மதுரை சட்னிக்குத்தான் ஃபேமசுன்னு சொன்னாங்க, கிட்னிக்குமாஆஆ!

ஒரு வடிவேலு படத்தில் கீழ்க்கண்ட காட்சி வரும்.

வெளியூர்க்காரரான அவர் டீக்கடையில் உட்கார்ந்து டீ குடித்து கொண்டிருப்பார். அவர் பக்கத்தில் வஸ்தாது போன்ற தோரணையில் ஒருவர் உட்கார்ந்திருந்து டீ குடித்து கொண்டிருப்பார். வஸ்தாதை ஒரு விடலைப்பையன் நாக்கூசும் வார்த்தைகளால் அர்ச்சித்து கொண்டிருப்பான். ஆண்பிள்ளையாக இருந்தால் தன்னுடன் ச்ண்டைக்கு வருமாறு சீண்டுவான்.

வஸ்தாதோ அவனைப் பொருட்படுத்தாது டீ குடித்து கொண்டிருப்பார். வடிவேலுவுக்கோ திகைப்பு. “என்ன சார் அந்தப் பையன் இப்படி சீண்டறான், வேடிக்கை பாத்துட்டு இருக்கீங்க” என்று அவரைத் திகைப்புடன் கேட்பார். வஸ்தாது அவரிடம் சாடையாக பேசாமல் இருக்கச் சொல்வார். பையனும் விடாமல் சீண்டுவான். வடிவேலு கோபம் தாளாது பையனைத் துரத்த, அவன் போக்குக் காட்டிக் கொண்டே போய் ஒரு வேனில் ஏற, இவரும் பின்னாலேயே போய் ஏற, கதவை சாத்திவிட்டு அவரது ஒரு கிட்னியை எடுத்து அனுப்புவார்கள்.

முனகிக் கொண்டே வந்த வடிவேலுவை அந்த வஸ்தாது துக்கம் விசாரிப்பார். பிறகு முந்தைய வாரம்தான் தனது ஒரு கிட்னியை இதே மாதிரி பறிகொடுத்ததாகவும், அந்த புரோக்கர் பையன் அடுத்த கிட்னிக்கு குறிவைத்து வந்ததாகவும் கூறுவார். டீக்கடைக்காரரை வடிவேலு ஆதங்கத்துடன் இது பற்றி கேட்க அவரும் தனது கிட்னியை முந்தைய மாதம் எடுத்தார்கள் எனக் கூறுவார்.

அப்போதுதான் வடிவேலு “மதுரை சட்னிக்குத்தான் ஃபேமசுன்னு சொன்னாங்க, கிட்னிக்குமாஆஆ”! எனப் புலம்புவார்.

பை தி வே யாராவது படத்தின் பெயரை எடுத்து கூறினால் தன்யனாவேன்.

ஏன் இதை டோண்டு ராகவன் கூறுகிறான் என திகைப்படையும் வாசகர்கள் மற்றும் முரளி மனோகருக்காக மேலும் விளக்குவேன்.

எளிதில் உணர்ச்சிவசப்படும் மாணவர்கள் இளங்கன்று பயமறியாது எனச் செயல்பட்டு அவதிக்குள்ளாகப் போகிறார்களே என்று பயந்து நான் இட்ட இப்பதிவுக்கு என்னென்ன எதிர்வினைகள் வந்தன? அடேங்கப்பா!

மாணவர்கள் வடிவேலு ரேஞ்சுக்கு அவதிப்படக்கூடாது என்பது மட்டுமே என் நோக்கம். அதனால்தான் அந்த டீக்கடை வஸ்தாது போல இல்லாமல் நேரடியாகவே கூறினேன். ஏனெனில் இதே மாதிரி ஹிந்தி திணிப்பு எதிர்ப்பு போராட்டத்தால் ஒரு கல்வியாண்டை இழந்தவன் நான். அதன் பிறகு சுதாரித்து கொண்டேன், வேறு வகையில் முன்னுக்கு வந்தேன் என்பதெல்லாம் வேறு விஷயம். ஏதோ அதிர்ஷ்டம், மேலே வரமுடிந்தது அவ்வளவுதான்.

