சட்டக் கல்லூரி விஷயம்

பாரா மற்றும் என்றென்றும் அன்புடன் பாலா ஆகியோர் எழுதிய பதிவுகளை படிக்கும்போது ஏதோ ஏற்கனவே நடந்ததை திரும்பப் பார்க்கும் உணர்வுதான் ஏற்பட்டது. சமீபத்தில் 1968-ல் பஸ் கண்டக்டர் ஒருவருக்கும் சில கல்லூரி மாணவர்களுக்கும் நடந்த மோதலில் கண்டக்டர் கொல்லப்பட்டார். அப்போதைய போக்குவரத்து அமைச்சர் கண்டக்டர்கள் மத்தியில் பேசும்போது அவர்களுக்கு ஆதரவாகப் பேசியதோடு நிற்காது ஆதரவு போக்குவரத்து ஊழியர்களுக்கு, குண்டுகள் மாணவர்களுக்கு என பொருள்பட வேறு பேசித் தொலைத்து விட்டார்.

அடுத்த இரண்டு மூன்று நாட்களுக்கு பல பஸ்களை தாறுமாறாக ஓட்டி மாணவர்கள் என நினைத்தவட்ர்களையெல்லாம் சகட்டு மேனிக்கு தாக்கினர் போக்குவரத்து ஊழியர்கள். முக்கியமாக சட்டக் கல்லூரி மாணவர்களும் மருத்துவக் கல்லூரி மாணவர்களும் மோசமாக தாக்கப்பட்டனர். ஜெனெரல் ஆஸ்பத்திரி அருகில் உள்ள மேம்பாலத்தில் நடந்து கொண்டிருந்த நான் என் கண்ணாலேயே பல மாணவர்களைத் தாக்கியதைப் பார்த்தேன். நல்ல வேளையாக நான் அவர்கள் கண்ணில் படவில்லை.

அச்சமயம் ஹிந்துவில் ஒரு ஃபோட்டோ வந்தது. ஒரு கல்லூரி ஹாஸ்டலுக்கு முன்னால் ரௌடிகள் அணிவகுத்து நிற்க அவர்களைக் கலைந்து போகுமாறு அப்போதைய போலீஸ் கமிஷனர் கூனிக் குறுகி மன்றாடியதை காட்டிய போட்டோ அது. அதைப் பார்த்து தமிழகமே கொதித்தது. போக்குவரத்து மந்திரி சொதப்பியதற்கு பேரறிஞர் அண்ணா பதில் கூற வேண்டியிருந்தது. அவரை ஒரு ஸ்டூல் மேல் நிற்க வைத்து மூன்று மணி நேரம் வறுத்தெடுத்து விட்டனர். அதை நேரில் பார்த்து ரிப்போர்ட் செய்த இந்து நிருபர் என் தந்தை ஆர். நரசிம்மன் அவர்கள். குப்புசாமி ஃபோட்டோ விஷயம் பற்றி கேட்ட போது அண்ணா வெளிப்படையாகக் கூறியது, "I agree that it is very damaging". வேறு என்னதான் கூற இயலும். அவரைப் பார்க்க தனக்கே பாவமாக இருந்ததாக என் தந்தை என்னிடம் கூறினார்.

முக்கியமாக ஒன்றைக் கூற மறந்து விட்டேனே. அந்தப் போக்குவரத்து மந்திரியின் பெயர் மு. கருணாநிதி.

மதுரை தினகரன் ஆஃபீசில் நடந்த தாக்குதல்களை கைகட்டி வேடிக்கை பார்த்தது போல நேற்று சட்டக் கல்லூரியிலும் செய்துள்ளனர். இரு சமயங்களிலும் முதல்வர் கருணாநிதி அவர்களே. அதுவும் போலீஸ் துறை அவர் வசம்தான் உள்ளது. அவர் ராஜினாமா செய்வது நல்லது.

அன்புடன்,
டோண்டு ராகவன்