்றுக்கான பதில்களையும் இங்கு மீண்டும் தருவேன்.

“2. ஞாயிறன்று காட்டப்பட்ட முன்னோட்டம் பார்த்தீர்களா? யாராவது கேஸ் போட்டு தடை வாங்குவார்களா? இல்லை இது பிராமணர்களை கிண்டல் செய்யும் சீரியல் என குளிர் காய்வார்களா?
பதில்: விஷயமே திங்களன்று மாலை 07.55-க்குத்தானே உங்கள் கேள்வி மூலம் அறிந்தேன். ஆகவே ஞாயிறன்று நிகழ்ச்சியை பார்க்கவில்லை. சோ அவர்களின் இக்கதையை நான் ஏற்கனவே சமீபத்தில் எழுபதுகளில் துக்ளக்கில் தொடர்கதையாக படித்துள்ளேன். பார்ப்பனரை கிண்டல் செய்து அதில் ஒன்றும் வரவில்லை. எல்லாமே யதார்த்தமாகத்தான் எழுதப்பட்டன.

3. பிராமண அசோக் வேடத்தில் (கதாநாயகன்) நடிக்கும் நடிகர் ஒரு இஸ்லாமியர். தெரியுமா?
பதில்: நடிப்புத்தானே இதில் என்ன பிரச்சினை? சோப்ராவின் மகாபாரதத்தில் அர்ஜுனனாக நடித்தது ஒரு இசுலாமியர். அதற்கென்ன இப்போது? பம்பாய் படத்தில் இசுலாமியராக கிட்டியும் இந்துவாக நாசரும் நடித்தனர். அதற்கு என்ன கூறுவீர்கள்?

5. 'எங்கே (செட்டியார் / பிள்ளைமார் / நாடார் / சைவ வேளாளர் / கவுண்டர் / தேவர்........)' என்றெல்லாம் சீரியல் எடுத்துவிடவோ தமிழ் தொலை காட்சிகளில் ஒளிபரப்பிட முடியுமா?
பதில்: அதாவது எங்கே வன்னியர் என்ற பெயரில் பாமகவின் தொலைகாட்சி சேனலில் வராது என்கிறீர்கள்?

7. சுஜாதாவின் 'சிங்கமய்யங்கார் பேரன்' நாடகம் பார்த்ததுண்டா / படித்ததுண்டா? அதில் சுஜாதா எழுப்பிய பல ஆதங்கங்கள் 'எங்கே பிராமணன்' தொடரில் சோ எழுப்பப்போவது ஏதாவது பூகம்பத்தை ஏற்படுத்துமா? (பிராமண சமூகத்தினரிடையே?)
பதில்: சுஜாதாவின் நாடகம் பார்த்ததில்லை. எங்கே பிராமணன் அற்புதமான கதை. திரைக்கதை எழுதுவது வெங்கட். ஆகவே நன்றாகவே இருக்கும்.

8. சோவின் 'எங்கே பிராமணன்' தொடர் எழுப்பும் கேள்விகள்படி - உங்களையோ உங்களைச் சுற்றியுள்ள குடும்பத்தினர் அல்லது நங்கநல்லூர் வாசிகளில் பலரை 'பிராமணர்' என இன்றைக்கு குறிப்பிடமுடியுமா?
பதில்: முடியவே முடியாது. யாருமே இப்போது உண்மையான பிராமணன் இல்லை”.

இப்போது பதிவின் விஷயத்துக்கு வருகிறேன். அதாவது சீரியலைப் பற்றி பேசுவேன்.

நான் ஏற்கனவே கூறியபடி இது தொடராக துக்ளக்கில் சமீபத்தில் 1972-ல் வந்த போதே படித்தவன். பிறகு அதை நான் படிக்கவில்லை. ஆனால் அதில் பல நிகழ்ச்சிகள் பசுமரத்தாணி போல மனதில் பதிந்துள்ளன.

கதை சுருக்கம்:
கைலாயத்தில் ஒரு சர்ச்சை எழுகிறது. யார் பிராமணன் என்பதே அது. அதை அறிய வசிஷ்டர் பூமியில் அவதாரம் செய்வது என தீர்மானமாகிறது. வசிஷ்டர் பிறந்து பூணூல் போட்டு காயத்ரி மந்திர உபதேசம் பெறும் வரை மிகவும் சாதாரண மனிதராகவே இருப்பார். பிறகுதான் தனது அவதார நோக்கத்தை புரிந்து நிறைவேற்றுவார் என்பதையும் கைலாயத்திலேயே முடிவு செய்து விடுகிறார்கள்.

