டோண்டு பதில்கள் - 09.05.2008

சரவணன்:
1. நல்லாதான் பதில் சொல்றீங்களே நீங்க ஏன் அரசியலுக்கு வர கூடாது, அட்லீஸ்ட் உங்க வார்டு கவுன்சிலரா ஆகலாம் இல்லை?
ஏன், நான் நல்லா இருக்கிறது பிடிக்கவில்லையா?
2. ரொம்ப தைரியமா பேசறீங்களே நீங்க இருக்கரது சென்னை வாழறது 2008 உங்கள் கருத்துகளை கருத்துக்களாலேயே எதிர்ப்பார்கள் என்று எப்படி உங்களுக்கு நம்பிக்கை, ஆட்டோ அனுப்பினா என்ன செய்வீங்க?
என்ன இருந்தாலும் நம் நாடு ஜனநாயக நாடு என்பதை மறத்தல் தகாது.
3. அப்புறம் இது முக்கியமான கேள்வி தேமுதிக கட்சிக்கு கொபசெ என்று யாரை போடலாம்? (ரோஜா, ராதிகா, பானுப்ரியா, அசின் இல்லை அந்த பெண் இன்னும் பிறக்கவில்லை பிறந்து வளர்ந்து விஜயகாந்த் கூட நடித்த உடன் முடிவு செய்து கொள்ளலாம்).
என் அபிமான நடிகை மான் கண்ணழகி நக்மாவை விட்டு விட்டீர்களே.
4. அப்புறம் ரொம்ப ரொம்ப முக்கியமான் கேள்வி, நீங்க ஏன் சிறந்த கேள்வி கேட்பவர்களை தேர்ந்தெடுத்து பரிசு கொடுக்க கூடாது, உதாரணத்துக்கு இந்த சிறந்த கேள்விக்கு பரிசு கொடுப்பதில் இருந்து ஆரம்பிக்கலாம்.
துக்ளக்கில் அப்படித்தான் சமீபத்தில் 1970-ல் ஆரம்பித்தார்கள். ஒரு லட்ச ரூபாய் பரிசு. அதாவது ஒரு லட்சத்துக்கான அரசு பரிசு சீட்டு. அச்சமயம் ஒரு கேள்வியில் அப்பரிசு சீட்டுக்கு பரிசு விழுந்தால்? என்று கேட்க, சோ அவர்கள் வெளிப்படையாகவே எழுதினார் "வயிறெரியும்" என்று. சில வாரங்களிலேயே லாட்டரி சீட்டு பரிசாக வழங்குவது நிறுத்தப்பட்டது, ஏனெனில் யாரோ அவரிடம் கேள்வி கேட்டனர், அதாவது நீங்களே துக்ளக்கில் அரசு லாட்டரி திட்டத்தை எதிர்த்து எழுதும் தருணத்தில் இம்மாதிரி பரிசுச் சீட்டு வழங்குவது முரண்பாடாக இல்லையா என்று. அதை மரியாதையாக ஒத்து கொண்டது துக்ளக். அது சரி, துக்ளக் செய்வது ஒரு வியாபார உத்தி. எனக்கு அதெல்லாம் தேவையில்லை.

மகேஸ்:
1. சமீபத்தில் நீங்கள் இரண்டரை வயது குழந்தையாக இருந்தபொழுது நடந்த சுவாரசியமான சம்பவம் ஏதேனும்...
நான் இரண்டரை வருட குழந்தையாக இருந்தது அக்டோபர் 1948-ல். அந்த மாதம் இரண்டாம் தேதி முதன்முறையாக அது (காந்தி ஜயந்திக்காக) அரசு விடுமுறையாக அறிவிக்கப்பட்டதாக அறிகிறேன். அகில இந்திய ரேடியோவில் அன்று முழுக்க காந்தி பஜன் நடந்தது. எம்.எஸ். அவர்களது வைஷ்ணவ ஜனதோ பாட்டை பல நிலையங்களில் பல நேரங்களில் ஒலி பரப்பினார்கள். காந்தியின் வழிப்படி நடப்போம் என்ற தலைவர்கள் உறுதி மொழி அவர் சமாதியில் எடுக்கும் சடங்கு அந்த ஆண்டுதான் துவக்கப்பட்டது.

அந்த ஆண்டு தீபாவளி கொண்டாடக்கூடாது என பல கணவர்கள் தீர்மானிக்க (இந்த முறையாவது பட்டுப் புடவை வாங்காது தத்தம் பர்ஸுகளை காப்பாற்றத்தான்) மனைவியர் அது குறித்து சோகம் அடைந்து, இரு கோடுகள் தத்துவத்தில் காந்தி மறைந்த சோகம் சிறியதாகிப் போனது என்றும் நம்பத்தகாத வட்டாரங்கள் தெரிவிக்கின்றன. இது மேக்ரோ அளவில். இப்போது மைக்ரோ லெவலுக்கு வருவோம்.