சில உதாரண பின்னூட்டங்கள்:
1. இடஒதுக்கீட்டிற்கு எதிராக மாணவர்கள் போராடியபோது கூட அவர்களை போராட வேண்டாம் என்றும் படிக்க மட்டும் செய்தால் போதும் என்றும் நீங்கள் கூறினீர்களா ஐயா?
மாணவர்களை பார்த்து பயந்து போயுள்ளதில் நீங்கள் கலைஞர் கட்சி.

2. மனிதாபிமானமே இல்லாம அப்படி என்னத்த படிச்சு சாதிக்கப் போறோம்? அப்படி படிச்சு வர்ற தலைமுறையால என்ன பிரயோசனம்?

3. அதெல்லாம் சரி நோண்டு, இந்திய சுதந்திரப் போராட்டத்தில் கலந்துகிட்ட எல்லாரையுமே முட்டாள்ன்னு சொல்றியா! பகத்சிங்க், வாஞ்சிநாதன் இன்னும் பலரெல்லாம் எதுக்கு ராசா உயிர விட்டாங்க? சுதந்திர போராட்டத்துல லட்சகணக்கான பேர் பங்கெடுத்தும் காந்தி மட்டும் ஏன் ராசா தேசத் தந்தைன்னு சொல்லராங்க ?
இத பாரு நோண்டு பேசாம அமைதியா வீட்ல உக்காந்து டிவி சீரியல் பாரு இதெல்லாம் உனக்கு வேண்டாத வேலை.
ஆமா பசங்ச படிப்பு கேட்டுபோகும்னு நீ அக்கறைப்படும்போது தமிழன் கொல்லப்படுவது தடுக்கணும்னு நாங்க அக்கறைப்படுறது என்ன தப்பு?

4. இப்போ கஷ்டப்படுறவனுக்காக போராடணும்னு யாருக்குத் தோணுதோ, அதிகாரம் பண்றவன் தன்னோட நாட்டுக்காரனா இருந்தாலும் தப்புன்னு சொல்ற மனசு யாருக்கு இருக்கோ, அவனை மாதிரி மனசு உள்ளவந்தான் போன நூற்றாண்டுலயும் சரி, இன்னைக்கும் சரி போராடி தீமையை ஒழிக்கிறவன்.
இன்னைக்கு பாதுகாப்பா இருந்துகிட்டு, நாளைக்குப் பணக்காரனா ஆனாப் போதும்னு நினைக்கிற நாய்கள், அதிகாரத்துக்கு அடிதாங்கும் கூட்டத்திலதான், அன்னைக்கும், இன்னைக்கும், என்னைக்கும்.

இப்படியே போனால் எல்லா பின்னூட்டங்களும் வந்து விடும். ஆகவே இத்துடன் நிறுத்தி கொள்கிறேன். ஆதரித்து வந்த பின்னூட்டங்களை இங்கு சேர்க்கவில்லை.

இப்போது ஒன்று புரிகிறது. டீக்கடையில் வடிவேலுவிடம் ஐயா சாமி போகாதே, உன் கிட்னியை பிடுங்கிட்டுத்தான் விடுவாங்கன்னு யாராவது சொல்லியிருந்தால் கூட சிலர் அங்கே வந்து, தன்மானத்துடன் சீறும் வடிவேலுவை ஏன் தடுக்கறே பெரிசுன்னு கேட்பாங்க போலிருக்கு. அது சரி, அப்படியே விட்டால் வடிவேலு மாதிரி காரியம் கை மிஞ்சியதும் “மதுரை சட்னிக்குத்தான் ஃபேமசுன்னு சொன்னாங்க, கிட்னிக்குமாஆஆ”! என்று கத்தி சிலர் டரியல் ஆனால்தான் பலருக்கு ஜன்மசாபல்யம் கிட்டும் போலிருக்கிறது.

ஊத வேண்டிய சங்கை இன்னொரு முறை ஊதியாகி விட்டது. வரட்டுமா?

அன்புடன்,
டோண்டு ராகவன்