வசிஷ்டர் அசோக் என்னும் பெயரில் தொழிலதிபர் நாதனுக்கு ஒரே மகனாகப் பிறக்கிறார். எதிலு ஆர்வமின்றி அவர் பாட்டுக்கு வளர்கிறார். நன்றாக படிப்பு எல்லாம் படிக்கிறார், இருப்பினும் ஒரு தொழிலதிபரின் ஒரே மகன் என்ற பந்தாவெல்லாம் இல்லாது, ரொம்பவுமே எளிமையாக இருக்கிறார். நாதனின் நண்பர் அவரை வேலைக்காரன் என புரிந்து கொள்ளும் அளவுக்கு இது போகிறது. பேச்செல்லாம் கூட ஒரு மாதிரியாகத்தான் இருக்கிறது. ஆகவே அவருக்கு சித்த சுவாதீனம் இல்லை என்னும் அளவுக்கு போகிறது. நாதனுக்கு ராஜகுரு மாதிரி ஒருவர் இருக்கிறார். அவர் சொல்படிதான் நாதன் நடக்கிரார். அவர் மனைவி வசுமதி லேடீஸ் க்ளப் என்றெல்லாம் சேவை செய்கிறார்.

இதற்கு மேல் கதை என கேட்கும் முரளி மனோகருக்கு, ஆசை தோசை அப்பளாம் வடை. இப்போதைக்கு இவ்வளவுதான் என கூறுவேன். சீரியலைப் பாருங்கள். ஜெயா டி.வி.யில் திங்கள் முதல் வெள்ளி வரை இரவு 8 மணிக்கு ஒளிபரப்பாகிறது. அவ்வப்போது சோவும் அவரை கேள்வி கேட்பவர் ஒருவருமாக வந்து கலகலப்பூட்டுகின்றனர். சீரியல் கதை முடிச்சுகளுக்கு அவ்வப்போது சோ பதில் கூறுகிறார்.

உதாரணத்துக்கு பிரும்மஸ்ரீ அமரர் சேங்காலிபுரம் அனந்தராம தீட்சிதர் அவர்கள் தனது காலட்சேபங்களுக்கு வரும் பெரிய மனிதர்களை காலட்சேபத்தின் நடுவிலேயே இந்திரன், சந்திரன் எல்லாம் புகழ்ந்து பலரை நெளிய வைத்து விடுவார். இதை நரஸ்துதி என்பார்கள். இந்த சீரியலில் வரும் நீலுவும் அதே மாதிரி காலட்சேபத்துக்கு வந்த நாதனை அப்படி புகழ்கிறார். அது பற்றி சோவை அவர் நண்பர் கேள்வி கேட்க சோ அவர்கள் அழகாக பதிலளிக்கிறார். அதாவது தரும சிந்தனை குறைந்து வரும் இந்த நாளில், தருமம் செய்பவர்களை அவ்வப்போது வெளிப்படையாக புகழ்ந்தால் மற்றும் சிலர் அதே மாதிரி தர்மம் செய்ய விழைவார்கள் என்பதே அது.

சரி, இப்போதுதான் முதல் ஐந்து எபிசோடுகள் முடிந்துள்ளன. இன்னும் வரவேண்டியவை நிறைய இருக்கின்றன.

நாதனாக வரும் டில்லி குமார், வசுமதியாக வரும் நளினி (ராமராஜன்), அசோக்காக வரும் கௌஸ், நாதனின் குருவாக வரும் நீலு ஆகிய எல்லோருமே அமர்க்களப்படுத்துகிறார்கள். பிராமணா பாஷை புகுந்து விளையாடறது. ரொம்ப பேஷா இருக்குன்னா. ரம்யமா இருக்கு.

வரும் எபிசோடுகளிலிருந்து என்னைப் பதிவு போடத் தூண்டும் விஷயங்கள் ஏதேனும் வந்தால் கண்டிப்பாக அதைச் செய்வேன். அதைவிட வேறு வேலை என்ன இருக்கும் எனக்கு?

மற்றப்படி நல்ல சீரியல். தவற விடாதீர்கள். அவ்வளவுதான் சொல்வேன்.

அன்புடன்,
டோண்டு ராகவன்