அதே ஆண்டு தி. நகர் சரோஜினி தெரு 15-ஆம் நம்பரில் குடியிருந்த ருக்மிணி மாமி தனது வீட்டிற்கு வாங்கப்பட்ட ஐந்து ரூபாய்களுக்கான பட்டாஸ்களை வெய்யிலில் காய வைக்க நினைத்தார். ஆனால் ஒரே மழை. ஆகவே அவர் சக குடித்தனக்காரரும் தோழியுமான செல்லம் மாமி ஒரு பெரிய தாம்பாளத்தில் பட்டாஸ்களை பரப்பி தங்கள் வீட்டின் அடுப்பு மேல் சற்று நேரத்துக்கு வைத்து, அதை மறந்து போனதில் திடீரென எதிர்பாராமல் பட்டாசுகள் சமையல் அறையிலே வெடிக்கத் துவங்க ஒரே களேபரம்.

நேர் மாடியில் இருந்த வீட்டுக்காரர் சுப்பையரின் மனைவி சத்தத்தின் அதிர்ச்சியில் கட்டிலிலிருந்து தூக்கி போடப்பட்டு கீழே விழுந்து, கீழ் போர்ஷனுக்கு வந்து செல்லத்தையும் ருக்மிணியையும் வறுத்தெடுக்க, ருக்மிணி மாமியின் கணவர் நரசிம்மனின் தம்பி நாராயணன் அவர்கள் தான் ஆசை ஆசையாக வாங்கிய பட்டாசுகள் இப்படி நாசமானதைப் பற்றி அங்குமிங்கும் நடந்தபடி முணுமுணுத்து பொரும, செல்லம் மாமி ருக்மிணி மாமியிடம் "உங்காத்து பட்டாசை எங்காத்துலேயே வெடிச்சுட்டோம்னு உங்க சின்ன மச்சினர் கோச்சுண்டுட்டார்னு" சொல்லி (அந்த களேபரத்திலும்) நக்கல் அடிக்க, இந்த சத்தம் ஒன்றுக்கும் மசியாது ருக்மிணி மாமியின் இரண்டரை வயது பிள்ளையும் நான்கரை வயதான அவன் அக்காவும் தூக்கத்தில் ஆழ்ந்து கிடந்ததை பிற்காலத்தில் அந்த ருக்மிணி மாமி அந்தப் பிள்ளை டோண்டு மற்றும் அவன் அக்காவிடம் கூறி சிரித்தார்.

ரவிஷா
1. தசாவதாரத்தின் கதைக்களத்தில் ஒன்று "சைவ வைணவ அடிதடி" பற்றியது! சும்மா இருந்த சங்கை ஊதி கெடுக்கிறாரோ கமல்?
பதில்: இதனால் எல்லாம் சைவ வைஷ்ணவ சண்டைகள் வந்து விடாது. ஏனெனில் அவர்கள் ஒன்றுபட்டு பல நூற்றாண்டுகள் ஆகி விட்டன. இப்பல்லாம் அரியும் சிவனும் ஒண்ணு, அறியாதவன் வாயில் மண்ணுங்கறதுதான் காலம். அக்காலக் கட்டத்தை பற்றிய ஒரு நாவலில் கிருமிகண்ட சோழன் மேல் அன்னை பார்வதிக்கும் கோபம் வந்தது என படித்தேன். என்ன இருந்தாலும் அவரது தமையனது சிலையை அல்லவா மன்னன் கடலில் எறிந்தான்?

2. இந்த ஜார்ஜ் புஷ் குடாக்கு ஒண்ணு கெடக்க ஒண்ணு சொல்லிட்டே/செஞ்சிட்டே இருக்கே, நம்மூரில் என்ன ரியாக்ஷன் அதுக்கு? What is your take on that?
பதில்: இம்மாதிரி புஷ் உளறுவது ஒன்றும் புதிதில்லையே. புஷ் என்று மட்டும் இல்லை எல்லா அமெரிக்க அரசியல் தலைவர்களுக்கும் பொது அறிவு சற்றே கம்மிதான். புஷ் போன்றவர்களுக்கு லேது என்று கூட சொல்லலாம்.

இதில் எனக்கு ஒரே ஒரு பயம் என்னவென்றால் இதனால் நான் ஆதரவு தரும் ரிபப்ளிகன் கட்சி வேட்பாளரின் வெற்றிக்கு பங்கம் வந்து விடுமோ என்றுதான். அமெரிக்க விவகாரங்களில் நான் எப்போதுமே குடியரசு கட்சியின் ஆதரவாளன். ஏனெனில் அக்கட்சிக்காரர்கள்தான் உண்மையாகவே அமெரிக்காவின் முன்னேற்றத்துக்கு பாடுபட்டனர். ஜனநாயக கட்சி தலைவர்கள் விளக்கெண்ணெய்கள். அமெரிக்க நலனை கோட்டை விடுவார்கள். அமெரிக்காவின் ஆதரவாளனான டோண்டு ராகவனுக்கு அவர்களை அதனால் பிடிக்காது.

3. இந்த சாருநிவேதிதா இப்படி டமால்னு "ஆத்திகன்"னு ஸ்டேட்மெண்ட் உட்டுட்டாரே! அதப்பத்தி??
பதில்: ஸ்டேட்மெண்டா, ஸ்டண்டா? கவிஞர் கண்ணதாசன் நாத்திகரிலிருந்து ஆத்திகராக மாறியதில் நல்ல பலன் இருந்தது. அர்த்தமுள்ள இந்து மதம் கிடைத்தது. பல கண்ணன் பாடல்கள் கிடைத்தன. இந்த சாரு நிவேதிதாவால் என்ன கிடைக்கும்? கோணல் பக்கங்கள்தான்.

வேல்பாண்டி:
1. தற்போதைய பிராமணர்களிடையே ஒற்றுமை உள்ளதா?
பதில்: பிராம்மணானாம் அனேகத்துவம் (பிராமணர்களுக்குள் ஒற்றுமையில்லை) என்ற வடமொழி சுலோகம் கூறுகிறது. அதிலும் படிப்பறிவு பரவலாக இருக்கும் ஒரு சமூகத்தில் குருட்டுத்தனமாக ஒரு தலைவனிடத்தில் தனது எதிர்க்காலத்தை ஒப்படைப்பது என்பது லேசில் நடக்காது. தாங்களே ஏன் தலைவனாகக் கூடாது என்று பலரும் சிந்திக்க தொடங்குவர்.

2. நாடார்களை ஒற்றுமை, உழைப்பு, உயர்வுக்கு எடுத்துக்காடும் நீங்கள் பிராமணர்களை எதற்கு உதாரணமாக காட்டுவீர்கள்?
பதில்: படிப்பின் மீது அவர்களுக்கு இருக்கும் பற்று. ஆகவே என்னதான் தலைகீழாக நின்று தண்ணீர் குடித்தாலும் பார்ப்பனர்கள் முன்னேறுவதை, "கற்கல் நன்றே, கற்கல் நன்றே, பிச்சைப் புகினும் கற்கல் நன்றே" என்றக் கோட்பாட்டில் அவர்கள் நிற்கும்வரை, எந்த ஒரு ஜாட்டானாலும் தடுக்க முடியாது. அவர்கள் பாட்டுக்கு படித்து விட்டுப் போய் கொண்டே இருப்பார்கள். தமிழக அரசு வேலைகள் இல்லையா, போடா ஜாட்டான் என்று எங்கு வேலை கிடைக்கிறதோ அங்கு போய்க்கொள்வார்கள். அதனாலேயே வெளிநாடுகளில் அதிகம் பரவியுள்ளனர்.

சரவணன்:
1. இந்த சுவத்துக்கும் இஸ்ரவேலர்கள் மேற்கு கரையில் கட்டிய சுவற்றுக்கும் உள்ள ஒற்றுமை வேற்றுமை என்ன என்று டோண்டு சார் சொல்லவும்.

பதில்: இரண்டையும் ஒப்பிடவே இயலாது. மேற்கு கரையில் கட்டியது உண்மையான தேவைக்கு. உத்தபுரத்து சுவர் சாதிக் கொழுப்பில் செய்தது. ஐரோப்பாவில் யூதர்களை ஒரு இடத்தில் அடைத்து அவர்கள் வசிக்கும் இடத்தை சுற்றி சுவர் எழுப்பியது போலத்தான் உத்தபுரத்தில் தலித்துகளுக்கு விரோதமாக செய்தனர். மேற்கு கரையிலோ தீவிரவாதத்திற்கு எதிர்வினையாக நடந்தது. உண்மை கூறப்போனால் இசுலாமிய தீவிரவாதத்தால் பீடிக்கப்படும் இந்தியா இந்த விஷயத்தில் இஸ்ரவேலர்களின் ஆலோசனை பெறுவது புத்திசாலித்தனம். அப்படித்தான் அப்போதைய ரஷ்ய குடியரசுத் தலைவர் இஸ்ரேலுக்கு விஜயம் செய்யவிருந்தபோது அத்தேசத்தை தாக்கி வாதங்களை எடுத்து வைக்க தயாராகிக் கொண்டிருந்தார். அச்சமயம் செசன்யா விவகாரம் வெடித்து நிலைமையே தலைகீழாகப் போயிற்று. இஸ்ரேலுக்கு சென்ற ரஷ்ய குடியரசுத் தலைவர் இஸ்ரேலை கண்டனம் செய்வதற்கு பதில் அதன் ஆலோசனைகளை இது விஷயமாக பெற்று சென்றார்.

சாத்தப்பன்:
1. WHY DID THE CHICKEN CROSS THE ROAD?
பதில்: டோண்டு ராகவனுக்கு பின்னூட்டமிட்டதற்காக யாரோ அதை துரத்தினார்கள் போலும்.

அடுத்த வாரம் சந்திப்போம்.

அன்புடன்,
டோண்டு ராகவன்